ନୂଆଦିଲ୍ଲୀ,୬।୪: ସୁପ୍ରିମ୍କୋର୍ଟର ନୂଆ ପ୍ରଧାନ ବିଚାରପତି ଭାବେ ବିଚାରପତି ଏନ୍.ଭି. ରମନାଙ୍କୁ ରାଷ୍ଟ୍ରପତି ରାମନାଥ କୋବିନ୍ଦ ନିଯୁକ୍ତ କରିଛନ୍ତି। ରମନା ଏପ୍ରିଲ୍ ୨୪ରେ ୪୮ ତମ ପ୍ରଧାନ ବିଚାରପତି ଭାବେ ଶପଥ ନେବେ। ବର୍ତ୍ତମାନର ପ୍ରଧାନ ବିଚାରପତି ଏସ୍.ଏ. ବୋବ୍ଡେ ମାର୍ଚ୍ଚ ୨୪ରେ ରମନାଙ୍କ ନାମ ସୁପାରିଶ କରିଥିଲେ। ଏହାକୁ ରାଷ୍ଟ୍ରପତି ମଞ୍ଜୁରୀ ମିଳିଛି। ଏବେ ରମନା ସୁପ୍ରିମ୍କୋର୍ଟର ଦ୍ୱିତୀୟ ବରିଷ୍ଠ ବିଚାରପତି ଭାବେ କାର୍ଯ୍ୟ କରୁଛନ୍ତି। ରମନାଙ୍କ ପ୍ରକୃତ ନାମ ନାଥାଲାପତି ଭେଙ୍କଟା ରମନା। ସେ ୧୯୫୭ ଅଗଷ୍ଟ ୨୭ରେ ଆନ୍ଧ୍ରପ୍ରଦେଶର କ୍ରିଷ୍ଣା ଜିଲାର ପୋନ୍ନାଭରମ୍ ଗାଁରେ ଜନ୍ମଗ୍ରହଣ କରିଥିଲେ। ସେ ବର୍ଷେ ୪ ମାସ ପାଇଁ ପ୍ରଧାନବିଚାରପତି ଭାବେ କାର୍ଯ୍ୟ କରି ୨୦୨୨ ଅଗଷ୍ଟ ୨୬ରେ ଅବସର ଗ୍ରହଣ କରିବେ। ୧୯୮୩ ଫେବୃୟାରୀ ୧୦ରୁ ସେ ଜଣେ ଆଇନଜୀବୀ ଭାବେ କାମ ଆରମ୍ଭ କରିଥିଲେ। ସୂଚନାଯୋଗ୍ୟ, ଏପ୍ରିଲ୍ ୨୩ରେ ଏସ୍.ଏ. ବୋବ୍ଡେ ଅବସର ଗ୍ରହଣ କରିବେ।
