ବରଗଡ଼,୧୪।୭(ପ୍ରେମାନନ୍ଦ ଖମାରୀ):ବରଗଡ଼ ବ୍ଲକରେ ସରକାର ଘୋଷଣା କରିଥିବା ବିଭିନ୍ନ କଲ୍ୟାଣକାରୀ ଯୋଜନା ହିତାଧିକାରୀଙ୍କ ପାଖକୁ ଠିକ୍ ଭାବେ ପହଞ୍ଚିପାରୁନାହିଁ। ଏଭଳି ଅଭିଯୋଗ ନେଇ ସୋମବାର ବରଗଡ଼ର ପୂର୍ବତନ ବିଧାୟକ ସାଧୁ ନେପାକ ସ୍ଥାନୀୟ ବିଡିଓ ବେର୍ସିଅସ୍ ଡୁଙ୍ଗଡୁଙ୍ଗଙ୍କୁ ସାକ୍ଷାତ କରି ଆଲୋଚନା ସହିତ ବିଭିନ୍ନ ଦାବି ଉପସ୍ଥାପନ କରିଥିଲେ। ଅନଲାଇନ୍ ବ୍ୟବସ୍ଥାରେ ପ୍ରଦାନ କରାଯାଉଥିବା ବିଭିନ୍ନ ସାମାଜିକ ସୁରକ୍ଷା ଭତ୍ତାର ହିତାଧିକାରୀମାନେ ଗତ ୩ରୁ ୪ ମାସ ହେଲା ସେମାନଙ୍କ ପ୍ରାପ୍ୟ ଅର୍ଥରାଶି ପାଇ ପାରି ନ ଥିବା, ଅଧିକାଂଶ କ୍ଷେତ୍ରରେ ଆଧାର ଲିଙ୍କ୍ ନାହିଁ ବୋଲି ଦର୍ଶାଯାଉଥିବାରୁ ବୃଦ୍ଧ, ଦିବ୍ୟାଙ୍ଗ ଓ ଅସହାୟ ଲୋକମାନେ ଅକଥନୀୟ ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି ବୋଲି ନେପାକ ଅଭିଯୋଗ କରିଥିଲେ। ସେହିପରି ୮୦ ବର୍ଷରୁ ଅଧିକ ବୟସ୍କ ଏବଂ ୮୦ ପ୍ରତିଶତରୁ ଅଧିକ ଦିବ୍ୟାଙ୍ଗ ଥିବା ହିତାଧିକାରୀମାନେ ମାସିକ ୧,୦୦୦ ଟଙ୍କା ପରିବର୍ତ୍ତେ ୩,୫୦୦ ଟଙ୍କା ପାଇବାକୁ ଯୋଗ୍ୟ ହୋଇଥିଲେ ମଧ୍ୟ ପଞ୍ଚାୟତ ନିର୍ବାହୀ ଅଧିକାରୀଙ୍କ ଅବହେଳା ଓ ଉଦାସୀନତା କାରଣରୁ ସେମାନେ ଏହି ସୁବିଧାରୁ ବଞ୍ଚିତ ହେଉଥିବା ସେ ଅଭିଯୋଗ କରିଥିଲେ। ଏହାବ୍ୟତୀତ ବାର୍ଦ୍ଧକ୍ୟ ଭତ୍ତା, ହରିଶ୍ଚନ୍ଦ୍ର ସହାୟତା ଯୋଜନା, ଆବାସ ଯୋଜନା, ଏନ୍.ଏଫ୍.ବି.ଏସ୍., ଅନ୍ତ୍ୟୋଦୟ ଯୋଜନା, ରାସନ କାର୍ଡ ଓ ଅନ୍ୟାନ୍ୟ କଲ୍ୟାଣକାରୀ ଯୋଜନାର ସୁବିଧା ମଧ୍ୟ ଅନେକ ଯୋଗ୍ୟ ପରିବାରଙ୍କ ନିକଟରେ ପହଞ୍ଚି ପାରୁନାହିଁ ବୋଲି ଅଭିଯୋଗ କରି ବିହିତ ପଦକ୍ଷେପ ନେବାକୁ ପୂର୍ବତନ ବିଧାୟକ ନେପାକ ବିଡ଼ିଓଙ୍କଠାରେ ଦାବି ଉପସ୍ଥାପନ କରିଥିଲେ। ଏହି ସମସ୍ୟାଗୁଡ଼ିକର ଶୀଘ୍ର ସମାଧାନ କରା ନ ଗଲେ ଆଗାମୀ ଦିନରେ ଗଣତାନ୍ତ୍ରିକ ଉପାୟରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ସେ ଚେତାବନୀ ଦେଇଥିଲେ। ବରଗଡ଼ ବ୍ଲକ କଂଗ୍ରେସ ସଭାପତି ରାଜେଶ ମହାପାତ୍ର, ଗଙ୍ଗାଧର ପୂଝାରୀ, ପ୍ରମୋଦ ସାହୁ, ଅମନ ଦ୍ୱିବେଦୀ, ଉପେନ୍ଦ୍ର ଘିବେଲା, ଭୋଲା ଲୁହା, ସୁଶୀଲ ସାହୁ, ରାଜେଶ ପଧାନ, ଟିକେଶ୍ୱର ସାହୁଙ୍କ ସମେତ ବହୁ କଂଗ୍ରେସ କର୍ମୀ ଉପସ୍ଥିତ ଥିଲେ।