ଦାରିଙ୍ଗବାଡ଼ି,୪ା୧୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଗଦାପୁର ପଞ୍ଚାୟତ ମାଣ୍ଡିପଙ୍କା ଗ୍ରାମରେ ଆମ୍ବଟାକୁଆ ଖାଇ ୨ ଜଣଙ୍କ ମୃତ୍ୟୁ ଘଟିଥିବାବେଳେ ୬ ଜଣ ଗୁରୁତର ହୋଇ ଏବେ ବି ମେଡିକାଲରେ ଚିକିତ୍ସିତ ହେଉଛନ୍ତି। ଏହା ପରେ ଜିଲା ପ୍ରଶାସନ ପକ୍ଷରୁ ଗୁରୁତ୍ୱପୂର୍ଣ୍ଣ ପଦକ୍ଷେପ ଆରମ୍ଭ ହୋଇଛି। ଘଟଣା ପରଠାରୁ ୨ ଦିନ ଧରି ଜନସଚେତନତାକୁ ବ୍ୟାପକ କରାଯାଇଛି। ଶନିବାର ଏହି ସଚେତନ କାର୍ଯ୍ୟକ୍ରମକୁ ଶିକରମାହା ଗ୍ରାମରୁ ଆରମ୍ଭ କରାଯାଇଥିବାବେଳେ ରବିବାର ମାଣ୍ଡିପଙ୍କା ଗ୍ରାମରେ ଏହି ସଚେତନ କରାଯାଇଥିଲା। ଘଟଣା ଘଟିବା ପରେ ମଧ୍ୟ ଲୋକ ଆମ୍ବଟାକୁଆ ଖାଇବା ନେଇ ଧରିତ୍ରୀ ପୋର୍ଟାଲରେ ଖବର ପ୍ରକାଶିତ ହୋଇଥିଲା। ଏହା ପରେ ପୁଣି କିଛି ଅଘଟଣ ଘଟିବା ଭୟରେ ପ୍ରଶାସନ ପକ୍ଷରୁ ଜିଲା ସମାଜ ମଙ୍ଗଳ ଅଧିକାରିଣୀ ବିଜୟଲକ୍ଷ୍ମୀ ବେହେରା ଏବଂ ସିଡିପିଓ ସନ୍ଧ୍ୟାରାଣୀ ପଣ୍ଡା ଓ ଅଞ୍ଚଳର ସମସ୍ତ ଅଙ୍ଗନଓ୍ବାଡ଼ି କେନ୍ଦ୍ରର କର୍ମୀମାନେ ଦଳଦଳ ଗାଁ ଗାଁ ବୁଲି ସଚେତନ କରାଇବା ସହ ଆମ୍ବଟାକୁଆକୁ ନା କହିବାକୁ ପରାମର୍ଶ ଦେବା ସହ ଶପଥ ପାଠ କରାଇଛନ୍ତି। ରବିବାର ସଚେତନ କରାଇବାବେଳେ ଏକାଧିକ ପରିବାର ଆମ୍ବଟାକୁଆ ପ୍ରସ୍ତୁତ କରି ଖାଇବା ପାଇଁ ରଖିଥିବାବେଳେ ଜିଲା ସମାଜ ମଙ୍ଗଳ ଅଧିକାରିଣୀ ଓ ସିଡିପିଓ ସେଗୁଡ଼ିକୁ ନଷ୍ଟ କରିଥିଲେ। ଏଗୁଡ଼ିକ ଖାଇବା ଦ୍ୱାରା ଲୋକଙ୍କ ପାଇଁ ବିପଦ ବୋଲି କୁହାଯାଇଥିଲା। ଏହାକୁ ନେଇ କିଛି ଲୋକ ରାଜି ହେଉଥିବାବେଳେ ଆଉ କିଛି ଲୋକ ସରକାର ସେମାନଙ୍କ ପାଇଁ ସୁଷମ ଖାଦ୍ୟ ଯୋଗାଇଦେବା ସହ ଅଧିକ ଚାଉଳ ଯୋଗାଇବାକୁ ଦାବି କରିଥିଲେ।
