ପାଟନା,୨୮ ।୧୦: ବିହାର ବିଧାନସଭା ପାଇଁ ବୁଧବାର ପ୍ରଥମ ପର୍ଯ୍ୟାୟ ଭୋଟ ଗ୍ରହଣ କରାଯାଉଛି । ଇତିମଧ୍ୟରେ ଦ୍ୱିତୀୟ ତଥା ତୃତୀୟ ପର୍ଯ୍ୟାୟ ମତଦାନରେ ଭୋଟରଙ୍କୁ ନିଜ ଆଡକୁ ଆକର୍ଷତ କରିବାକୁ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ସେଠାରେ ନିର୍ବାଚନ ରାଲିରେ ଯୋଗ ଦେଇଛନ୍ତି । ପ୍ରଥମେ ସେ ପଶ୍ଚିମ ଚମ୍ପାରନରେ ଏକ ରାଲିରେ ଯାଗ ଦେଇଛନ୍ତି । ସେଠାରେ ସେ ଜନତାଙ୍କୁ ସମ୍ବୋଧିତ କରିବା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଖୁବ୍ ବର୍ଷିଛନ୍ତି । ରାହୁଲ କହିଛନ୍ତି ମୋଦି କିଛି ବର୍ଷ ପୂର୍ବରେ ଏଠାକୁ ଆସିଥିଲେ । ସେତେବେଳେ ସେ କହିଥିଲେ ଏହା ଆଖୁ ଉତ୍ପାନଦନ ଅଞ୍ଚଳ । ତେଣୁ ଏଠାରେ ଏକ ଚିନି କଳ ଚାଲୁ କରାଯିବ । ଆର ଥରକୁ ଆସିଲେ ମୁଁ ଆପଣମାନଙ୍କ ସହ ଏହି ଚିନିରେ ଚା ମିଶାଇ ଏକାଠି ପିଇବି । ହେଲେ ଏହା କ’ଣ ସମ୍ଭବ ହୋଇଛି ବୋଲି ରାହୁଲ ପ୍ରଶ୍ନ କରିଛନ୍ତି । ସେ ଆହୁରି ମଧ୍ୟ କହିଛନ୍ତି କରୋନା ମହାମାରୀକୁ ନେଇ ଦେଶରେ ଚାଲିଥିବା ଲକ୍ଡାଉନ ସମୟରେ ମୋଦି ପ୍ରବାସୀ ଶ୍ରମିକଙ୍କୁ ପାଦରେ ଚାଲି ଚାଲି ଘରକୁ ଫେରିବାକୁ ବାଧ୍ୟ କରିଛନ୍ତି । କାରଣ ସେହି ସମୟରେ ମୁଁ ଯେତେବେଳେ ପ୍ରବାସୀ ଶ୍ରମିକଙ୍କୁ ଭେଟିଥିଲି ସେମାନେ କହିଥିଲେ ସରକାର ଆମ ପାଇଁ କୌଣସି ବ୍ୟବସ୍ଥା କରି ନାହାଁନ୍ତି । ହେଲେ ଆମକୁ ଆଉ କିଛି ସମୟ ଦେଇଥିଲେ ହୁଏତ ଆମେ ଆମ ବ୍ୟବସ୍ଥା କରି ଥାଆନ୍ତୁ ବୋଲି ଶ୍ରମିକମାନେ ଲୁହଭରା ଆଖି ଓ କୋହଭରା କଣ୍ଠରେ କହିଥିଲେ । ମୋଦି ତଥା ତାଙ୍କ ଦଳ ଅର୍ଥାତ୍ ଭାରତୀୟ ଜନତା ପାର୍ଟି(ଭାଜପା) ବାରମ୍ବାର ଜନତାଙ୍କୁ ମିଛ କହି ଆସୁତିବା ବେଳେ ଏଥର ଜନତା ନିଶ୍ଚିତ ଭାବେ ତାଙ୍କୁ ତଡି ଦେବେ ବୋଲି ରାହୁଲ କହିଛନ୍ତି । ବାଲ୍ମିକି ନଗରରେ ଏକ ସଭାରେ ଉଦ୍ବୋଧନ ଦେବା ସମୟରେ ରାହୁଲ କହିଛନ୍ତି ଲକ୍ ଡାଉନରେ କେବଳ ଗରିବ, କୃଷକ ଓ କ୍ଷୁଦ୍ର ବ୍ୟବସାୟୀଙ୍କ ସ୍ୱପ୍ନକୁ ମୋଦି ସରକାର ଭାଙ୍ଗି ଦେଇଛନ୍ତି ।
