ନୂଆଦିଲ୍ଲୀ,୨୮।୫: ଅଷ୍ଟ୍ରେଲିଆର ପୂର୍ବ ଚାଇନାମ୍ୟାନ୍ ବ୍ରାଡ୍ ହଗ୍ ଭାରତୀୟ କ୍ରିକେଟର ରବିଚନ୍ଦ୍ରନ ଅଶ୍ୱିନଙ୍କ ବଡ଼ ପ୍ରଶଂସକ। ଏବେ ହଗ୍ ଅଶ୍ୱିନଙ୍କୁ ନେଇ ଏକ ବଡ଼ ମନ୍ତବ୍ୟ ଦେଇଛନ୍ତି। ଏହି ସ୍ପିନର ଯଦି ଆଉ ୫ରୁ ୬ ବର୍ଷ ପର୍ଯ୍ୟନ୍ତ କ୍ରିକେଟ ଖେଳିବା ଜାରି ରଖନ୍ତି ତେବେ ମୁଥିଆ ମୁରଲୀଧରନ୍ଙ୍କ ରେକର୍ଡକୁ ଭାଙ୍ଗି ଦେଇପାରନ୍ତି। ଅଶ୍ୱିନଙ୍କ ନିକଟରେ ଉଇକେଟ ନେବାର ଇଚ୍ଛା ଭରପୂର ରହିଛି। ସ୍ପିନରଙ୍କ ମଧ୍ୟରେ ସର୍ବଦା ଶ୍ରେଷ୍ଠ ହେବାକୁ ସେ ଚେଷ୍ଟା କରନ୍ତି। ଏହା ହିଁ ତାଙ୍କୁ ଅନ୍ୟଙ୍କଠାରୁ ଭିନ୍ନ କରେ ବୋଲି ସେ କହିଛନ୍ତି।
ଏହାଛଡ଼ା ଅଶ୍ୱିନ ୪୨ ବର୍ଷ ବୟସ ପର୍ଯ୍ୟନ୍ତ ଟେଷ୍ଟ କ୍ରିକେଟ ଖେଳିପାରିବେ। ତାଙ୍କର ବ୍ୟାଟିଂ ପ୍ରଦର୍ଶନ ହ୍ରାସ ପାଇଲେ ହେଁ ସେ ବିପଜ୍ଜନକ ବୋଲର ସାବ୍ୟସ୍ତ ହେବେ। ତାଙ୍କୁ ୬୦୦ରୁ ଅଧିକ ଉଇକେଟ ନେବାକୁ ଦେଖିବାକୁ ଚାହେଁ। ଏପରିକି ସେ ୮୦୦ ଉଇକେଟ ନେଇ ମୁରଲୀଧରନଙ୍କ ରେକର୍ଡ ଭାଙ୍ଗିପାରିବେ ବୋଲି ହଗ୍ କହିଛନ୍ତି।
୩୪ ବର୍ଷୀୟ ଅଶ୍ୱିନ ଏବେ ଭାରତର ପ୍ରମୁଖ ସ୍ପିନରଙ୍କ ଭୂମିକା ତୁଲାଉଛନ୍ତି। କେବଳ ଏତିକି ନୁହେଁ ରବିନ୍ଦ୍ର ଜାଡେଜାଙ୍କ ଅନୁପସ୍ଥିତିରେ ସେ ଉଲ୍ଲେଖନୀୟ ବ୍ୟାଟିଂ କରି ଇଂଲଣ୍ଡ ବିପକ୍ଷ ସିରିଜ ଜିତିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ଏହି ସିରିଜ ସମୟରେ ସେ ୪୦୦ ଟେଷ୍ଟ ଉଇକେଟ ନେବାରେ ଦ୍ରୁତତମ ବୋଲର୍ ହୋଇଥିଲେ। ଚେନ୍ନାଇର ଏହି କ୍ରିକେଟର ଆଗାମୀ ଦିନରେ ହେବାକୁ ଥିବା ବିଶ୍ୱ ଟେଷ୍ଟ ଚାମ୍ପିୟନଶିପ୍ ଏବଂ ଇଂଲଣ୍ଡ ବିପକ୍ଷ ପାଞ୍ଚ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରେ ଚମତ୍କାର ପ୍ରଦର୍ଶନ କରିବେ ବୋଲି ଆଶା କରାଯାଉଛି।
