ମୁମ୍ବାଇ,୨।୮ : ଜଣାଶୁଣା କଳା ନିର୍ଦ୍ଦେଶକ ନିତିନ ଦେଶାଇଙ୍କ ଦେହାନ୍ତ ହୋଇଛି। ମୃତ୍ୟୁ ବେଳକୁ ତାଙ୍କୁ ୮୨ ବର୍ଷ ବୟସ ହୋଇଥିଲା। ମୁମ୍ବାଇ ନିକଟ କରଜତରେ ଥିବା ତାଙ୍କ ଏନଡି ଷ୍ଟୁଡିଓରେ ନିତିନ ଦେଶାଇଙ୍କ ମୃତଦେହ ସନ୍ଦେହଜନକ ଅବସ୍ଥାରେ ମିଳିଛି। ତାଙ୍କ ମୃତ୍ୟୁ ଖବର ସାମ୍ନାକୁ ଆସିବା ପରେ ପୁରା ବଲିଉଡ ଶୋକରେ ରହିଛି।
ସନ୍ଦେହଜନକ ଅବସ୍ଥାରେ ନିତିନ ଦେଶାଇଙ୍କ ମୃତଦେହ ମିଳିବା ପରେ ପୋଲିସ ମଧ୍ୟ ତଦନ୍ତ ଆରମ୍ଭ କରିଛି। ତାଙ୍କ ମୃତ୍ୟୁର କାରଣ ସମ୍ପର୍କରେ ପୋଲିସ ଏପର୍ଯ୍ୟନ୍ତ ଅଧିକ ତଥ୍ୟ ଶେୟାର କରିନାହିଁ, କିନ୍ତୁ ପ୍ରାରମ୍ଭିକ ରିପୋର୍ଟରେ ସେ ଆତ୍ମହତ୍ୟା କରିଥିବା କୁହାଯାଉଛି। ତେବେ ଏପର୍ଯ୍ୟନ୍ତ କୌଣସି ଆତ୍ମହତ୍ୟା ନୋଟ ଜବତ କରାଯାଇ ନାହିଁ।
ଏହି ମାମଲା ସମ୍ପର୍କରେ ସୂଚନା ଦେଇ ରାଇଗଢ଼ ଏସପି ସୋମନାଥ ଘରଗେ କହିଛନ୍ତି, ବୁଧବାର ସକାଳେ ନିତିନ ଦେଶାଇଙ୍କ ମୃତଦେହ ଏନଡି ଷ୍ଟୁଡିଓରେ ଝୁଲୁଥିବା ଦେଖିବାକୁ ମିଳିଥିଲା। ଆମେ ସମସ୍ତ ଦିଗ ନେଇ ଅନୁସନ୍ଧାନ କରୁଛୁ ।
ସେ ଆର୍ଥିକ ଅସୁବିଧାର ସମ୍ମୁଖୀନ ହୋଇଥିଲେ ଏବଂ ତାଙ୍କ ଷ୍ଟୁଡିଓ ଠିକ ଭାବରେ ଚାଲୁ ନ ଥିଲା ବୋଲି ଚର୍ଚ୍ଚା ହେଉଛି। ତେବେ ପୋଲିସ ପକ୍ଷରୁ କୌଣସି ଖବର ନିଶ୍ଚିତ କରାଯାଇ ନାହିଁ।
ଶ୍ରେଷ୍ଠ କଳା ନିର୍ଦ୍ଦେଶନା ପାଇଁ ନିତିନ ଦେଶାଇ ଚାରିଥର ଜାତୀୟ ଚଳଚ୍ଚିତ୍ର ପୁରସ୍କାର ପାଇଛନ୍ତି। ଏଥିମଧ୍ୟରେ, ୧୯୯୯ ମସିହାରେ ଡକ୍ଟର ଆମ୍ବେଦକର ଜାତୀୟ ପୁରସ୍କାର ମଧ୍ୟ ପ୍ରଦାନ କରାଯାଇଥିଲା। ଏହା ସହିତ ତାଙ୍କୁ ‘ହମ ଦିଲ ଦେ ଚୁକେ ସନମ’, ‘ଲଗାନ’ ଏବଂ ’ଦେବଦାସ’ ପାଇଁ ସମ୍ମାନିତ କରାଯାଇଥିଲା। ଶେଷ ଥର ପାଇଁ ସେ ଫିଲ୍ମ ‘ପାନିପଥ’ ପାଇଁ କାମ କରିଥିଲେ।
