ବାଗଦାଦ,୨୮ ।୭: କିଛିଦିନ ପୂର୍ବେ ପଡୋଶୀ ଦେଶ ଶ୍ରୀଲଙ୍କାରେ ଆର୍ଥିକ ସଙ୍କଟ ଯୋଗୁ ସୃଷ୍ଟି ହୋଇଥିବା ରାଜାନୈତିକ ଅସ୍ଥିରତା କାରଣରୁ ଲକ୍ଷ ଲକ୍ଷ ପ୍ରଦର୍ଶନକାରୀ ସଡ଼କ ଉପରକୁ ଚାଲି ଆସିଥିଲେ । ପରେ ଏମାନେ ରାଷ୍ଟ୍ରପତି ଭବନକୁ ନିଜ କବଜାକୁ ନେଇ ଯାଇଥିଲେ । ଏବେ ଏମିତି କିଛି ଘଟଣା ଇରାକରେ ଦେଖିବାକୁ ମିଳିଛି । ସେଠାରେ ଭ୍ରଷ୍ଟାଚାର ଓ କୁଶାସନରେ ଅତିଷ୍ଠ ହୋଇ ପଡିଥିବା ଜନତା ସଂସଦ ଭବନକୁ ନିଜ କବଜାକୁ ନେଇ ଯାଇଛନ୍ତି ।
ସ୍ଥାନୀୟ ସମାଚାର ଏଜେନ୍ସି ଶଫାକର ସୂଚନା ଅନୁଯାୟୀ, ପ୍ରଦର୍ଶନକାରୀ ଇରାକର ରାଜଧାନୀ ବାଗଦାଦରେ ଥିବା ସଂସଦ ଭବନରେ ଭଙ୍ଗାରୁଜା କରିଛନ୍ତି । ଭ୍ରଷ୍ଟାଚାର ଓ କୁଶାସନକୁ ବିରୋଧ କରି ପ୍ରଦର୍ଶନକାରୀ ବାଗଦାଦୀ ନାଗରିକ ସଂସଦ ଭବନ ଭିତରେ ପ୍ରବେଶ କରିଛନ୍ତି । କିଛି ସମୟ ପରେ ଅବଶ୍ୟ ସେମାନେ ସେଠାରୁ ପଳାଇ ଆସିଥିବା ଦେଖାଯାଇଛି ।
ସ୍ଥାନୀୟ ସମାଚାର ଏଜେନ୍ସିର ସୂଚନା ଅନୁଯାୟୀ, ବାଗଦାଦ ସଂସଦରେ ଭଙ୍ଗାରୁଜା କରିଥିବା ପ୍ରଦର୍ଶନକାରୀ ଜଣେ ପ୍ରଭାବଶାଳୀ ମୌଲବି ମୁଫଦା ଅଲ–ସଦରଙ୍କ ସମର୍ଥନରେ କରିଥିବା କୁହାଯାଉଛି । ଖବର ଅନୁଯାୟୀ, ପ୍ରଦର୍ଶନକାରୀ ବିରୋଧ ସମୟରେ ହାତରେ ଶିୟା ନେତା ଅଲ-ସଦରଙ୍କ ଫଟୋ ଧରିଥିବା ଦେଖାଯାଇଥିଲା ।
