କାବୁଲ, ୧୦ା୯- ଆସନ୍ତା ଟି୨୦ ବିଶ୍ୱକପ୍ରେ ଷ୍ଟାର ଲେଗ୍ ସ୍ପିନର ରସିଦ ଖାଁଙ୍କ ଆଫଗାନିସ୍ତାନ ଦଳର ନେତୃତ୍ୱ ନେବେ ନାହିଁ। ତାଙ୍କୁ ଦଳ ଚୟନ ବେଳେ ମତ ରଖିବାକୁ ସୁଯୋଗ ଦିଆଯାଇ ନ ଥିବାରୁ ସେ ଅଧିନାୟକ ପଦରୁ ଇସ୍ତଫା ଦେଇଛନ୍ତି। ତାଙ୍କ ବଦଳରେ ଭେଟରାନ ଅଲରାଉଣ୍ଡର ମହମ୍ମଦ ନବିଙ୍କୁ ଆଫଗାନିସ୍ତାନର ଅଧିନାୟକ ମନୋନୀତ କରାଯାଇଛି।
ଅଧିନାୟକ ପଦବୀରେ ନବିଙ୍କ ନିଯୁକ୍ତି ସମ୍ପର୍କରେ ଆଫଗାନିସ୍ତାନ କ୍ରିକେଟ ବୋର୍ଡ (ଏସିବି) ତରଫରୁ ବିଧିବଦ୍ଧ ଘୋଷଣା କରାଯାଇ ନାହିଁ। କିନ୍ତୁ ୩୬ ବର୍ଷୀୟ ଅଲରାଉଣ୍ଡର ଟୁଇଟ୍ କରି କହିଛନ୍ତି, ଦଳର ନେତୃତ୍ୱ ନେବାଲାଗି ତାଙ୍କୁ ମନୋନୀତ କରାଯାଇଛି। ସଂକଟ ସମୟରେ ଏସିବି ନିଷ୍ପତ୍ତିକୁ ସେ ସ୍ବାଗତ କରିଛନ୍ତି। ଟି୨୦ ବିଶ୍ୱକପ୍ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଓ ଓମାନ୍ରେ ଅକ୍ଟୋବର ୧୭ରୁ ନଭେମ୍ବର ୧୪ ପର୍ଯ୍ୟନ୍ତ ହେବ। ତାଲିବାନ ଶାସନ କ୍ଷମତାକୁ ଆସିବା ପରେ ଅଫଗାନିସ୍ତାନରେ ଅରାଜକତା ଦେଖା ଦେଇଛି। ଦେଶରେ କାମଚଳା ସରକାର ଗଠନ ପରେ ତାଲିବାନ କ୍ରିକେଟ ସମତେ ସମସ୍ତ ପ୍ରକାର ଖେଳରେ କଟକଣା ଜାରି କରିଛି। ଫଳରେ ଅଫଗାନିସ୍ତାନ ପୁରୁଷ ଦଳ ଟେଷ୍ଟ ମାନ୍ୟତା ହରାଇବା ଆଶଙ୍କା ସୃଷ୍ଟି ହୋଇଛି। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ନିୟମାନୁସାରେ ଟେଷ୍ଟ ଖେଳୁଥିବା ସମସ୍ତ ଦେଶରେ ଏକ ମହିଳା ଦଳ ରହିବା ଆବଶ୍ୟକ। ଆସନ୍ତା ନଭେମ୍ବର ୨୭ରେ ଅଷ୍ଟ୍ରେଲିଆ ଏହାର ସିଜନ ଓପନିଂ ଟେଷ୍ଟ ମ୍ୟାଚ ଆଫଗାନିସ୍ତାନ ବିପକ୍ଷରେ ଖେଳିଥାନ୍ତା। ତାଲିବାନର ନିର୍ଦ୍ଦେଶନାମାକୁ ଭିତ୍ତିକରି ଏହି ମ୍ୟାଚକୁ ରଦ୍ଦ କରିଦିଆଯିବ ବୋଲି କ୍ରିକେଟ ଅଷ୍ଟ୍ରେଲିଆ (ସିଏ) କହିଛି।
