ଭୁବନେଶ୍ୱର,୩।୩(ବ୍ୟୁରୋ): ସରକାରୀ ସ୍କୁଲ ପରିସରରେ ନିଜେ ଘର କରି ରହୁଛନ୍ତି ଆଉ ଭଡ଼ା ବି ଦେଇଛନ୍ତି। ଏମିତି କିଛି ଦୃଶ୍ୟ ଦେଖିବାକୁ ମିଳିଛି ରାଜଧାନୀର ଏକ ସ୍କୁଲରେ। ୟୁନିଟ-୪ସ୍ଥିତ ଏମ୍ଏଲ୍ଏ କଲୋନୀରେ ଥିବା ପ୍ରାଥମିକ ବିଦ୍ୟାଳୟ ପରିସରରେ ଦୀର୍ଘବର୍ଷ ହେବ ଜଣେ ପୂର୍ବତନ ପାଚିକା ରହିଆସୁଥିବା ଅଭିଯୋଗ ହୋଇଛି। ପରିବାର ସାଙ୍ଗରେ ନିଜେ ରହିବା ସହ ଘରଭଡ଼ା ମଧ୍ୟ ଦେଇଥିବା କୁହାଯାଉଛି। ବିଦ୍ୟାଳୟ ପରିସରରେ ଥିବା ଆମ୍ବଗଛରୁ ଜଣେ ଛାତ୍ର ଆମ୍ବ ତୋଳିବା ବେଳେ ଭଡ଼ାଟିଆଙ୍କ ସହ ଯୁକ୍ତିତର୍କରୁ ଏହି ଗୁମର ପଦାକୁ ଆସିଛି।
ମିଳିଥିବା ସୂଚନାନୁସାରେ, ବୁଧବାର ଉକ୍ତ ବିଦ୍ୟାଳୟର ଜଣେ ଛାତ୍ର ବିଦ୍ୟାଳୟ ପରିସରରେ ଥିବା ଏକ ଗଛରୁ ଆମ୍ବ ତୋଳିବା ସମୟରେ ସେଠାରେ ରହୁଥିବା ଜଣେ ଭଡ଼ାଟିଆ ପାଟି କରିଥିଲେ। ଏପରିକି ଛାତ୍ରଜଣକୁ ସେ ମାଡ଼ ମାରିଥିବା ଅଭିଯୋଗ ହୋଇଛି। ଏହାକୁ ନେଇ ଅଭିଭାବକମାନେ ତାତିଥିଲେ। ବିଦ୍ୟାଳୟ ପରିସରରେ ବେଆଇନ ଭାବେ ରହୁଥିବା ପୂର୍ବତନ ପାଚିକା ଏବଂ ଭଡ଼ାଟିଆଙ୍କୁ ବିଦା ନ କଲେ ପାଠପଢ଼ା ହୋଇପାରିବନି ବୋଲି ଚେତାଇ ଦେଇଥିଲେ। ଫଳରେ ପିଲା ଏବଂ ଅଭିଭାବକମାନେ ଗୁରୁବାର ପ୍ରାର୍ଥନା ପରେ ଶେଣୀଗୃହ ପରିବର୍ତ୍ତେ ବାହାରେ ବସିଥିଲେ। ଖବରପାଇ ଘଟଣାସ୍ଥଳରେ ଖାରବେଳ ନଗର ଥାନା ପୋଲିସ ପହଞ୍ଚତ୍ଥିଲା। ଉତ୍ତ୍ୟକ୍ତ ଅଭିଭାବକଙ୍କୁ ବୁଝାଶୁଝା କରିବା ସହ ପୂର୍ବତନ ପାଚିକାଙ୍କୁ ଥାନାକୁ ନେଇଥିଲା। ପୂର୍ବତନ ପାଚିକାଙ୍କ ପୁଅ ଓ ଭଡ଼ାଟିଆ ବିଦ୍ୟାଳୟ ପରିସରରେ ଦାଦାଗିରି କରୁଥିବା ଛାତ୍ରୀଛାତ୍ର ଓ ଅଭିଭାବକ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ପୋଲିସ ଏକ ମାମଲା ରୁଜୁ କରିବା ସହ ନୋଟିସ୍ ଦେଇ ଅଟକ ପୂର୍ବତନ ପାଚିକାଙ୍କୁ ଛାଡ଼ି ଦେଇଥିବା ଜଣାପଡ଼ିଛି।
