ନୂଆଦିଲ୍ଲୀ,୨୮।୧୨ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମା‘ ହୀରାବେନଙ୍କ ସ୍ବାସ୍ଥ୍ୟ ଖରାପ ହେବା ନେଇ କଂଗ୍ରେସ ଏମ୍ପି ରାହୁଲ ଗାନ୍ଧୀ ଭାବୁକ ଟୁଇଟ କରିଛନ୍ତି। ରାହୁଲ ଲେଖିଛନ୍ତି, ’ମା ଏବଂ ପୁଅ ମଧ୍ୟରେ ପ୍ରେମ ଅନନ୍ତ ଏବଂ ଅମୂଲ୍ୟ ଅଟେ। ମୋଦି ଜୀ, ମୋର ପ୍ରେମ ଏବଂ ସମର୍ଥନ ଏହି କଠିନ ସମୟରେ ଆପଣଙ୍କ ସହିତ ଅଛି। ମୁଁ ଆଶା କରେ ଆପଣଙ୍କ ମା ଶୀଘ୍ର ଭଲ ହୋଇଯିବେ। ରାହୁଲଙ୍କ ଭାବୁକ ଟୁଇଟ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମା ହୀରାବେନ ମୋଦିଙ୍କ ସ୍ବାସ୍ଥ୍ୟ ଅବସ୍ଥା ଖରାପ ହେବା ପରେ ତାଙ୍କୁ ବୁଧବାର ଅହମଦାବାଦର ଏକ ଡାକ୍ତରଖାନାରେ ଭର୍ତ୍ତି କରାଯାଇଛି।
ଏଥି ସହ ୟୁଏନ ମେହେଟା ଇନଷ୍ଟିଚ୍ୟୁଟ ଅଫ କାର୍ଡିଓଲୋଜି ଆଣ୍ଡ ରିସର୍ଚ୍ଚ ସେଣ୍ଟର ଏକ ବିବୃତ୍ତି ଜାରି କରି କହିଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମା ହୀରାବେନଙ୍କ ସ୍ବାସ୍ଥ୍ୟାବସ୍ଥା ସ୍ଥିର ରହିଛି। ପ୍ରଧାନମନ୍ତ୍ରୀ ମଧ୍ୟ ଅହମ୍ମଦାବାଦ ଯାଇଛନ୍ତି। ସେ ବିମାନବନ୍ଦରରୁ ସିଧା ଡାକ୍ତରଖାନା ଯିବେ।
ହୀରାବେନଙ୍କୁ ୯୯ ବର୍ଷ ବୟସ। ଜୁନ ମାସରେ ୯୯ ତମ ଜନ୍ମଦିନରେ ପ୍ରଧାନମନ୍ତ୍ରୀ ମା‘ଙ୍କୁ ଭେଟିବାକୁ ଯାଇଥିଲେ। ଏହି ଅବସରରେ ପ୍ରଧାନମନ୍ତ୍ରୀ ’ମା’ ନାମକ ଏକ ଭାବପ୍ରବଣ ବ୍ଲଗ ମଧ୍ୟ ଲେଖିଥିଲେ। ପ୍ରଧାନମନ୍ତ୍ରୀ ପ୍ରାୟତଃ ତାଙ୍କ ମା ସହିତ ଥିବା ଭାବପ୍ରବଣତା ବିଷୟରେ କଥାବାର୍ତ୍ତା କରନ୍ତି । ନିକଟରେ ଗୁଜରାଟ ବିଧାନସଭା ନିର୍ବାଚନ ପାଇଁ ପ୍ରଚାର ସମୟରେ ମଧ୍ୟ ପ୍ରଧାନମନ୍ତ୍ରୀ ତାଙ୍କ ମାଙ୍କୁ ଭେଟିବାକୁ ଯାଇଥିଲେ। ସେତେବେଳେ ପ୍ରଧାନମନ୍ତ୍ରୀ ମା‘ଙ୍କ ସହ ଚା ’ପିଇବାର ଫଟୋ ସୋସିଆଲ ମିଡିଆରେ ବହୁ ଚର୍ଚ୍ଚିତ ହୋଇଥିଲା।
