ଭୁବନେଶ୍ୱର,୫ା୮:ଓଡ଼ିଶାର ଆଧ୍ୟାତ୍ମିକ ଓ ସାଂସ୍କୃତିକ ଐତିହ୍ୟର ପ୍ରତୀକ ବିଶ୍ୱପ୍ରସିଦ୍ଧ ପୁରୀ ରଥଯାତ୍ରା ଏବେ ଦେଶର ସର୍ବୋଚ୍ଚ କାର୍ଯ୍ୟାଳୟ ରାଷ୍ଟ୍ରପତି ଭବନରେ ସ୍ଥାନ ପାଇବାକୁ ଯାଉଛି। ପୁରୀ ରଥଯାତ୍ରାର ରଥଚକ ରାଷ୍ଟ୍ରପତିଙ୍କ ଭବନରେ ପ୍ରଦର୍ଶିତ ହେବ ବୋଲି ମଙ୍ଗଳବାର ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ କୁହାଯାଇଛି। ଏଥିପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ସ୍ବୀକୃତି ପ୍ରଦାନ କରିଛନ୍ତି।
ରାଷ୍ଟ୍ରପତିଙ୍କ ଓଡ଼ିଶା ଗସ୍ତ ସମୟରେ ମନ୍ଦିର ପ୍ରଶାସନର ମୁଖ୍ୟ ପ୍ରଶାସକ ଅରବିନ୍ଦ କୁମାର ପାଢ଼ୀ ତାଙ୍କୁ ଭେଟି ପ୍ରଭୁ ଜଗନ୍ନାଥଙ୍କ ନନ୍ଦିଘୋଷ, ବଳଭଦ୍ରଙ୍କ ତାଳଧ୍ୱଜ ଏବଂ ଦେବୀ ସୁଭଦ୍ରାଙ୍କ ଦର୍ପଦଳନ ରଥର ଗୋଟିଏ ଲେଖାଏ ଚକ ରାଷ୍ଟ୍ରପତି ଭବନ ପରିସରରେ ସ୍ଥାନିତ କରିବା ଲାଗି ବ୍ୟବସ୍ଥା କରିବାକୁ ନିବେଦନ କରିଥିଲେ। ଉକ୍ତ ପ୍ରସ୍ତାବରେ ରାଷ୍ଟ୍ରପତି ସହମତି ପ୍ରଦାନ କରିଥିବାରୁ ଆମେ ଗଭୀର କୃତଜ୍ଞ। ଏହା ଆମ ସମସ୍ତଙ୍କ ପାଇଁ ଅତ୍ୟନ୍ତ ଆନନ୍ଦ ଓ ଗର୍ବର ବିଷୟ। ଆମେ ୩ଟି ପବିତ୍ର ଚକ ରାଷ୍ଟ୍ରପତି ଭବନକୁ ପଠାଇବୁ ବୋଲି ପାଢ଼ୀ କହିଛନ୍ତି। ଓଡ଼ିଶାର ସାଂସ୍କୃତିକ ପ୍ରାଣକେନ୍ଦ୍ରକୁ ଭାରତୀୟ ଗଣତନ୍ତ୍ରର ମୁଖ୍ୟସ୍ଥଳରେ ପହଞ୍ଚାଇବା ଏହାର ମୂଳ ଲକ୍ଷ୍ୟ। ଏହି ଚକଗୁଡ଼ିକ କେବଳ କାରିଗରିର ପ୍ରତିନିଧିତ୍ୱ କରୁନାହିଁ ବରଂ ବହୁ ଶତାବ୍ଦୀର ଭକ୍ତିଭାବକୁ ବହନ କରୁଛି। ରାଷ୍ଟ୍ରପତି ଭବନରେ ସେଗୁଡ଼ିକର ଉପସ୍ଥିତି ଜଗନ୍ନାଥ ସଂସ୍କୃତିର ବ୍ୟାପକତାକୁ ସ୍ମରଣ କରାଇବ ବୋଲି ପାଢ଼ୀ କହିଛନ୍ତି। ଗତବର୍ଷ ଅଗଷ୍ଟରେ ଲୋକ ସଭା ବାଚସ୍ପତି ଓମ୍ ବିର୍ଲା ପାର୍ଲାମେଣ୍ଟ ପରିସରରେ ୩ ରଥଚକ ସ୍ଥାପନ କରିବା ପ୍ରସ୍ତାବକୁ ଗ୍ରହଣ କରିଥିଲେ।
Dharitri – Odisha’s No.1 Odia Daily
