ଡେରାବିଶ,୧୫ା୩ (ସ୍ବ.ପ୍ର.): ଡେରାବିଶ ବ୍ଲ୍ଳକ ଅଧୀନ ଛୋଟି ଗଁାସ୍ଥିତ ରାମଚଣ୍ଡୀ ବିଦ୍ୟାନିକେତନରେ ବୁଧବାର ପବିତ୍ର କୁମାର ପ୍ରଧାନଙ୍କ ପ୍ରଥମ ଶ୍ରାଦ୍ଧବାର୍ଷିକ ଓ ଛାତ୍ରୀଛାତ୍ରଙ୍କୁ ମେଧାବୃତି କାର୍ଯ୍ୟକ୍ରମ ପାଇଁ ତାଙ୍କ ପରିବାର ପକ୍ଷରୁ ଆୟୋଜନ କରାଯାଇଛି। ଏହି କାର୍ଯ୍ୟକ୍ରମକୁ ବିରୋଧ କରି ଡେରାବିଶ ପଞ୍ଚାୟତ ସମିତି ଅଧ୍ୟକ୍ଷା ପ୍ରଭାତି ମଲିକ ବିଦ୍ୟାନିକେତନର ପ୍ରଧାନ ଶିକ୍ଷକଙ୍କୁ ଏକ ପତ୍ର ମଙ୍ଗଳବାର ପ୍ରଦାନ କରିଛନ୍ତି। ସେ ତାଙ୍କ ପତ୍ରରେ ସ୍ବର୍ଗତ ପ୍ରଧାନଙ୍କର ମୃତ୍ୟୁକୁ ନେଇ ନ୍ୟାୟାଳୟରେ ମାମଲା ବିଚାରାଧୀନ ରହିଛି। ଏଭଳି ଜଣେ ବିବାଦୀୟ ବ୍ୟକ୍ତିଙ୍କ ବାର୍ଷିକ ଉତ୍ସବ ଏକ ସରକାରୀ ଶିକ୍ଷାନୁଷ୍ଠାନରେ ପାଳନ ପାଇଁ କିପରି ଅନୁମତି ପ୍ରଦାନ କରାଗଲା। ଏଭଳି ଜଣେ ବ୍ୟକ୍ତିଙ୍କ ଶ୍ରାଦ୍ଧବାର୍ଷିକ ସ୍ମାରକୀ ବିଦ୍ୟାଳୟ ପରିସର ଭିତରେ ପାଳନ କରାଗଲେ କୋମଳମତି ଛାତ୍ରୀଛାତ୍ରଙ୍କ ଉପରେ ଏହାର କୁପ୍ରଭାବ ପଡ଼ିବା ସହ ଅଧ୍ୟୟନରେ ବ୍ୟାଘାତ ସୃଷ୍ଟି କରିବ ବୋଲି ମଲିକ ତାଙ୍କ ପତ୍ରରେ ଉଲ୍ଲେଖ କରିଛନ୍ତି। କେବଳ ପଞ୍ଚାୟତ ସମିତି ଅଧ୍ୟକ୍ଷା ନୁହନ୍ତି ରାମଚଣ୍ଡୀ ବିଦ୍ୟାନିକେତନର ଜଣେ ପୁରାତନ ଛାତ୍ରୀ ଓ ଛୋଟି ପଞ୍ଚାୟତର ସମିତିସଭ୍ୟା ଭାବେ ଏହି କାର୍ଯ୍ୟକ୍ରମକୁ ତୁରନ୍ତ ବନ୍ଦ କରିବାକୁ ପ୍ରଧାନ ଶିକ୍ଷକଙ୍କୁ ପତ୍ର ଦେବା ସହ ଜିଲା ଶିକ୍ଷାଧିକାରୀ ଏବଂ ଡେରାବିଶ ବ୍ଲକ ଶିକ୍ଷାଧିକାରୀଙ୍କୁ ମଧ୍ୟ ଏହାର ଏକ ନକଲ ପ୍ରଦାନ କରିଛନ୍ତି। ଏ ବିଷୟରେ ବିଦ୍ୟାନିକେତନର ପ୍ରଧାନ ଶିକ୍ଷକ ପ୍ରଦୀପ କୁମାର ନାୟକଙ୍କୁ ପଚାରିବାରୁ ପବିତ୍ରଙ୍କ ସମ୍ପର୍କରେ ସେ ଅବଗତ ନୁହନ୍ତି। ମାତ୍ର ପବିତ୍ର ଶିକ୍ଷାନୁଷ୍ଠାନର ଜଣେ ପୁରାତନ ଛାତ୍ର ହୋଇଥିବାରୁ ତାଙ୍କ ପରିବାର ପକ୍ଷରୁ ଏହି ଉତ୍ସବ ପାଳନ ପାଇଁ ଆଲୋଚନା କରିଥିଲେ ବୋଲି ପ୍ରଧାନ ଶିକ୍ଷକ ନାୟକ କହିଛନ୍ତି। ତେବେ ପଞ୍ଚାୟତ ସମିତି ଅଧ୍ୟକ୍ଷାଙ୍କ ଲିଖିତ ପ୍ରତିବାଦ ପତ୍ର ପାଇବା ପରେ ଜିଲା ଶିକ୍ଷାଧିକାରୀ ଓ ବ୍ଲକ ଶିକ୍ଷାଧିକାରୀଙ୍କ ନିର୍ଦ୍ଦେଶକ୍ରମେ ଏହି ବିଦ୍ୟାନିକେତନରେ ହେବାକୁ ଥିବା କାର୍ଯ୍ୟକ୍ରମକୁ ବାତିଲ କରି ଦିଆଯାଇଥିବା ପ୍ରଧାନ ଶିକ୍ଷକ ନାୟକ ସୂଚନା ଦେଇଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳରେ ସାଧାରଣରେ ଚାପା ଗୁଞ୍ଜରଣ ସୃଷ୍ଟି ହୋଇଛି। ଏ ସମ୍ପର୍କରେ ପବିତ୍ରଙ୍କ ବଡ଼ଭାଇ ବସନ୍ତଙ୍କୁ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ମଧ୍ୟ ତାହା ସମ୍ଭବ ପର ହୋଇ ପାରି ନ ଥିଲା।
ସୂଚନାଯୋଗ୍ୟ, ୨୦୨୨ ମାର୍ଚ୍ଚ ୨୫ରେ କେନ୍ଦ୍ରାପଡ଼ା ବ୍ଲକ ଗୁଲନଗରସ୍ଥିତ ଦଣ୍ଡାମୁଣ୍ଡ ଛକରେ ରହୁଥିବା ବାସଭବନରେ ସନ୍ଦେହଜନକ ଭାବେ ପବିତ୍ରଙ୍କ ମୃତ୍ୟୁ ହୋଇଥିଲା। ଏହାକୁ ସୁପରିକଳ୍ପିତ ହତ୍ୟାକାଣ୍ଡ ବୋଲି ପବିତ୍ରଙ୍କ ପରିବାର ପକ୍ଷରୁ ସଦର ଥାନାରେ ଅଭିଯୋଗ କରାଯାଇଥିଲା। ଏହି ଘଟଣାର ତଦନ୍ତ ଚାଲୁଥିବା ବେଳେ ଉଚ୍ଚ ନ୍ୟାୟାଳୟରେ ପବିତ୍ରଙ୍କ ପରିବାର ପକ୍ଷରୁ କରାଯାଇଥିବା ଆବେଦନକୁ ବିଚାର କରି ପବିତ୍ରଙ୍କ ମୃତ୍ୟୁର କ୍ରାଇମ୍ବ୍ରାଞ୍ଚ ତଦନ୍ତ କରିବାକୁ ନ୍ୟାୟାଳୟଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି।
