ଝାରସୁଗୁଡ଼ା ଅଫିସ୍,୨୪।୧୨: ରାଷ୍ଟ୍ରୀୟ ଖାଦାନ ମଜଦୁର ଫେଡେରେଶନ (ଆଇଏନ୍ଏମ୍ଏଫ୍)ର ୩୨ତମ ମହାଧିବେଶନ ଗତ ୩ଦିନ ଧରି ପୁରୀରେ ଅନୁଷ୍ଠିତ ହୋଇଯାଇଛି । ଏଥିରେ ଦେଶର ବହୁ ଟ୍ରେଡ୍ ୟୁନିୟନ ଶ୍ରମିକ ସଙ୍ଗଠନ ଯୋଗଦେଇଥିଲେ। ସାଙ୍ଗଠନିକ ସୁଦୃଢ଼ ଉପରେ ଆଲୋଚନା କରାଯାଇ ଶ୍ରମିକଙ୍କ ସ୍ବାର୍ଥକୁ ନେଇ ଗୁରୁତ୍ୱାରୋପ କରାଯାଇଥିଲା। ଏହି ଅବସରରେ ସଂଘର କର୍ମକର୍ତ୍ତା ଚୟନ କରାଯାଇଛି। ଏଥିରେ ଝାଡ଼ଖଣ୍ଡର ବିଧାୟକ ଅନୁପ ସିଂହ ଅଧ୍ୟକ୍ଷ ଭାବେ ମନୋନୀତ ହୋଇଥିବା ବେଳେ ଓଡ଼ିଶାରୁ ୨ଜଣ ଉପସଭାପତି ଓ ଜଣେ ସାଧାରଣ ସମ୍ପାଦକ ରହିଛନ୍ତି। ଏଥିମଧ୍ୟରେ ଓଡିଶାରୁ ଓସିଏମ୍ଏସ୍ ଶ୍ରମିକ ସଙ୍ଗଠନର ଉପସଭାପତି ରବୀନ୍ଦ୍ର ପ୍ରସାଦ ଓ ପୂର୍ବତନ ବିଧାୟକ କିଶୋର ପଟେଲ ଓ ସାଧାରଣ ସମ୍ପାଦକ ସୌଭାଗ୍ୟ ପ୍ରଧାନ ମନୋନୀତ ହୋଇଛନ୍ତି। ରାଷ୍ଟ୍ରୀୟସ୍ତରରେ ଓଡ଼ିଶାକୁ ୩ ପଦବୀ ମିଳିଥିବାରୁ ଏନେଇ ରାଜ୍ୟର ବିଭିନ୍ନ ସଂଗଠନ ସଂଘକୁ କୃତଜ୍ଞତା ଜଣାଇ ଦିଆଯାଇଛି। ରାଷ୍ଟ୍ରୀୟ ସଂଘର ଉପସଭାପତି ଭାବେ ମନୋନୀତ ହୋଇଥିବା ଶ୍ରମିକ ନେତା ରବୀନ୍ଦ୍ର ପ୍ରସାଦ ଏହା ପୂର୍ବରୁ ଏମ୍ସିଏଲ୍ କର୍ପୋରେଟ୍ ସେପ୍ଟି ମେମ୍ବର ସାଙ୍ଗକୁ ଲଖନପୁର କୋଇଲା କ୍ଷେତ୍ର ଏରିଆ ସମ୍ପାଦକ ରହିଛନ୍ତି। ଏହି ଖବର ପ୍ରଚାର ହେବା ପରେ ଓସିଏମ୍ଏସ୍ ଶ୍ରମିକ ସଂଗଠନ ପକ୍ଷରୁ ବନ୍ଧବାହାଲ ସଂଘ କାର୍ଯ୍ୟାଳୟରେ ଏକ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି।
ଏଥିରେ ନବନିର୍ବାଚିତ ଉପସଭାପତି ପ୍ରସାଦଙ୍କୁ ଉପଢୌଙ୍କନ ସହ ପୁଷ୍ପଗୁଚ୍ଛଦେଇ ସମ୍ବର୍ଦ୍ଧିତ କରାଯାଇଥିଲା। ଏଥିରେ ସ୍ଥାନୀୟ ସଙ୍ଗଠନର କର୍ମକର୍ତ୍ତାଙ୍କ ମଧ୍ୟରେ ବୁଲୁ ପାଣିଗ୍ରାହୀ, ଭୀମ ମହାନ୍ତି, ଲକ୍ଷ୍ମଣ ଭଞ୍ଜ, ରାଜେନ୍ଦ୍ର ପ୍ରଧାନ, ଟଙ୍କଧର ପ୍ରଧାନ, ପ୍ରମୋଦ ବେହେରା, ପ୍ରଶାନ୍ତ ବରାଡ, ଡି. ମଣ୍ଡଳ, ସଞ୍ଜୀବ ଶର୍ମା, ହେମାନନ୍ଦ ସା, ଗୌର ସାହୁ, ପ୍ରସନ୍ନ ଓରାମ ପ୍ରମୁଖ ଶତାଧିକ କର୍ମକର୍ତ୍ତା ଉପସ୍ଥିତ ଥିଲେ। ନବନିର୍ବାଚିତ ଉପସଭାପତି ପ୍ରସାଦ ତାଙ୍କ ପ୍ରତିକ୍ରିୟାରେ କହିଛନ୍ତି, ରାଷ୍ଟ୍ରୀୟ ସଂଘରେ ଏକ ଗୁରୁତ୍ୱପୂର୍ଣ୍ଣ ପଦବୀ ମିଳିଥିବାରୁ ଏହାକୁ କର୍ମଚାରୀଙ୍କ ସ୍ବାର୍ଥରେ କିଭଳି ବିନିଯୋଗ କରିହେବ, ଏ ଦିଗରେ ସେ ଚେଷ୍ଟା କରିବେ ବୋଲି କହିଛନ୍ତି।
