ଦୁବାଇ, ୧୫।୯: ଅଷ୍ଟ୍ରେଲିଆର ପୂର୍ବତନ ମହାନ ଲେଗ୍-ସ୍ପିନର ଶେନ୍ ଓ୍ବର୍ନ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ଟିମ୍ ରାଜସ୍ଥାନ ରୟାଲ୍ସକୁ ପୁଣିଥରେ ଫେରିଛନ୍ତି। ଓ୍ବର୍ନଙ୍କୁ ରାଜସ୍ଥାନ ଦଳର ପରାମର୍ଶଦାତା ଭାବେ ନିଯୁକ୍ତ କରାଯାଇଛି। ପୂର୍ବରୁ ସେ ମଧ୍ୟ ଦଳର ବ୍ରାଣ୍ଡ୍ ଆମ୍ବାସାଡ଼ର ଭାବେ ଦାୟିତ୍ୱ ତୁଲାଉଛନ୍ତି। ୨୦୦୮ରେ ଆଇପିଏଲ୍ ଆରମ୍ଭ ହେବ ଦିନଠାରୁ ଅଷ୍ଟ୍ରେଲିଆର ଏହି କିମ୍ବଦନ୍ତୀ କ୍ରିକେଟର୍ ରାଜସ୍ଥାନ ସହ ଜଡ଼ିତ ରହିଛନ୍ତି। ଓ୍ବର୍ନଙ୍କ ନେତୃତ୍ୱରେ ରାଜସ୍ଥାନ ୨୦୦୮ରେ ଆଇପିଏଲ୍ର ଉଦ୍ଘାଟନୀ ସଂସ୍କରଣ ଟାଇଟଲ୍ ଜିତିବାର ସୌଭାଗ୍ୟ ଲାଭ କରିଥିଲା। ରାଜସ୍ଥାନର ମୁଖ୍ୟ କୋଚ୍ ଆଣ୍ଡ୍ରିଉ ମ୍ୟାକ୍ଡୋନାଲ୍ଡଙ୍କ ସହ ଓ୍ବର୍ନ ଏବେ ଏକାଠି କାମ କରିବେ। ନୂଆ ନିଯୁକ୍ତିକୁ ନେଇ ଓ୍ବର୍ନ କହିଛନ୍ତିି, ‘ରାଜସ୍ଥାନ ମୋ ଟିମ୍ ଓ ମୋ ପରିବାର। ଯେଉଁ ଫ୍ରାଞ୍ଚାଇଜକୁ ମୁଁ ଏତେ ଭଲ ପାଉଛି , ତାହା ପାଇଁ ସମସ୍ତ ସ୍ତରରେ କାମ କରିବାକୁ ପ୍ରସ୍ତୁତ ରହିଛି।’ ଏଠାରେ ପ୍ରକାଶଯୋଗ୍ୟ, ଆଇପିଏଲ୍ ସିଜନ-୧୩ ଆସନ୍ତା ୧୯ରୁ ୟୁଏଇରେ ଆରମ୍ଭ ହେବ।
