ରାୟପୁର, ୧୬ା୬ : ୫ ଦିନର ଅକ୍ଲାନ୍ତ ପରିଶ୍ରମ ପରେ ମଙ୍ଗଳବାର ବୋରଓ୍ବେଲରୁ ଉଦ୍ଧାର ହୋଇଥିବା ଛତିଶଗଡ଼ର ରାହୁଲ ସାହୁ (୧୧) ବିଳାସପୁର ଆପୋଲୋ ହସ୍ପିଟାଲ ଆଇସିୟୁରେ ଚିକିତ୍ସିତ ହେଉଛନ୍ତି। ବହୁ ପ୍ରତିକୂଳ ପରିସ୍ଥିତିର ସାମ୍ନା କରି ୮୦ ଫୁଟ୍ ଗାତରେ ପ୍ରାୟ ୧୦୬ ଘଣ୍ଟା ରହିବା ପରେ ତାଙ୍କ ଦେହରେ ସାମାନ୍ୟ ସଂକ୍ରମଣ ଦେଖାଦେଇଛି। ତାଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ଏବଂ ଶରୀରର ସମସ୍ତ ଅଙ୍ଗପ୍ରତ୍ୟଙ୍ଗ ଠିକ୍ ଭାବେ କାର୍ଯ୍ୟ କରୁଛି। ସମ୍ପୂର୍ଣ୍ଣ ସୁସ୍ଥ ହେବା ପାଇଁ ତାଙ୍କୁ ପ୍ରାୟ ସପ୍ତାହେ ଲାଗିପାରେ ବୋଲି ଡାକ୍ତର କହିଛନ୍ତି।
ମୁଖ୍ୟମନ୍ତ୍ରୀ ଭୂପେଶ ବଘେଲ ବୁଧବାର ରାହୁଲଙ୍କୁ ଡାକ୍ତରଖାନାରେ ଭେଟି ସ୍ବାସ୍ଥ୍ୟାବସ୍ଥା ପଚାରି ବୁଝିବା ସହ ତାଙ୍କୁ ସାହସୀ ବାଳକ ଆଖ୍ୟା ଦେଇଛନ୍ତି। ଏଥିସହ ରାହୁଲଙ୍କ ସମସ୍ତ ଚିକିତ୍ସା ଓ ପାଠପଢ଼ା ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ମାନସିକ ଭାବେ ଦିବ୍ୟାଙ୍ଗ ସତ୍ତ୍ୱେ ରାହୁଲ ସାଇକେଲ ଚାଳନା, ପାଣିରେ ପହଁରିବା, ଢୋଲ-ତାବଲା ବଜାଇବାରେ ଧୂରନ୍ଧର ବାପା ରାମ କୁମାର ସାହୁ କହିଛନ୍ତି। ରାହୁଲଙ୍କ ଇଚ୍ଛା ଶକ୍ତି ହିଁ ବୋରଓ୍ବେଲ ମଧ୍ୟରେ ତିଷ୍ଠି ରହିବାରେ ସହାୟକ ହୋଇଥିବା ତାଙ୍କ ବାପା ପ୍ରକାଶ କରିଛନ୍ତି।
ଜିଲା ମାଲଖରୋଡା ବ୍ଲକ୍ ପିହରିଡ ଗ୍ରାମର ଏକ ବୋରଓ୍ବେଲରେ ଗତ ଶୁକ୍ରବାରଠାରୁ ଫସି ରହିଥିବା ରାହୁଲଙ୍କୁ ଉଦ୍ଧାର କରିବା ରେସ୍କ୍ୟୁ ଟିମ୍ ପାଇଁ ବେଶ୍ ଚ୍ୟାଲେଞ୍ଜପୂର୍ଣ୍ଣ ଥିଲା। ବିଭିନ୍ନ ଏଜେନ୍ସିର ୫୦୦ରୁ ଊର୍ଦ୍ଧ୍ୱ କର୍ମଚାରୀ ରାହୁଲଙ୍କୁ ଉଦ୍ଧାର ପାଇଁ ଅବିଶ୍ରାନ୍ତ ଉଦ୍ୟମ କରିଥିଲେ। ପ୍ରାୟ ୧୦୬ ଘଣ୍ଟାର ପରିଶ୍ରମ ପରେ ତାଙ୍କୁ ସଫଳତାର ସହ ବୋରଓ୍ବେଲରୁ ବାହାରକୁ ଅଣାଯାଇଥିଲା। ଏଥିପାଇଁ ଏନ୍ଡିଆର୍ଏଫ୍ ସମେତ ସମ୍ପୂର୍ଣ୍ଣ ଉଦ୍ଧାରକାରୀ ଟିମ୍କୁ ଦେଶବ୍ୟାପୀ ପ୍ରଂଶସାର ସୁଅ ଛୁଟିଛି। ବାପା ରାମ କୁମାର କହିଛନ୍ତି, ରାହୁଲ ଠିକ୍ ଭାବେ କଥା କହିପାରନ୍ତି ନାହିଁ। କେବଳ ମା’ ବାପା ଶବ୍ଦକୁ ସେ ଉଚ୍ଚାରଣ କରିପାରନ୍ତି।
ବିଭିନ୍ନ ସାଙ୍କେତିକ ଢଙ୍ଗରେ ସେ ଯୋଗାଯୋଗ କରିଥାନ୍ତି। ନଈରେ ପହଁରିବା, ତାବଲା ବଜାଇବା ରାହୁଲଙ୍କ ପ୍ରିୟ କାମ। ପୂର୍ବରୁ ରାହୁଲଙ୍କୁ ଗ୍ରାମର ଏକ ସ୍କୁଲରେ ଭର୍ତ୍ତି କରାଯାଇଥିଲେ ହେଁ ପରେ ଏକ ସ୍ବତନ୍ତ୍ର ବିଦ୍ୟାଳୟରେ ତାଙ୍କ ନାମ ଲେଖାଯାଇଥିଲା। ରାମ କୁମାରଙ୍କ ଦୁଇ ପୁଅ ଥିବାବେଳେ ରାହୁଲ ହେଉଛନ୍ତି ଜ୍ୟେଷ୍ଠ ସନ୍ତାନ।
