ନୂଆଦିଲ୍ଲୀ, ୨୫ା୩ (କୁଲ୍ଦୀପ ସିଂ): ଭୋଟର ପରିଚୟପତ୍ର (ଭୋଟର କାର୍ଡ)କୁ ଆଧାର ସହ ସ୍ବେଚ୍ଛାକୃତ ଭାବେ ସଂଯୋଗ କରିବାର ସମୟସୀମାକୁ କେନ୍ଦ୍ର ସରକାର ୨୦୨୪ ମାର୍ଚ୍ଚ ୩୧ ପର୍ଯ୍ୟନ୍ତ ବଢ଼ାଇଦେଇଛନ୍ତି। ପୂର୍ବରୁ ଆଧାର-ଭୋଟର କାର୍ଡ ଲିଙ୍କ୍ ପାଇଁ ୨୦୨୩ ଏପ୍ରିଲ ୧କୁ ଡେଡ୍ଲାଇନ ଧାର୍ଯ୍ୟ କରାଯାଇଥିଲା। ଏବେ ସମୟସୀମା ବୃଦ୍ଧି ଲାଗି ସରକାରଙ୍କ ଆଇନ ଓ ନ୍ୟାୟ ମନ୍ତ୍ରଣାଳୟ ୨୦୨୨ ଜୁନ୍ ୧୭ରେ ଜାରି କରିଥିବା ବିଜ୍ଞପ୍ତିରେ କେତେକ ସଂଶୋଧନ କରିଛନ୍ତି। ୨୦୨୨ ଜୁଲାଇ ୪ରେ ଭାରତର ନିର୍ବାଚନ ଆୟୋଗ (ଇସିଆଇ) କହିଥିଲେ, ପୂର୍ବବର୍ଷ ଅଗଷ୍ଟ ୧ରୁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ବର୍ତ୍ତମାନର ଭୋଟର ଏବଂ ଭବିଷ୍ୟତ ଭୋଟରମାନଙ୍କଠାରୁ ସ୍ବେଚ୍ଛାକୃତ ଭାବେ ଆଧାର ନମ୍ବର ସଂଗ୍ରହ ଲାଗି କାର୍ଯ୍ୟକ୍ରମ ଆରମ୍ଭ ହୋଇଥିଲା। ଭୋଟର ପରିଚୟପତ୍ର ସହ ଆଧାର ସଂଯୋଗ କରିବା ସ୍ବେଚ୍ଛାକୃତ ହୋଇଥିବାରୁ ଏଥିପାଇଁ ଫର୍ମ-୬ବିରେ ଭୋଟରଙ୍କ ସମ୍ମତି ନିଆଯାଉଛି। ତେବେ ସମ୍ମତି ପ୍ରତ୍ୟାହାର କରିନେବାର ବ୍ୟବସ୍ଥା ନ ଥିବା ଗତବର୍ଷ ଡିସେମ୍ବରରେ କେନ୍ଦ୍ର ଆଇନମନ୍ତ୍ରୀ କିରେନ ରିଜିଜୁ ଲୋକ ସଭାରେ କହିଥିଲେ। ୨୦୨୧ ଡିସେମ୍ବରରେ ପାର୍ଲାମେଣ୍ଟରେ ନିର୍ବାଚନ ଆଇନ (ସଂଶୋଧନ) ବଲ୍ ଗୃହୀତ ହେବା ପରେ ଆଧାର-ଭୋଟର କାର୍ଡ ସଂଯୋଗ ଅଧିକୃତ ହୋଇଥିଲା। ଭୋଟର ତାଲିକାକୁ ଅସଲି ଭାବେ ସୁନିଶ୍ଚିତ କରାଇବା ଉଦ୍ଦେଶ୍ୟରେ ଏଭଳି ପଦକ୍ଷେପ ଗ୍ରହଣ କରାଯାଇଥିବା ରିଜିଜୁ କହିଥିଲେ। ଆଧାରକୁ ଏପର୍ଯ୍ୟନ୍ତ ନାଗରିକତ୍ୱର ପ୍ରମାଣ ଭାବେ ଗ୍ରହଣ କରାଯାଇ ନାହିଁ। ତେଣୁ ଭୋଟର କାର୍ଡ ସହ ଆଧାର ସଂଯୋଗର ସାମ୍ବିଧାନିକତାକୁ ନେଇ ବିରୋଧୀ ଦଳଗୁଡ଼ିକ ପ୍ରଶ୍ନ ଉଠାଇବା ସହ ଏଭଳି ନିଷ୍ପତ୍ତିର ସମାଲୋଚନା କରିଛନ୍ତି। ଭୋଟର କାର୍ଡ-ଆଧାର ସଂଯୋଗ ଯୋଗୁ ଅନେକ ଯୋଗ୍ୟ ମତଦାତା ଭୋଟର ତାଲିକାରୁ ବାଦ୍ ପଡ଼ିବେ ବୋଲି ବିରୋଧୀ ଆଶଙ୍କା ବ୍ୟକ୍ତ କରିଛନ୍ତି।
