ନୂଆଦିଲ୍ଲୀ,୨୧।୩: ଲଣ୍ଡନରେ ରାହୁଲ ଗାନ୍ଧୀଙ୍କ ଭାଷଣକୁ ନେଇ ଭାରତରେ ବିବାଦ ଦେଖାଦେଇଛି। ନିଜ ମନ୍ତବ୍ୟ ପାଇଁ ରାହୁଲ କ୍ଷମା ମାଗନ୍ତୁ ବୋଲି ଭାଜପା ଦାବି କରୁଛି। ଭାଜପାର ଜାତୀୟ ମୁଖପାତ୍ର ସମ୍ବିତ ପାତ୍ର ଏକ ଖବରଦାତା ସମ୍ମିଳନୀ କରି ରାହୁଲଙ୍କ କ୍ଷମା ପ୍ରାର୍ଥନା ଉପରେ ଜୋର ଦେଇଛନ୍ତି। ପାତ୍ର କହିଛନ୍ତି, ରାହୁଲ ଗାନ୍ଧୀଙ୍କୁ କ୍ଷମା ମାଗିବାକୁ ପଡ଼ିବ। ସେ କ୍ଷମା ନ ମାଗିବା ପର୍ଯ୍ୟନ୍ତ ଆମେ ଆମର ଦାବି ଜାରି ରଖିବୁ।
ଭାଜପା ରାହୁଲ ଗାନ୍ଧୀଙ୍କୁ ପ୍ରତିଦିନ କ୍ଷମା ମାଗିବାକୁ କାହିଁକି କହୁଛି ବୋଲି ପ୍ରଶ୍ନରେ ସମ୍ବିତ କହିଛନ୍ତି, ଲଣ୍ଡନରେ ଯଦି ରାହୁଲ ଗାନ୍ଧୀ ଏଭଳି ମନ୍ତବ୍ୟ ଦେବେ, ତେବେ ଏହା ନିନ୍ଦନୀୟ ବିଷୟ। ଏହା ଏକ ସମସ୍ୟା ନୁହେଁ, ଏକ ଷଡ଼ଯନ୍ତ୍ର। ରାହୁଲ ଗାନ୍ଧୀ ହେଉଛନ୍ତି ଆଜିର ରାଜନୀତିର ମୀର ଜାଫର। ଆଜିର ମୀର ଜାଫରଙ୍କୁ କ୍ଷମା ମାଗିବାକୁ ପଡିବ।
ନିକଟରେ ରାହୁଲ ଗାନ୍ଧୀ ବ୍ରିଟେନ ଗସ୍ତ କରିଥିଲେ। ସେ କେମ୍ବ୍ରିଜ ୟୁନିଭରସିଟି ଏବଂ ବ୍ରିଟେନର ସଂସଦ କମ୍ପ୍ଲେକ୍ସରେ ଆୟୋଜିତ କାର୍ଯ୍ୟକ୍ରମକୁ ସମ୍ବୋଧିତ କରିଥିଲେ। ରାହୁଲ ନିଜ ସମ୍ବୋଧନରେ କହିଥିଲେ, ଭାରତରେ ଗଣତନ୍ତ୍ର ବିପଦରେ ଅଛି। ବିରୋଧୀ ଦଳର ନେତାମାନଙ୍କୁ ସଂସଦରେ କହିବାକୁ ଅନୁମତି ଦିଆଯାଉ ନାହିଁ ଏବଂ ସେମାନଙ୍କର ମାଇକ ବନ୍ଦ ହୋଇଯାଇଛି। ବିଦେଶରେ ଦେଇଥିବା ଏହି ବିବୃତ୍ତି ପାଇଁ ଭାଜପା ରାହୁଲ ଗାନ୍ଧୀଙ୍କୁ ଘେରିଛି।
