ନୂଆଦିଲ୍ଲୀ,୨୧ ।୭: ରାଷ୍ଟ୍ରପତି ରାମନାଥ କୋବିନ୍ଦଙ୍କ କାର୍ଯ୍ୟକାଳ ଜୁଲାଇ ୨୫ରେ ଶେଷ ହେବାକୁ ଯାଉଛି । ତାଙ୍କ ସମ୍ମାନରେ ଜୁଲାଇ ୨୩ରେ ଉପରାଷ୍ଟ୍ରପତି ଭେଙ୍କିୟା ନାଇଡୁ ସଂସଦ ଭବନ ସ୍ଥିତ ସେଣ୍ଟ୍ରାଲ ହଲରେ ବିଦାୟୀ ସମାରୋହର ଆୟୋଜନ କରିଛନ୍ତି । ଏହି ସମାରୋହରେ ରାଷ୍ଟ୍ରପତି କୋବିନ୍ଦଙ୍କୁ ଏକ ‘ସ୍ମୃତି ଚିହ୍ନ’ ତଥା ସଂସଦ ସଦସ୍ୟଙ୍କ ଦ୍ୱାରା ହସ୍ତାକ୍ଷର କରାଯାଇଥିବା ଏକ ହସ୍ତାକ୍ଷର ପୁସ୍ତିକା ଉପହାର ଦିଆଯିବ । ଲୋକ ସଭା ଅଧ୍ୟକ୍ଷ ଓମ ବିର୍ଲା, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ସମସ୍ତ କେନ୍ଦ୍ରମନ୍ତ୍ରୀ ଓ ଏମ୍ପି ଏହି କ୍ରାର୍ଯ୍ୟକ୍ରମରେ ଉପସ୍ଥିତ ରହିବେ ।
କାର୍ଯ୍ୟକାଳ ଶେଷ ହେବାର ୨ ଦିନ ପୂର୍ବରୁ ଅର୍ଥାତ୍ ୨୨ ଜୁଲାଇରେ ରାଷ୍ଟ୍ରପତି ରାମନାଥ କୋବିନ୍ଦଙ୍କ ସମସ୍ତ ଆସବାବପତ୍ର ନୂଆ ଘରକୁ ସିପ୍ଟ କରାଯିବ । ହେଲେ ରାଷ୍ଟ୍ରପତି ଭବନରୁ କୋବିନ୍ଦ ୨୫ ଜୁଲାଇରେ ବିଦାୟ ନେବେ । ନୂଆ ରାଷ୍ଟ୍ରପତି ଶପଥ ନେବା ପରେ ।
ରାଷ୍ଟ୍ରପତି ରାମନାଥ କୋବିନ୍ଦଙ୍କ କାର୍ଯ୍ୟକାଳ ଶେଷ ହେବା ପରେ ସେ ଦିଲ୍ଲୀର ୧୨ ଜନପଥ ସ୍ଥିତ ଘରକୁ ସିପ୍ଟ ହେବେ । ଏଠାରେ ପୂର୍ବରୁ ରାମ ବିଳାସ ପାଶୱାନ କିଛିଦିନ ରହୁଥିଲେ । ତାଙ୍କର ପରଲୋକ ପରେ ଏହି ଘରକୁ ଖାଲି କରି ଦିଆଯାଇଛି । ଏହାର ଠିକ୍ ନିକଟରେ ଅର୍ଥାତ୍ ୧୦ ଜନପଥରେ ସୋନିଆ ଗାନ୍ଧୀ ରହୁଛନ୍ତି ।
ଅବସର ପରେ ରାଷ୍ଟ୍ରପତି କୋବିନ୍ଦକୁ ୧.୫ ଲକ୍ଷ ପ୍ରତିମାସ ପେନସନ ମିଳିବ । ଏହା ବ୍ୟତୀତ ୬୦ ହଜାର ଟଙ୍କା ପ୍ରତିମାସ ସେକ୍ରେଟାରିୟଲ ଷ୍ଟାଫ ଓ ଅଫିସ ଖର୍ଚ୍ଚ ପାଇଁ ମିଳିବ । ଏହାସହ ସରକାରଙ୍କ ପକ୍ଷରୁ ଯୋଗାଇ ଦିଆଯାଇଥିବା ଘରର ଭଡା ନିଆଯିବ ନାହିଁ ।
ପୂର୍ବତନ ରାଷ୍ଟ୍ରପତି ଭାବେ କୋବିନ୍ଦଙ୍କୁ ଲ୍ୟାଣ୍ଡ ଲାଇନ, ମୋବାଇଲ ଫୋନ, ବ୍ରଡ ବ୍ୟାଣ୍ଡ ଇଣ୍ଟରନେଟ ଯୋଗାଇ ଦିଆଯିବ । ଏହା ବ୍ୟତୀତ ବିଜୁଳୀ, ପାଣି ବିଲ ବି ପଇଠ କରିବେ ନାହିଁ କୋବିନ୍ଦ । ଡ୍ରାଇଭର ଓ କାର୍ ବି ଯୋଗାଇ ଦିଆଯିବ । ଏହାସହ ସ୍ୱାସ୍ଥ୍ୟ ସୁବିଧା ସମ୍ପୂର୍ଣ୍ଣ ମାଗଣା । ଟ୍ରେନ ଓ ବିମାନ ଯାତ୍ରା ମାଗଣା । ପୂର୍ବତନ ରାଷ୍ଟ୍ରପତିଙ୍କ ସହ ଜଣେ ଅନ୍ୟ ଷ୍ଟାଫଙ୍କୁ ବି ଏହି ସୁବିଧା ମିଳିବ । ୫ ଜଣିଆ ପର୍ସନାଲ ଷ୍ଟାଫ ରହିବେ ଓ ସବୁ ସୁବିଧା ଥିବା ଗାଡି ଯୋଗାଇ ଦିଆଯିବ । ଦିଲ୍ଲୀ ପୋଲିସର ସିକ୍ୟୁରିଟି ଦିଆଯିବ ଓ ୨ ଜଣ ସଚିବ ବି ରହିବେ କୋବନ୍ଦଙ୍କର ।
