ପୁରୀ ଅଫିସ,୨୩ା୧୧:ଥାନା ହାଜତରେ ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନକୁ ନେଇ ସମଗ୍ର ରାଜ୍ୟରେ ଏବେ ପୁରୀ ଜିଲା ଚର୍ଚ୍ଚାରେ ରହିଛି । ବାସେଳିସାହି ଥାନା ହାଜତ ମୃତ୍ୟୁ ପରେ ପିପିଲି ଥାନାରେ ଥାର୍ଡ ଡିଗ୍ରୀ ଘଟଣା ସାମ୍ନାକୁ ଆସିଥିଲା। ଏହାକୁ ନେଇ ହଟଚମଟ ଚାଲିଥିବାବେଳେ ଏବେ ପୁଣି ଅଭିଯୁକ୍ତଙ୍କ ପ୍ରତି ପୋଲିସର ବର୍ବରୋଚିତ ମାଡ଼ ଅଭିଯୋଗ ହୋଇଛି। ରବିବାର ମେରାଇନ୍ ଥାନା ପୋଲିସ ପୁରୀ ଜିଲା ଦୌରାଜଜ୍ଙ୍କ ଆବାସିକ କାର୍ଯ୍ୟାଳୟରେ ୬ ଅଭିଯୁକ୍ତଙ୍କୁ ହାଜର କରାଇଥିଲା। ୭ଗ୍ରାମ୍ ବ୍ରାଉନ୍ସୁଗାର ରଖିବା ଅଭିଯୋଗରେ ଏନ୍ଡିପିଏସ୍ ଆକ୍ଟରେ ଏମାନେ ଗିରଫ ହୋଇଥିଲେ। ତେବେ ପୋଲିସ ସେମାନଙ୍କୁ ନିସ୍ତୁକ ମାଡ଼ ମାରିଥିବା ନେଇ ଜିଲା ଦୌରାଜଜ୍ଙ୍କୁ କ୍ଷତ ସ୍ଥାନ ଦେଖାଇ ସମ୍ପୃକ୍ତ ଅଭିଯୁକ୍ତମାନେ ଅଭିଯୋଗ କରିଥିଲେ। ଏ ନେଇ ବ୍ୟକ୍ତିଗତ ଭାବେ ତଦନ୍ତକାରୀ ଅଧିକାରୀ ଏବଂ ମେରାଇନ ଥାନାଧିକାରୀଙ୍କ ଉପରେ ଅଦାଲତ ବର୍ଷିଥିବା ଅଭିଯୁକ୍ତଙ୍କ ଓକିଲ ଗୋପାଳକୃଷ୍ଣ ପଣ୍ଡା କହିଛନ୍ତି।
ପଣ୍ଡାଙ୍କ ସୂଚନା ଅନୁଯାୟୀ, ୬ ଅଭିଯୁକ୍ତ ରଞ୍ଜନ ଦାସ, ବିଜୟ ନାୟକ, ରାମିନି ନାୟକ, କାହ୍ନା ନାୟକ, ଦୀନବନ୍ଧୁ ପାଣି, ଏମ୍. ନାଜିରଙ୍କ ଇନ୍ଜୁରି ରିପୋର୍ଟରେ କୌଣସି ଆଘାତ ହୋଇଥିବା ଉଲ୍ଲେଖ ନାହିଁ। କିନ୍ତୁ ସେମାନଙ୍କୁ ନିସ୍ତୁକ ମାଡ଼ ମରାଯାଇଛି। ଏମିତି କି ଚମଡ଼ା ଫାଟିଛି। ତେଣୁ ଜିଲା ଦୌରାଜଜ୍ ଏଥିଲାଗି ବିରକ୍ତି ପ୍ରକାଶ କରିଥିଲେ। ଅଭିଯୁକ୍ତମାନଙ୍କର ଆଉଥରେ ଭଲ ଭାବେ ମେଡିକାଲ ଟେଷ୍ଟ କରି ସୋମବାର ସନ୍ଧ୍ୟା ସୁଦ୍ଧା ରିପୋର୍ଟ ଦେବାକୁ ପୁରୀ ଜିଲା ଜେଲରଙ୍କୁ ନିର୍ଦ୍ଦେଶ ଦିଆଯାଇଛି ବୋଲି ଓକିଲ ପଣ୍ଡା କହିଛନ୍ତି। ଅଭିଯୁକ୍ତମାନେ ଗଣମାଧ୍ୟମ ଆଗରେ ଅଭିଯୋଗ କରିଛନ୍ତି ଯେ, କୁମ୍ଭାରପଡ଼ା ଥାନା ଅଞ୍ଚଳରୁ ସେମାନଙ୍କୁ ଗିରଫ କରାଯାଇ ବାସେଳିସାହି ଥାନାରେ ୬/୭ ଦିନ ରଖି ପୋଲିସ ମାଡ଼ ମାରିଥିଲା। ଅନ୍ୟପକ୍ଷରେ ଅଭିଯୁକ୍ତମାନଙ୍କ ବୟାନ ଏବଂ ମେରାଇନ ଥାନା ପକ୍ଷରୁ କୋର୍ଟରେ ହାଜର କରାଯାଇଥିବାବେଳେ ବାସ୍ତବରେ କେଉଁ ଥାନାରେ ସେମାନଙ୍କୁ ମାଡ଼ ମରାଯାଇଛି ତାହା ସ୍ପଷ୍ଟ ଜଣାପଡୁନାହିଁ। ତେବେ ଏହି ଅଭିଯୋଗ ସଂକ୍ରାନ୍ତରେ ପୋଲିସ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ।
