ଓ୍ବାଶିଂଟନ୍,୨୧।୧: ଆମେରିକା ରାଷ୍ଟ୍ରପତି ଜୋ ବାଇଡେନ ଜାନୁୟାରୀ ୨୦ରେ ଶପଥ ନେବାପରେ ପ୍ରଥମ ଥର ପାଇଁ ଦେଶକୁ ସମ୍ବୋଧିତ କରିଥିଲେ। ବାଇଡେନଙ୍କ ଭାଷଣ ସମଗ୍ର ବିଶ୍ୱରେ ଧ୍ୟାନ ଦିଆଯାଇଥିଲା। ଅନ୍ୟପକ୍ଷରେ, ଏହି ମୁହୂର୍ତ୍ତ ଭାରତ ପାଇଁ ଅତ୍ୟନ୍ତ ସ୍ବତନ୍ତ୍ର ଥିଲା। ଭାରତ ପାଇଁ ଗର୍ବିତ ବିଷୟ ହେଉଛି ଯେ ବାଇଡେନଙ୍କ ଭାଷଣ ଜଣେ ଭାରତୀୟ ଦ୍ୱାରା ପ୍ରସ୍ତୁତ କରାଯାଇଥିଲା। ସେ ହେଉଛନ୍ତି ବିନୟ ରେଡ୍ଡୀ। ସେ ମୂଳତଃ ଭାରତର ତେଲେଙ୍ଗାନାରୁ ଆସିଛନ୍ତି। କରିମନଗର ଜିଲାର ପୋଥେରିଡିପେଟ ହେଉଛି ତାଙ୍କର ପୈତୃକ ଗାଁ । ବିନୟ ରେଡ୍ଡୀ ଆମେରିକାର ଓହିଓରେ ବଢିଥିଲେ। ରେଡ୍ଡୀ ମିଆମି ବିଶ୍ୱବିଦ୍ୟାଳୟରୁ ସ୍ନାତକୋତ୍ତର ଶିକ୍ଷା ସମାପ୍ତ କରିଥିଲେ। ବାଇଡେନ ୨୦୧୩-୧୭ ପର୍ଯ୍ୟନ୍ତ ଆମେରିକାର ଉପରାଷ୍ଟ୍ରପତି ଥିଲେ। ଏହି ସମୟରେ ରେଡ୍ଡୀ ତାଙ୍କ ଭାଷଣ ଲେଖୁଥିଲେ। ଏହାପୂର୍ବରୁ ଜୋ ବାଇଡେନ ଏବଂ କମଲା ହାରିସଙ୍କ ପାଇଁ ଆମେରିକାର ରାଷ୍ଟ୍ରପତି ନିର୍ବାଚନ ପ୍ରଚାର ସମୟରେ ବିନୟ ରେଡ୍ଡୀ ଭାଷଣ ଲେଖିଥିଲେ। ରେଡ୍ଡୀ ହେଉଛନ୍ତି ପ୍ରଥମ ଭାରତୀୟ ଆମେରିକୀୟ ଯିଏକି ନୂତନ ଭାବେ ନିର୍ବାଚିତ ରାଷ୍ଟ୍ରପତିଙ୍କ ପାଇଁ ଭାଷଣ ଲେଖକ ଭାବେ ନିଯୁକ୍ତି ପାଇଛନ୍ତି।
ବିନୟ ରେଡ୍ଡୀଙ୍କ ପିତାଙ୍କ ନାମ ନାରାୟଣ ରେଡ୍ଡୀ। ସେ ପୋଥେରଡିପେଟ ଗ୍ରାମରେ ତାଙ୍କର ପ୍ରାଥମିକ ଶିକ୍ଷା ଗ୍ରହଣ କରିଥିଲେ।ଏହା ପରେ ସେ ହାଇଦ୍ରାବାଦରୁ ଏମ୍ବିବିଏସ୍ ଅଧ୍ୟୟନ କରିଥିଲେ। ସେ ୧୯୭୦ରେ ଆମେରିକା ଯାଇଥିଲେ। ବିନୟ ଆମେରିକାରେ ଜନ୍ମଗ୍ରହଣ କରିଥିଲେ। ତାଙ୍କ ପରିବାର ସବୁବେଳେ ତାଙ୍କ ଗାଁ ସହିତ ଜଡିତ ରହିଆସିଛନ୍ତି। ଏହି ପରିବାରର ତିନି ଏକର ଜମି ଏବଂ ଗାଁରେ ଗୋଟିଏ ଘର ଅଛି। ନାରାୟଣ ରେଡ୍ଡୀ ଏବଂ ତାଙ୍କ ସ୍ତ୍ରୀ ବିଜୟା ରେଡ୍ଡୀ ଏବେ ମଧ୍ୟ ଗାଁ ପରିଦର୍ଶନ କରୁଛନ୍ତି। ସେ ଶେଷ ଥର ପାଇଁ ଫେବୃଆରୀ ୨୦୨୦ରେ ଆସିଥିଲେ। ସୂଚନାଯୋଗ୍ୟ, ଆମେରିକାର ରାଷ୍ଟ୍ରପତି ବାଇଡେନ ଶପଥ ଗ୍ରହଣ କରିବା ପୂର୍ବରୁ ୨୦ ଜଣ ଆମେରିକୀୟ ଭାରତୀୟଙ୍କୁ ତାଙ୍କ ପ୍ରଶାସନରେ ରଖିଥିଲେ।
