ଯାଜପୁର ଟାଉନ,୬।୮(ଡି.ଏନ.ଏ.): ନକଲି ଭିନ୍ନକ୍ଷମ ସାର୍ଟିଫିକେଟ୍ ପ୍ରସ୍ତୁତ କରି ଏଥିରୁ ଲକ୍ଷଲକ୍ଷ ଟଙ୍କା ରୋଜଗାର କରୁଥିବା ଏକ ରାକେଟ୍ର ପର୍ଦ୍ଦାଫାସ କରିଛି ଯାଜପୁର ପୋଲିସ। ଘଟଣାରେ ସମ୍ପୃକ୍ତ ୩ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରି ତଦନ୍ତ ଚଳାଇଥିବା ଶୁକ୍ରବାର ଏକ ଖବରଦାତା ସମ୍ମିଳନୀରେ ଏସ୍ଡିପିଓ ସରୋଜ ଉପାଧ୍ୟାୟ ଓ ଥାନା ଅଧିକାରୀ ଅଜୟ କୁମାର ଜେନା ପ୍ରକାଶ କରିଛନ୍ତି।
ପୂର୍ବରୁ ଆଜିଭଳି ଅନ୍ଲାଇନ୍ରେ ନୁହେଁ ଅଫ୍ ଲାଇନ୍ରେ ଭିନ୍ନକ୍ଷମ ସାର୍ଟିଫିକେଟ୍ ପ୍ରାପ୍ତିପାଇଁ ଆବେଦନ କରାଯାଉଥିଲା। ନିର୍ଦ୍ଦିଷ୍ଟ ବର୍ଷ ଅନ୍ତରରେ ଜିଲା ସଦର ମହକୁମାଠାରେ ପ୍ରତିମାସ ପ୍ରଥମ ସପ୍ତାହରେ ନୂଆ ଆବେଦନର ଯାଞ୍ଚ ଓ ନବୀକରଣ କରାଯାଇଥାଏ। ତେବେ ଗତ ୩ ତାରିଖରେ ବାଲିଚନ୍ଦ୍ରପୁର ଥାନା ସାଉଡିଆ ଅଞ୍ଚଳର କାମିନୀକାନ୍ତ ପରିଡ଼ା ନାମକ ଜଣେ ହିତାଧିକାରୀ ପ୍ରମାଣପତ୍ର ଯାଞ୍ଚ କରିବାକୁ ଆସିଥିବାବେଳେ ଦାୟିତ୍ୱରେ ଥିବା ଅଧିକାରୀ ଡା. ଅନୁପ କୁମାର ନାଥଶର୍ମା ଏହି ପ୍ରମାଣପତ୍ର ଜାଲ ଥିବା ଜାଣି ପାରଥିଲେ। ଏହାପରେ ଡାକ୍ତର ଶର୍ମା ଯାଜପୁର ଥାନାରେ ଅଭିଯୋଗ କରିଥିଲେ। ପୋଲିସ୍ ନକଲି ଭିନ୍ନକ୍ଷମ ପରିଡ଼ାଙ୍କୁ ନେଇ ଥାନାରେ ପଚରା ଉଚରା କରିଥିଲେ। ତଦନ୍ତ ସମୟରେ ସାର୍ଟିଫିକେଟ୍ଟି ବାଲିଚନ୍ଦ୍ରପୁର ଥାନା ସାଉଡିଆର ପ୍ରଶାନ୍ତ ସାମଲ ନାମକ ଜଣେ ବ୍ୟକ୍ତି ଯୋଗାଇ ଦେଇଥିଲେ ବୋଲି ଜଣାପଡ଼ିଥିଲା। ଅଧିକ ଖୋଳତାଳ ପରେ ବାଲିଚନ୍ଦ୍ରପୁର ଥାନା ଫକୀରପାଟଣା ନିବାସୀ ଚନ୍ଦ୍ରକାନ୍ତ ନନ୍ଦ ଏହା ପ୍ରସ୍ତୁତ କରୁଥିବା ଏବଂ ୨୦୧୪ରୁ ସେ ଏଭଳି ଜାଲ ସାର୍ଟିଫିକେଟ୍ ତିଆରି କରୁଥିବା ଜଣାପଡ଼ିଥିଲା। ପୋଲିସ ଚଢ଼ାଉ ବେଳେ ଏକ ଷ୍ଟାମ୍ପପ୍ୟାଡ୍, ୧୦ଟି ନକଲି ରବର ଷ୍ଟାମ୍ପ ଓ ବହୁ ନକଲି ସାର୍ଟିଫିକେଟ୍୍ ଜବତ କରିବା ସହ ଉପରୋକ୍ତ ୩ ଅଭିଯୁକ୍ତଙ୍କୁ ଗିରଫ କରିଥିଲା। ସାର୍ଟିଫିକେଟ୍ ଗୋଟି ଅଭିଯୁକ୍ତ ୨ ହଜାର ଟଙ୍କା ନେଉଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଏ ସଂକ୍ରାନ୍ତରେ ଯାଜପୁର ପୋଲିସ ନଂ.୨୭୮/୨୨ରେ ଏକ ମାମଲା ରୁଜୁ କରି ଅଧିକ ତଦନ୍ତ ଚଳାଇଛି। ତେବେ ଏହି ର଼୍ୟାକେଟ୍ ପଛରେ ଜିଲା ମୁଖ୍ୟ ଚିକିତ୍ସାଳୟର କେତେଜଣ ଅସାଧୁ କର୍ମଚାରୀ ସମ୍ପୃକ୍ତ ଥିବା ପୋଲିସ ସନ୍ଦେହ କରୁଛି। ୨୦୧୪ରୁ ଅନ୍ଲାଇନ୍ ହେବା ମଧ୍ୟରେ ଏମିତି ନକଲି ପ୍ରମାଣ ପତ୍ରରେ ଅନେକ ଭିନ୍ନକ୍ଷମ ଓ ନକଲି ହିତାଧିକାରୀମାନେ ସରକାରଙ୍କ ଅନେକ ସୁବିଧା ସୁଯୋଗକୁ ହାତେଇ ନେଇଥିବା ଜଣାପଡ଼ିଛି। ତେବେ ଏହାର ଏକ ସ୍ବତନ୍ତ୍ର ତଦନ୍ତ ଆବଶ୍ୟକ ରହିଛି ବୋଲି ସାଧାରଣରେ ମତପ୍ରକାଶ ପାଇଛି।
