ନୂଆଦିଲ୍ଲୀ,୨।୯: ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନି ଅନ୍ତର୍ଜାତୀୟ କ୍ରିକେଟରୁ ହଠାତ ବିଦାୟ ନେବା ପରେ ପ୍ରଶଂସକ ଆଶ୍ଚର୍ଯ୍ୟ ହୋଇଯାଇଥିଲେ। ୨୦୧୪ରେ ଟେଷ୍ଟ କ୍ରିକେଟରୁ ଅବସର ନେଇଥିଲେ ହେଁ ସୀମିତ ଓଭର କ୍ରିକେଟରେ ସେ ସକ୍ରିୟ ଥିଲେ। କିନ୍ତୁ ଗତ ବର୍ଷ ଆଇପିଏଲ୍ ଆରମ୍ଭ ହେବା ପୂର୍ବରୁ ସେ ସନ୍ୟାସ ନେବାକୁ ନିଷ୍ପତ୍ତି ନେଇଥିଲେ। ଏବେ ମୁଖ୍ୟ କୋଚ୍ ରବି ଶାସ୍ତ୍ରୀ ଧୋନୀଙ୍କ ଅବସରକୁ ନେଇ ପ୍ରତିକ୍ରିୟା ରଖିଛନ୍ତି।
ଶାସ୍ତ୍ରୀ ତାଙ୍କ ପୁସ୍ତକରେ ଟେଷ୍ଟ କ୍ରିକେଟରୁ ଅବସର ଘୋଷଣା କରିବା ସମୟରେ ଧୋନୀଙ୍କୁ ଭେଟିଥିବା ଏବଂ ନିଷ୍ପତ୍ତି ବଦଳାଇବାକୁ କହିଥିବା ଲେଖିଛନ୍ତି। ଏହାକୁ ନେଇ ପ୍ରଶ୍ନରେ ଶାସ୍ତ୍ରୀ କହିଛନ୍ତି, ଧୋନୀଙ୍କ ନିଷ୍ପତ୍ତି ବିଷୟରେ କାହାକୁ ଜଣା ନ ଥିଲା। ମେଲବର୍ନରେ ମ୍ୟାଚ୍ ଶେଷ ହୋଇଥିଲା। ଏହାପରେ ସେ ଖବରଦାତା ସମ୍ମିଳନୀକୁ ଯିବାକୁ ଥିଲା। ଯିବା ପୂର୍ବରୁ ସେ ଫେରିବା ପରେ ଖେଳାଳିଙ୍କ ସହ କଥା ହେବେ ବୋଲି ମୋତେ କହିଥିଲେ। ଜବାବରେ ତୁମେ ଅଧିନାୟକ, ନିଶ୍ଚିତ କଥା ହୁଅ ବୋଲି କହିଥିଲି। ଧୋନୀ ସାମ୍ବାଦିକ ସମ୍ମିଳନୀରୁ ଫେରି ଏହା ମୋର ଶେଷ ଟେଷ୍ଟ ମ୍ୟାଚ୍ ହେବ ବୋଲି ଘୋଷଣା କରିଥିଲେ। ଧୋନୀ ଏଭଳି ହିଁ ବ୍ୟକ୍ତି। ସେ ୧୦୦ ନଚେତ ୧୨୦ ଟେଷ୍ଟ ଖେଳିବା ପରେ ସନ୍ୟାସ ନେବା କଥା ଭାବନ୍ତି ନାହିଁ। ତାଙ୍କୁ ତିନୋଟି ଯାକ ଫର୍ମାଟରେ ଖେଳିବା କଠିନ ବୋଲି ଲାଗିଥିଲା। ଏଣୁ ସେ ଅବସର ନେବା ଶ୍ରେୟସ୍କର ବୋଲି ଭାବିଥିଲେ। ପ୍ରତ୍ୟେକ ବ୍ୟକ୍ତିଙ୍କ ଆଭିମୁଖ୍ୟ ଭିନ୍ନ। ଏହା ଧୋନୀଙ୍କ ଗୁଣ। ସେ ଏହା କରିପାରିବେ।
ଏହାଛଡ଼ା ନଭେମ୍ବରରେ ଭାରତୀୟ ଦଳ ସହ ତାଙ୍କ ଚୁକ୍ତିନାମା ଶେଷ ହେଉଛି। ଏହାପରେ ତାଙ୍କର ଯୋଜନା ବିଷୟରେ ଶାସ୍ତ୍ରୀ କହିଛନ୍ତି, ମୁଁ ଆଗାମୀ ୪୫ ଦିନ ବିଷୟରେ ଚିନ୍ତା କରୁଛି। ଏହାପରେ କେଉଁଆଡେ ଯିବି ଜଣାପଡ଼ିବ ବୋଲି ସେ କହିଛନ୍ତି।
