ନୂଆଦିଲ୍ଲୀ, ୨।୧୦:ଉତ୍ତରପ୍ରଦେଶ ହାଥ୍ରାସରେ ହୋଇଥିବା ଗଣବଳାତ୍କାର ଘଟଣାର ପୀଡ଼ିତାଙ୍କ ପରିବାରକୁ ଭେଟିବାକୁ ଯାଉଥିବା କଂଗ୍ରେସ ନେତା ରାହୁଲ୍ ଗାନ୍ଧୀ ଏବଂ ଭଉଣୀ ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ଅଧାବାଟରେ ଫେରିବାକୁ ପଡ଼ିଛି। ରାହୁଲ୍ ଏବଂ ପ୍ରିୟଙ୍କା ନିଜର ଦଳୀୟ କର୍ମୀଙ୍କ ସହ ଦିଲ୍ଲୀ-ନଏଡ଼ା ମୁଖ୍ୟରାସ୍ତାରେ ହାଥ୍ରାସ ଯାଉଥିବାବେଳେ ପୋଲିସ ସେମାନଙ୍କୁ ଅଟକାଇଥିଲା। ବଡ଼ ଜନସମାଗମଭଳି ପରିସ୍ଥିତି ସୃଷ୍ଟି କରିବା ଅଭିଯୋଗରେ ପୋଲିସ ଉଭୟଙ୍କୁ ନିଜ ହେପାଜତକୁ ନେଇଥିଲା। ଫଳରେ ପୀଡ଼ିତାଙ୍କ ପରିବାର ସଦସ୍ୟଙ୍କୁ ଉଭୟ ରାହୁଲ କିମ୍ବା ପ୍ରିୟଙ୍କା ଭେଟି ପାରି ନାହାନ୍ତି। ଅପରପକ୍ଷରେ ପୋଲିସ ଅଟକାଇବା ବେଳେ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏପରି କି ଠେଲାପେଲାରେ ରାହୁଲ ତଳେ ପଡ଼ିଯାଇଥିଲେ। ଉତ୍ତରପ୍ରଦେଶ ସରକାରଙ୍କ ନିର୍ଦ୍ଦେଶରେ ପୋଲିସ ରାହୁଲ୍ଙ୍କୁ ଜାଣିଶୁଣି ଧକ୍କା ମାରି ତଳେ ପକାଇ ଦେଇଛି ବୋଲି କଂଗ୍ରେସ ପକ୍ଷରୁ ଅଭିଯୋଗ ହୋଇଛି। ରାହୁଲ ଏବଂ ପ୍ରିୟଙ୍କାଙ୍କ ପ୍ରତି ପୋଲିସର ଏଭଳି ବ୍ୟବହାରକୁ ନେଇ ଅନ୍ୟ ବିରୋଧୀଦଳଗୁଡ଼ିକ ମଧ୍ୟ ଯୋଗୀ ସରକାରଙ୍କୁ ଟାର୍ଗେଟ କରିଛନ୍ତି। ବିଏସ୍ପି ନେତ୍ରୀ ମାୟାବତୀ ଏବଂ ଟିଏମ୍ସି ନେତ୍ରୀ ମମତା ବାନାର୍ଜୀ ଏଭଳି ଘଟଣାକୁ ତୀବ୍ର ସମାଲୋଚନା କରିଛନ୍ତି।
ଗୁରୁବାର ରାହୁଲ୍ ଏବଂ ତାଙ୍କ ଭଉଣୀ ପ୍ରିୟଙ୍କା ହାଥ୍ରାସ ଯାଉଥିଲେ। ତେବେ ସେଠାରେ କୌଣସି ପ୍ରକାର ଜନସମାଗମ ଏବଂ ଅପ୍ରୀତିକର ପରିସ୍ଥିତିକୁ ଏଡ଼ାଇବାକୁ ପୋଲିସ ଉଭୟଙ୍କ ଗାଡ଼ିକୁ ଅଧା ବାଟରେ ଅଟକାଇଥିଲା। ପରେ ଉଭୟ ରାହୁଲ୍ ଏବଂ ପ୍ରିୟଙ୍କା ଚାଲିଚାଲି ପୀଡ଼ିତାଙ୍କ ପରିବାରକୁ ଭେଟିବାକୁ ବାହାରିଥିଲେ। ଅଧାବାଟରେ ପୋଲିସ ସେମାନଙ୍କୁ ଅଟକାଇବାରୁ ପୀଡ଼ିତାଙ୍କ ପରିବାରକୁ ସେ ଏକା ଭେଟିବାକୁ ଚାହୁଁଛନ୍ତି ବୋଲି ରାହୁଲ୍ ପୋଲିସକୁ କହିଥିଲେ। ହେଲେ ପୋଲିସ କିଛି ଶୁଣି ନ ଥିଲା। ପରେ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏହି ସମୟରେ ଠେଲାପେଲାରେ ରାହୁଲ୍ ତଳେ ପଡ଼ିଯାଇଥିଲେ। ଏପରି କି ପ୍ରିୟଙ୍କାଙ୍କୁ ମଧ୍ୟ ଠେଲାପେଲା କରାଯାଇଥିବା ଅଭିଯୋଗ ହୋଇଥିଲା। ଯାହାକୁ ନେଇ ଘଟଣାସ୍ଥଳରେ କିଛି ସମୟ ପାଇଁ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ପରେ ପୋଲିସ ରାହୁଲ୍ ଏବଂ ପ୍ରିୟଙ୍କାଙ୍କୁ କିଛି ସମୟ ଅଟକ ରଖି ନୂଆଦିଲ୍ଲୀ ଫେରାଇ ଦେଇଥିଲା। କଂଗ୍ରେସ ନେତା ରଣଦୀପ ସୁର୍ଜଓ୍ବୋଲା ପୋଲିସର ଏଭଳି ଅମାନବୀୟ କାର୍ଯ୍ୟକୁ ନିନ୍ଦା କରିବା ସହ ରାହୁଲ ଏବଂ ପ୍ରିୟଙ୍କା ଏକାକୀ ଚାଲିକି ଯିବାକୁ କହିବା ପରେ ଯୋଗୀ ଆଦିତ୍ୟନାଥ କାହିଁକି ଡରିଗଲେ ବୋଲି ପ୍ରଶ୍ନ କରିଛନ୍ତି।
ପ୍ରକାଶ ଯେ, ଗତ ୧୪ତାରିଖରେ ଜଣେ ଯୁବତୀ ତାଙ୍କ ମା’ଙ୍କ ସହ ବିଲକୁ ଯାଉଥିବାବେଳେ ୪ଜଣ ଯୁବକ ଉକ୍ତ ଯୁବତୀଙ୍କୁ ଉଠାଇ ନେଇ ଗଣବଳାତ୍କାର କରିଥିଲେ। ଯୁବତୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲ୍ରେ ଭର୍ତ୍ତି କରାଯାଇଥିଲା। ପରେ ଚିକିତ୍ସିତ ଅବସ୍ଥାରେ ତାଙ୍କର ଗତ ମଙ୍ଗଳବାର ମୃତ୍ୟୁ ଘଟିଥିଲା। ପୀଡ଼ିତାଙ୍କ ମୃତ୍ୟୁ ପରେ ବିଳମ୍ବିତ ରାତିରେ ପୋଲିସ ଯେଉଁଭଳି ତରବରିଆ ଭାବେ ଅନ୍ତିମ ସଂସ୍କାର କରିଲା ତାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଥିଲା। ଏଭଳି ଏକ ସମ୍ବେଦନଶୀଳ ଘଟଣାର ତଦନ୍ତ ପାଇଁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ୩ଜଣିଆ ଏସ୍ଆଇଟି ଗଠନ କରିଛନ୍ତି। ଏପରି କି ପୀଡ଼ିତାଙ୍କ ପରିବାର ସହ ଫୋନ ଯୋଗେ ଆଲୋଚନା କରି ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଶ୍ୱାସନା ଦେଇଛନ୍ତି।
