ଯୋଡ଼ା,୨୩ା୯(ମାନସ ମହାନ୍ତି): କେନ୍ଦୁଝର ଜିଲା ଯୋଡ଼ା ଖଣି କ୍ଷେତ୍ରରେ ବିଭିନ୍ନ ଖଣି ଓ ଶିଳ୍ପ ସଂସ୍ଥା ରହିଛି। ଏଠାରେ ଥିବା ଖଣିରୁ ରାଜ୍ୟ ସରକାର ଅନେକ କୋଟି ଟଙ୍କା ରାଜସ୍ବ ପାଉଛନ୍ତି। ଏହା ସହ ଜିଲା ଖଣିଜ ପାଣ୍ଠିରେ ଅଜସ୍ର ଟଙ୍କା ରହିଛି। ତଥାପି ଖଣି ପ୍ରଭାବିତ ଅଞ୍ଚଳବାସୀଙ୍କ ସମସ୍ୟା ସୁଧୁରିପାରୁନାହିଁ। ଏଠାକାର ଲୋକେ ପାନୀୟ ଜଳ ଭଳି ମୌଳିକ ସୁବିଧାରୁ ମଧ୍ୟ ବଞ୍ଚତ୍ତ ହେଉଛନ୍ତି। ଯୋଡ଼ା ବ୍ଲକ୍ କାଳିମାଟି ପଞ୍ଚାୟତରେ ୫ ମାସ ହେବ ପାନୀୟ ଜଳ ପ୍ରକଳ୍ପ ପାଇପ ଫାଟିଯିବାରୁ ସ୍ଥାନୀୟ ବାସିନ୍ଦା ପାଣି ଟୋପେ ପାଇଁ ହନ୍ତସନ୍ତ ହେଉଛି। ବାରମ୍ବାର ଅଭିଯୋଗ ପରେ ବି ମରାମତି ହେଉ ନ ଥିବାରୁ ସେମାନେ ପାହାଡ଼ି ଝରଣା ଓ ଚୁଆପାଣି ଉପରେ ନିର୍ଭର କରୁଥିବା ଦେଖିବାକୁ ମିଳିଛି।
ସୂଚନାଯୋଗ୍ୟ, ପଞ୍ଚାୟତର ପ୍ରାୟ ୧୫ ଖଣି ପ୍ରଭାବିତ ଗ୍ରାମକୁ ଜଳ ଯୋଗାଣ ପାଇଁ ସରକାରଙ୍କ ମେଗା ପାନୀୟ ଜଳ ପ୍ରକଳ୍ପ ଯୋଜନାରେ ବେଲଦାଠାରେ ଏକ ପ୍ରକଳ୍ପ କରାଯାଇଛି। ରାସ୍ତା କାମ ସମୟରେ ପ୍ରକଳ୍ପ ପାଇପ ଫାଟିଯିବାରୁ ପ୍ରାୟ ୫ ମାସରୁ ଊର୍ଦ୍ଧ୍ୱ ସମୟ ଧରି ଜଳ ଯୋଗାଣ ବନ୍ଦ ରହିଛି। କେବଳ ବାମେବାରି ପର୍ଯ୍ୟନ୍ତ ଜଳ ଯୋଗାଣ ହୋଇପାରୁଛି। ବାମେବାରିରୁ କାଳିମାଟି, ଖଜୁରଡିହି, ପୁରୁଣାଡିହି, ବସନ୍ତପୁର ପ୍ରଭୃତି ଅଞ୍ଚଳକୁ ଜଳ ଯୋଗାଣ ବନ୍ଦ ହୋଇଯାଇଛି। ଫଳରେ ବିଭିନ୍ନ ଗ୍ରାମର ପ୍ରାୟ ୧୫ ଶହରୁ ଊଦ୍ଧର୍ବ ଲୋକ ପାନୀୟ ଜଳରୁ ବଞ୍ଚତ୍ତ ହେଉଛନ୍ତି। ଏ ସମ୍ପର୍କରେ ବାରମ୍ବାର ଜଳ ଯୋଗାଣ ବିଭାଗକୁ ଜଣାଇଲେ ସୁଦ୍ଧା କୌଣସି ଫଳ ମିଳି ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଶେଷରେ ବାଧ୍ୟହୋଇ ପାହାଡ଼ରୁ ବହି ଆସୁଥିବା ଝରଣା ପାଶର୍ବରେ ଚୁଆ ଖୋଳି ପାଣି ସଂଗ୍ରହ କରୁଛନ୍ତି। ଦୂଷିତ ଜଳ ପିଇ ଶୋଷ ମେଣ୍ଟାଉଛନ୍ତି। ବର୍ତ୍ତମାନ ବର୍ଷାଦିନ ହୋଇଥିବାରୁ ଦୂଷିତ ଜଳ ବ୍ୟବହାର ଦ୍ୱାରା ହଇଜା, ଆମାଶୟ, ଡାଏରିଆ ରୋଗ ଭଳି ଅନେକ ମାରାତ୍ମକ ରୋଗରେ ଲୋକେ ଆକ୍ରାନ୍ତ ହେଉଥିବା ଜଣାପଡ଼ିଛି। ଏ ସମ୍ପର୍କରେ ମେଗା ପ୍ରୋଜେକ୍ଟର କନିଷ୍ଠ ଯନ୍ତ୍ରୀ ଶୁଭେନ୍ଦୁ ନାଏକ କହିଛନ୍ତି, ପିଡବ୍ଲ୍ୟୁଡି ବିଭାଗର ରାସ୍ତା କାର୍ଯ୍ୟ ବେଳେ ଏହି ମେଗା ପ୍ରୋଜେକ୍ଟର ୬ଟି ପାଇପ ଫାଟି ଯାଇଛି; ଯାହାର ଆନୁମାନିକ ମୂଲ୍ୟ ୧୦ ଲକ୍ଷରୁ ଊଦ୍ଧର୍ବ ଟଙ୍କା ହେବ। ଏହାକୁ ରିକଭରି ପାଇଁ ପ୍ରକଳ୍ପ ପକ୍ଷରୁ ଗତ ଅଗଷ୍ଟରେ ଚିଠି କରାଯାଇଛି। ଗତ ବୁଧବାର ଏ ସମ୍ପର୍କରେ ଏକ ବୈଠକ ମଧ୍ୟ ହୋଇଥିଲା। ଆଗାମୀ ୧୦ ଦିନ ମଧ୍ୟରେ କୌଣସିମତେ ପାଇପ ଲାଇନ ସଂଯୋଗ କରାଯିବାର ନିଷ୍ପତ୍ତି ନିଆଯାଇଥିବା ସେ ସୂଚନା ଦେଇଛନ୍ତି। ଅପରପକ୍ଷରେ ପଞ୍ଚାୟତର ଚତୁଃପାର୍ଶ୍ୱରେ ବହୁ ଖଣି ଓ ଶିଳ୍ପସଂସ୍ଥା କାର୍ଯ୍ୟକ୍ଷମ ରହିଥିଲେ ହେଁ ସେମାନେ ଅଞ୍ଚଳର ବିକାଶ ପ୍ରତି ଗୁରୁତ୍ୱ ଦେଉନାହାନ୍ତି। ଜିଲା ପ୍ରଶାସନ ଗୁରୁତ୍ୱ ଦେଇ ଜଳ ଯୋଗାଇବାକୁ ଅଞ୍ଚଳବାସୀ ଗଣମାଧ୍ୟମ ଆଗରେ ନିବେଦନ କରିଛନ୍ତି।
