ନୂଆଦିଲ୍ଲୀ,୨୬।୬ : ଦିଲ୍ଲୀରେ କେନ୍ଦ୍ର ସରକାରଙ୍କ ଅଧ୍ୟାଦେଶ ବିରୁଦ୍ଧରେ ବିରୋଧୀ ଦଳଙ୍କଠାରୁ ନିରନ୍ତର ସମର୍ଥନ ଲୋଡୁଥିବା ଆମ ଆଦମୀ ପାର୍ଟି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛି। ଦିଲ୍ଲୀ ଏବଂ ପଞ୍ଜାବର ଶାସକ ଦଳ ଏଏପି କହିଛି ରାହୁଲ ଗାନ୍ଧୀଙ୍କୁ ତୃତୀୟ ଥର ପାଇଁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବରେ ପ୍ରୋଜେକ୍ଟ କରିବା ଉଚିତ ନୁହେଁ। କଂଗ୍ରେସ ଏଭଳି ଭୁଲରୁ ଦୂରେଇ ରହିବା ଆବଶ୍ୟକ। ଏଏପି ମୁଖପାତ୍ର ପ୍ରିୟଙ୍କା କକ୍କର ଏକ ଟୁଇଟରେ ଏହା କହିଛନ୍ତି।
ସେ ଟୁଇଟରେ ଲେଖିଛନ୍ତି, ଯଦି ଦେଶକୁ ବଞ୍ଚାଇବାକୁ ପଡ଼ିବ, ତେବେ ସର୍ବପ୍ରଥମେ କଂଗ୍ରେସ କହିବା ଉଚିତ୍ ଦଳ ରାହୁଲ ଗାନ୍ଧୀଙ୍କ ପାଇଁ ତୃତୀୟ ଥର ପାଇଁ ବାଜି ଲଗାଇବ ନାହିଁ ଏବଂ ସମଗ୍ର ବିରୋଧୀଙ୍କ ଉପରେ ଏହି ଚାପ ପକାଇବ ନାହିଁ। ବିରୋଧୀ ଦେଶର ସ୍ବାର୍ଥ ପାଇଁ ଏବଂ ସମ୍ବିଧାନକୁ ସୁରକ୍ଷା ଦେବାକୁ ଏକଜୁଟ ହୋଇଛନ୍ତି। ଏଏପି ମୁଖପାତ୍ରଙ୍କ ବିବୃତ୍ତିରୁ ଏହା ସ୍ପଷ୍ଟ ହୋଇଛି ରାହୁଲ ଗାନ୍ଧୀଙ୍କୁ ତୃତୀୟ ଥର ପାଇଁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବରେ ଦେଖିବାକୁ ଏଏପି ଚାହୁଁନାହିଁ। ପ୍ରିୟଙ୍କା କହିଛନ୍ତି ରାହୁଲଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ ଭାବେ ଗ୍ରହଣ କରିବାକୁ କଂଗ୍ରେସ ବିରୋଧୀ ଦଳଙ୍କ ଉପରେ ଚାପ ପକାଉଛି।
କଂଗ୍ରେସ ୨୦୧୪ ଏବଂ ୨୦୧୯ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବନାମ ରାହୁଲ ଗାନ୍ଧୀଙ୍କ ଲୋକସଭା ନିର୍ବାଚନ ଲଢ଼ିଥିଲା, ଯେଉଁଥିରେ କଂଗ୍ରେସ ପରାଜୟ ବରଣ କରିଥିଲା। ଏଭଳି ପରିସ୍ଥିତିରେ କେତେକ ରାଜନୈତିକ ଦଳ ଅନୁମାନ କରୁଛନ୍ତି ରାହୁଲ ଗାନ୍ଧୀଙ୍କୁ ତୃତୀୟ ଥର ପାଇଁ ପ୍ରଧାନମନ୍ତ୍ରୀ ରୂପେ ପ୍ରୋଜେକ୍ଟ କରିବା ଦ୍ୱାରା କେବଳ କଂଗ୍ରେସର କ୍ଷତି ହେବ ନାହିଁ, ବରଂ ତାକୁ ସମର୍ଥନ କରୁଥିବା ବିରୋଧୀ ଦଳ ମଧ୍ୟ କ୍ଷତି ସହିବେ।
ବିହାରର ରାଜଧାନୀ ପାଟନାରେ ଆୟୋଜିତ ବିରୋଧୀ ଦଳର ଏକତା ବୈଠକ ପରେ ପ୍ରିୟଙ୍କା କକ୍କରଙ୍କ ଏହି ଟୁଇଟ ସାମ୍ନାକୁ ଆସିଛି। ଯେଉଁଥିରେ ଏଏପି ଏହାର ଆଭିମୁଖ୍ୟ ସ୍ପଷ୍ଟ କରିଛି। ଯଦି ସଂସଦରେ ଦିଲ୍ଲୀ ଅର୍ଡିନାନ୍ସକୁ କଂଗ୍ରେସ ବିରୋଧ ନ କରେ, ତେବେ ଏଏପି କଂଗ୍ରେସ ନେତୃତ୍ୱାଧୀନ ମିଳିତ ମେଣ୍ଟର ଅଂଶ ହେବ ନାହିଁ।
