ଆନନ୍ଦପୁର,୨ା୫(ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ଆନନ୍ଦପୁର ବ୍ଲକ ମୋଚିନ୍ଦ। ପଞ୍ଚାୟତର ଏକ ଠିକାକାମକୁ ନେଇ ବ୍ଲକ ଏମ୍ପି ପ୍ରତିନିଧି ବ୍ଲକ ସହକାରୀ ଯନ୍ତ୍ରୀଙ୍କୁ ଗାଳିଗୁଲଜ ଘଟଣାକୁ ନେଇ ଥାନାରେ ଲିଖିତ ଅଭିଯୋଗ ହୋଇଥିଲା। ପୋଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନ ହେବାରୁ ବ୍ଲକ କର୍ମଚାରୀମାନେ ମଙ୍ଗଳବାର ଦିନଠାରୁ କଲମ ଛାଡ଼ ଆନ୍ଦୋଳନ ଜାରି ରଖିଛନ୍ତି। ବ୍ଲକ କର୍ମୀଚାରୀମାନେ ବ୍ଲକ ଏମ୍ପି ପ୍ରତିନିଧି ଟୁକୁନା ମହାନ୍ତଙ୍କ ଗିରଫ ଦାବି ଓ ଅନ୍ୟ ସହଯୋଗୀଙ୍କ ଉପରେ କାର୍ଯ୍ୟାନୁଷ୍ଠାନ ଜିଦ୍ରେ ଅଟଳ ରହିଥିବା ବେଳେ, ମଙ୍ଗଳବାରଠାରୁ ଆନ୍ଦୋଳନ ଜାରିରହିଥିବା ବେଳେ ଘଟଣାକୁ ନେଇ ବୁଧବାର ଆନନ୍ଦପୁର ଉପଜିଲାପାଳ ନୀଳମାଧବ ସୁନା, ଏସ୍ଡିପିଓ ପ୍ରଶାନ୍ତ କୁମାର ବେହେରା, ଆନନ୍ଦପୁର ଥାନା ଅଧିକାରୀ ଫନୀଦ୍ର କୁମାର ନାୟକ କର୍ମଚାରୀଙ୍କ ଆନ୍ଦୋଳନ ସ୍ଥଳରେ ଉପସ୍ଥିତ ରହି ଆଲୋଚନା କରିଥିଲେ ବି କୌଣସି ପ୍ରତିଶ୍ରୁତି ନ ମିଳିବାରୁ ଆନ୍ଦୋଳନ ଜାରି ରହିଥିଲା। ଗୁରୁବାର ଆନ୍ଦୋଳନ ଜାରି ରହିଥିବା ବେଳେ କୌଣସି ପ୍ରଶାସନିକ ଅଧିକାରୀ ପହଞ୍ଚି ନଥିଲା ବେଳେ ଶୁକ୍ରବାର ଆନ୍ଦୋଳନ ୪ ଦିନରେ ପହଞ୍ଚିଛି। ଆନ୍ଦୋଳନରତ କର୍ମଚାରୀମାନେ ଉପଜିଲାପାଳଙ୍କୁ ଆସିବା ବାଟକୁ ଚାହିଁ ବସିଥିଲେ ହେଲେ ଉପଜିଲାପାଳ ଘଟଣାସ୍ଥଳରେ ପହଞ୍ଚ ନଥିବା ବେଳେ ଆନ୍ଦୋଳନ ଜାରି ରହିଥିଲା l ଏ ପଟେ ବ୍ଲକ କାର୍ଯ୍ୟାଳୟକୁ ହିତାଧିକାରୀମାନେ ଅନେକ ସମସ୍ୟାକୁ ନେଇ ଆସି ଫେରିବାକୁ ପଡୁଛି। ଯାହା ଫଳରେ ବୋହୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ଅନ୍ୟପକ୍ଷରେ ଥାନାରେ ହୋଇଥିବା ଲିଖିତ ଅଭିଯୋଗକୁ ନେଇ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ବିଫଳ ହେବା ସମସ୍ତଙ୍କୁ ନିରାଶ କରିଛି।
