କଟକ,୧୬ା୨ (କାର୍ତ୍ତିକ ସାହୁ) ମଧୁପାଟଣା ଥାନା ଅଧୀନ ନୂଆପଡ଼ା ବାଲିସାହି ଅଞ୍ଚଳରେ ଜଣେ ୭ ବର୍ଷୀୟ ନାବାଳିକାଙ୍କୁ ଗଣ ବଳାତ୍କାର କରାଯାଇଛି। ସରସ୍ବତୀ ପୂଜାରେ ଏଭଳି ଏକ ସ୍ପର୍ଶକାତର, ଅମାନୁଷିକ କାଣ୍ଡକୁ ନେଇ ଜାତୀୟ ମାନବାଧିକାର କମିଶନ(ଏନ୍ଏଚ୍ଆର୍ସି)ରେ ଶୁକ୍ରବାର ଏକ ମାମଲା ରୁଜୁ ହୋଇଛି। ପୀଡ଼ିତା ନାବାଳିକାଙ୍କ ବୟାନକୁ ଦେଇ ମଧୁପାଟଣା ଥାନାରେ ଏକ ମାମଲା ରୁଜୁ ହେବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।
ସୂଚନା ଅନୁସାରେ, ସ୍ଥାନୀୟ ଅଞ୍ଚଳରେ ଅନୁଷ୍ଠିତ ସରସ୍ବତୀ ପୂଜାରେ ନାବାଳିକା ଜଣକ ଏକ ଦୋକାନକୁ ଯାଉଥିବା ବେଳେ ସାଇକେଲରୁ ତଳେ ପଡ଼ି ଯାଇଥିଲେ। ନାବାଳିକାଙ୍କ ଗୋଡ଼ରେ ଆଘାତ ଲାଗିଥିବାରୁ ୩ ଜଣ ଦୁବୃର୍ତ୍ତ ନାବାଳିକା ଜଣଙ୍କୁ ମେଡିକାଲ ନେଇ ଯିବାକୁ କହି ଏକ ନିଛାଟିଆ ବଣକୁ ନେଇଯାଇଥିଲେ। ସେଠାରେ ସେମାନେ ଅତ୍ୟନ୍ତ ଅମାନୁଷିକ ଭାବେ ନାବାଳିକାଙ୍କୁ ଗଣ ବଳାତ୍କାର କରିଥିଲେ। ନାବାଳିକା ଜଣକ ଘରକୁ ଫେରିବା ପରେ ପ୍ରବଳ ରକ୍ତସ୍ରାବ ହେବାରୁ ପରିବାର ଲୋକେ ନାବାଳିକା ଧରି ମଧୁପାଟଣା ଥାନାରେ ପହଞ୍ଚି ଏତଲା ଦେଇଥିଲେ। ଏହି ସମ୍ବେଦନଶୀଳ ଘଟଣାରେ ମଧୁପାଟଣା ଥାନାରେ ଦଫା ୩୭୬, ୩୪ ଏବଂ ପୋକସୋ ଆକ୍ଟରେ କେସ୍ ନଂ ୫୮/୨୦୨୪ ରୁଜୁ ହୋଇଛି। ନାବାଳିକାର ଅବସ୍ଥା ଗୁରୁତର ଥିବାରୁ ପୋଲିସ ତାଙ୍କୁ ଏସ୍ସିବି ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରିବା ସହ ମେଡିକାଲ ଯାଞ୍ଚ କରାଯାଇଛି। ଅତିରିକ୍ତ ଡିସିପି ଅନୀଲ କୁମାର ମିଶ୍ର କହିଛନ୍ତି, ମାମଲାରେ ତଦନ୍ତ ଜାରି ରହିଛି। ପିଡ଼ିତା ନାବାଳିକା ଓ ସାକ୍ଷୀମାନଙ୍କୁ ପଚରାଉଚରା କରାଯାଉଛି। ତଦନ୍ତ ପରେ ସତ୍ୟାସତ ସାମ୍ନାକୁ ଆସିବ। ଏତଲାରେ କୌଣସି ଅଭିଯୁକ୍ତଙ୍କ ନାଁ ଉଲ୍ଲେଖ କରାଯାଇନାହିଁ। ଅଭିଯୁକ୍ତମାନଙ୍କ ବିଷୟରେ କିଛି ଜଣାପଡ଼ିବା ଦରକାର। ଘଟଣାର ପ୍ରମୁଖ ସାକ୍ଷୀମାନଙ୍କର ବୟାନ କୋର୍ଟରେ ରେକର୍ଡ କରାଯିବ। ପିଡ଼ିତାଙ୍କ ମେଡିକାଲ ଯାଞ୍ଚ ରିପୋର୍ଟକୁ ଅପେକ୍ଷା କରାଯାଇଛି।
ଅପରପକ୍ଷରେ ନ୍ୟାୟ ପାଇଁ ଲଢେଇ ପରିବାରର ରାଜ୍ୟ ସଭାପତି ସୁବ୍ରତ କୁମାର ଦାଶଙ୍କ ପକ୍ଷରୁ ଏନ୍ଏଚ୍ଆର୍ସିରେ କେସ୍ ନଂ ୨୫୮୨/୨୦୨୪ ରୁଜୁ ହୋଇଛି। ଏନ୍ଏଚ୍ଆର୍ସି ଏହି ମାମଲାରେ ହସ୍ତକ୍ଷେପ କରି ଦୋଷୀ ବିରୁଦ୍ଧରେ କଠୋରରୁ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ସମ୍ପୃକ୍ତ ନାବାଳିକାଙ୍କୁ ଉଚ୍ଚସ୍ତରୀୟ ଚିକିତ୍ସା ଯୋଗାଇ ଦେବାକୁ ନିବେଦନ କରିଛନ୍ତି। ଏଥିସହ ନାବାଳିକାଙ୍କ ପରିବାରକୁ ୫୦,୦୦୦,୦୦ (ପଚାଶ ଲକ୍ଷ ଟଙ୍କା) କ୍ଷତିପୂରଣ ରାଶି ଯୋଗାଇ ଦେବାକୁ ମଧ୍ୟ ନିବେଦନ କରାଯାଇଛି।
ଉଲ୍ଲେଖଯୋଗ୍ୟ ଯେ, ଗତ ଜାନୁୟାରୀ ୨୯ ତାରିଖରେ କଟକ ସହର ମାଲଗୋଦାମ ଓଭରବ୍ରିଜ ଅଞ୍ଚଳରେ ଜଣେ ଚତୁର୍ଥ ଶ୍ରେଣୀରେ ପାଠ ପଢୁଥିବା ୯ ବର୍ଷୀୟ ନାବାଳିକା ଶିଶୁକନ୍ୟାଙ୍କୁ ସ୍କୁଲରୁ ଫେରିବା ବାଟରେ ଅତି ଅମାନୁଷିକ ଭାବରେ ବଳାତ୍କାର କରାଯାଇଥିଲା। ଜନ ଗହଳିପୂର୍ଣ୍ଣ କଟକ ସହରରେ କୋମଳମତି ନାବାଳିକାମାନେ ବଳାତ୍କାରର ଶିକାର ହେବା ଘଟଣା ଅତ୍ୟନ୍ତ ଦୁଃଖଦାୟକ ଓ ମର୍ମସ୍ପର୍ଶୀ ଯାହା ସହରରେ ଉଦ୍ବେଗର ବିଷୟ ହୋଇଛି।