ଏ ସମ୍ପର୍କରେ ବିଦ୍ୟାଳୟ ପ୍ରଧାନଶିକ୍ଷୟିତ୍ରୀ ଏସ୍. ରାଜେଶ୍ବରୀ ରାଓ କହିଛନ୍ତି, ସେ ୨୦୨୧ ନଭେମ୍ବର ୨୬ରୁ ସେଠାରେ ଯୋଗଦେବା ଦିନଠୁ ବିଦ୍ୟାଳୟ ପରିସରରେ ଗୋଟେ ପରିବାର ବେଆଇନ ଭାବେ ରହିଆସୁଛି। ଫଳରେ ବିଦ୍ୟାଳୟରେ ଶୈକ୍ଷିକ ବାତାବରଣ ନଷ୍ଟ ହେଉଛି। ଏନେଇ ବିଇଓଙ୍କୁ ଅବଗତ କରାଯାଇଥିଲା। ଗତ ଡିସେମ୍ବର ପହିଲାରୁ ସେଠାରେ ଆଉ ଏକ ପରିବାର ରହୁଛନ୍ତି। ବିଭିନ୍ନ ସମୟରେ ସେମାନେ ପିଲାମାନଙ୍କୁ ଧମକ୍ଚମକ ଦେଉଛନ୍ତି। ମାସକ ଭିତରେ ଘର ଛାଡ଼ିବାକୁ ତାଙ୍କୁ ଆମେ ନୋଟିସ କରିଥିଲୁ। ହେଲେ ନୋଟିସକୁ ସେମାନେ ଚିରିଦେଲେ। ବିଦ୍ୟାଳୟରେ ୯୬ ଛାତ୍ରୀଛାତ୍ର ପଢ଼ୁଥିବାବେଳେ ବୁଧବାର ଜଣେ ଛାତ୍ରଙ୍କୁ ଆମ୍ବ ତୋଳିବାରୁ ମାଡ଼ ମରାଯାଇଥିଲା। ଯାହାକୁ ନେଇ ଅଭିଭାବକମାନେ ଉତ୍ତ୍ୟକ୍ତ ହୋଇଥିଲେ। ତେବେ ମାମଲା ଥାନାକୁ ଯିବା ପରେ ୧୫ ଦିନ ମଧ୍ୟରେ ଘର ଛାଡ଼ିଦେବେ ବୋଲି ସେମାନେ ଲିଖିତ ଆକାରରେ ଜଣାଇଛନ୍ତି।
ଅନ୍ୟପକ୍ଷରେ ପୂର୍ବତନ ପାଚିକା ରହୁଥିବା ଘରେ ରାଜୀବ ଆବାସ ଟ୍ୟାଗ ଲାଗିଛି। ରାଜୀବ ଆବାସ ଯୋଜନାରେ ସେଠାରେ ବିଏମ୍ସି ତାଙ୍କୁ ଘର ଦେଇଥିବା ସମ୍ପୃକ୍ତ ପୂର୍ବତନ ପାଚିକା କହିଛନ୍ତି। ସମ୍ପୃକ୍ତ ପାଚିକା ଓ ତାଙ୍କ ପରିବାର ରହୁଥିବା ଏହି ବେଆଇନ ଘରେ ‘ରାଜୀବ ଆବାସ ଯୋଜନା’ର ଟ୍ୟାଗ କିପରି ଲାଗିଲା ଏବଂ ସ୍କୁଲ ପରିସରରେ ଘର କରି ରହିବାକୁ କିଏ ଅନୁମତି ଦେଲା ତାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି।
