ଲୋଇସିଂହା,୧୧।୪(ସୁଶାନ୍ତ ବାରିକ):ପାନୀୟ ଜଳ ଯୋଗାଣ ବ୍ୟାହତ ଯୋଗୁ ବଲାଙ୍ଗୀର ଜିଲା ଲୋଇସିଂହା ତହସିଲ ଅଧୀନ ଛେଲବାହାଲ ବାଲିଘାଟ ଲିଜ୍କୁ ରଦ୍ଦ କରିବାକୁ ଛେଲବାହାଲ ଗ୍ରାମବାସୀ ସ୍ଥାନୀୟ ବିଧାୟକ ତଥା ସ୍ବାସ୍ଥ୍ୟମନ୍ତ୍ରୀଙ୍କ ନିକଟରେ ଫେରାଦ ହୋଇଛନ୍ତି। ଏହି ଅଭିଯୋଗ ପାଇ ମନ୍ତ୍ରୀ ମହାଲିଙ୍ଗ ବଲାଙ୍ଗୀର ଜିଲାପାଳ ଓ ଲୋଇସିଂହା ପୋଲିସ ସହ କଥା ହୋଇ ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ କରିଥିବା ଗ୍ରାମବାସୀ ଜଣାଇଛନ୍ତି। ଲୋଇସିଂହା ବ୍ଲକ ଯୋଗୀସର୍ଡା ପଞ୍ଚାୟତ ଅଧୀନ ଛେଲବାହାଲ ନିକଟସ୍ଥ ସୁକତେଲ ନଦୀରୁ ପଞ୍ଚାୟତର ସମସ୍ତ ଗ୍ରାମକୁ ପାଇପ ଜଳ ଯୋଗାଣ ହେଉଛି। କିନ୍ତୁ ପାନୀୟ ପ୍ରକଳ୍ପ ଗ୍ୟାଲେରୀ ଉପରୁ ବାଲି ଉଠାଣ କରାଯାଉଛି। ଟ୍ରକ ଓ ହାଇୱା ଯୋଗେ ଜିଲା ତଥା ଜିଲା ବାହାରକୁ ବାଲି ଚାଲାଣ କରାଯାଉଛି ା ଫଳସ୍ବରୂପ ଜଳସ୍ତର କମି ଯାଉଥିବାରୁ ପ୍ରକଳ୍ପ ଯୋଗେ ପାନୀୟ ଜଳ ଯୋଗାଣ ବଧାପ୍ରାପ୍ତ ହେଉଛି ା ପଞ୍ଚାୟତର ୧୦ ହଜାର ଲୋକ ପିଇବା ପାଣି ନେଇ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଲୋକଙ୍କ ଅଭିଯୋଗ ପାଇ ପଞ୍ଚାୟତ କର୍ତ୍ତୃପକ୍ଷ ତହସିଲଠାରୁ ଆରମ୍ଭ କରି ଜିଲା ପ୍ରଶାସନ ପର୍ଯ୍ୟନ୍ତ ଏହି ସମସ୍ୟା ନେଇ ଦୃଷ୍ଟି ଆକର୍ଷଣ କରିଛନ୍ତି। କିନ୍ତୁ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ। ଏହାଛଡା ଟ୍ରକ ଓ ହାଇୱା ଚଳାଚଳ ଯୋଗୁ ନଦୀକୁ ଯାଇଥିବା ମାଟି ରାସ୍ତା ଶୋଚନୀୟ ହେବାରେ ଲାଗିଛି। ଏଣୁ ବାଲିଘାଟ ଲିଜ୍ ଯଥାଶୀଘ୍ର ରଦ୍ଦ କରା ନ ଗଲେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି।
Dharitri – Odisha’s No.1 Odia Daily
