ଗୋଟିଏ ପଟେ କରୋନାକୁ ନେଇ ସାରାଦେଶରେ ଲକ୍ଡାଉନ୍ ସ୍ଥିତି ଜାରି ରହିଛି। ଫଳରେ ସ୍କୁଲ, କଲେଜ ସହ ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିଛି। ଏଭଳି ସ୍ଥିତିରେ ପିଲାମାନେ ମାତ୍ରାଧିକ ସମୟ ଫୋନରେ ବିତାଉଛନ୍ତି। ପବ୍ଜିଠାରୁ ଆରମ୍ଭ କରି ଅନ୍ୟାନ୍ୟ ଖେଳରେ ମନୋନିବେଶ କରୁଛନ୍ତି। ହେଲେ ଖେଳ ନିଶାରେ ଯୁବକମାନେ ଏପରି କିଛି କାର୍ଯ୍ୟ କରୁଛନ୍ତି ଯାହାକି ଚର୍ଚ୍ଚାର ପରିସରକୁ ଆସୁଛି। ଏଭଳି ଏକ ଘଟଣା ପଞ୍ଜାବର ମୋହାଲିରେ ଦେଖିବାକୁ ମିଳିଛି।
୧୫ ବର୍ଷୀୟ ଜଣେ ନାବାଳକ ପବ୍ଜି ନିଶାରେ ନିଜ ଜେଜେବାପାଙ୍କର ୨ ଲକ୍ଷ ଟଙ୍କା ଖର୍ଚ୍ଚ କରିଦେଇଛନ୍ତି। ଜାନୁୟାରୀ ମାସରୁ ନାବାଳକଜଣଙ୍କ ପବ୍ଜି ଖେଳିବା ଆରମ୍ଭ କରିଥିଲେ। ଖେଳରେ ପଇସା ଖର୍ଚ୍ଚ କରି ବିଭିନ୍ନ ସାମଗ୍ରୀ କିଣିବା ପାଇଁ ସେ ଯୋଜନା କରିଥିଲେ। ଶେଷରେ ଜେଜେ ବାପାଙ୍କ ପେନସନ୍ ଆକାଉଣ୍ଟରୁ ସେ ବାରମ୍ବାର ଟଙ୍କା ଉଠାଇ ଆସୁଥିଲେ। ସେ ତାଙ୍କ ନାମରେ ଏକ ପେଟିଏମ୍ ଆକାଉଣ୍ଟ ମଧ୍ୟ ଖୋଲିଥିଲେ। ଦୁଇ ମାସ ମଧ୍ୟରେ ସେ ପାଖାପାଖି ୩୦ରୁ ଅଧିକ ଥର ଟଙ୍କା ଉଠାଇଛନ୍ତି। ଫଳରେ ୨ ଲକ୍ଷରୁ ଅଧିକ ଟଙ୍କା ବୃଦ୍ଧଙ୍କ ଆକାଉଣ୍ଟରୁ କଟି ଯାଇଛି।
ତେବେ ନାବାଳକଜଣଙ୍କ ଅଳ୍ପ ଅଳ୍ପ ଟଙ୍କା ଉଠାଉଥିବାରୁ ହଠାତ କେହି ଜାଣି ପାରି ନ ଥିଲେ। ହେଲେ ବ୍ୟାଙ୍କରୁ ଖାତାର ନକଲ ଆସିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। ଏପରିକି ସେ ଏକ ନୂଆ ସିମ୍ କାର୍ଡର ବ୍ୟବହାର ମଧ୍ୟ କରୁଥିବା ଜଣାପଡ଼ିଛି।
କହିରଖୁଛୁ, ନିକଟରେ ପଞ୍ଜାବର ଅନ୍ୟ ଜଣେ ଯୁବକ ବାପାମା’ଙ୍କ ଚିକିତ୍ସା ଖର୍ଚ୍ଚ ପାଇଁ ରଖାଯାଇଥିବା ୧୬ ଲକ୍ଷ ଟଙ୍କା ଖର୍ଚ୍ଚ କରିଥିବା ଚର୍ଚ୍ଚାର ବିଷୟ ପାଲଟିଥିଲା।
