ନୂଆପଡ଼ା,୨୯ା୫ (ମକାରୁ ବେମାଲ):ନୂଆପଡ଼ା ଜିଲା ସଦର ମହକୁମା ୩୫୩ନଂ. ଜାତୀୟ ରାଜପଥ ପାର୍ଶ୍ୱରେ ଜବରଦଖଲ କରି ଦୋକାନ କରିଥିବା ବ୍ୟବସାୟୀଙ୍କୁ ୭ ଦିନ ଭିତରେ ଖାଲି କରିବା ପାଇଁ ନୂଆପଡା ଏନ୍ଏସି ପକ୍ଷରୁ ନୋଟିସ ଜାରି କରାଯାଇଛି। ଏହାକୁ ବିରୋଧ କରି ଟ୍ରେଡ ୟୁନିଅନ ସଭାପତି ସରୋଜ କୁମାର ସାହୁଙ୍କ ଆହ୍ବାନକ୍ରମେ ଓ ବଣିକ ସଂଘ ସଭାପତି ହରିଶ୍ଚନ୍ଦ୍ର ପଣ୍ଡାଙ୍କ ନେତୃତ୍ୱରେ ବୁଧବାର ୮ ଘଣ୍ଟିଆ ବନ୍ଦ ଡାକରା ଦିଆଯାଇଥିଲା। ଏଥିଯୋଗୁ ସହରରେ ଥିବା ଛୋଟ ବଡ ପାଖାପାଖି ୨ ଶହ ଦୋକାନ, ଡେଲି ମାର୍କେଟ ଓ ଅନ୍ୟାନ୍ୟ ଦୋକାନ ବଜାର ବନ୍ଦ ରହିଥିଲା। ପୂର୍ବାହ୍ନରେ ସହରର ସମସ୍ତ ଦୋକାନୀ ଏକତ୍ରିତ ହୋଇ ଏକତା ଛକଠାରେ ସକାଳ ୭ଟାରୁ ୧୧ଟା ପର୍ଯ୍ୟନ୍ତ ଧାରଣାରେ ବସିଥିଲେ। ଏହା ପରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ। ପରେ ଜିଲାପାଳ ମଧୁସୂଦନ ଦାଶ ଧାରଣାସ୍ଥଳକୁ ଆସି ଆଲୋଚନା କରିଥିଲେ ା ଟ୍ରେଡ ୟୁନିଅନ ସଭାପତି, ବଣିକ ସଂଘ ସଭାପତି ଓ ଉଠା ଦୋକାନୀଙ୍କ ସହ ଜିଲାପାଳ ଆଲୋଚନା କରି ଉପଜିଲାପାଳ ଯୋଗେନ୍ଦ୍ର ମାଝିଙ୍କୁ ନେଇ ଏକ କମିଟି ଗଠନ କରାଯିବ। ସେହି କମିଟି ତଦନ୍ତ କଲା ପରେ ସବୁ ସମସ୍ୟାର ସମାଧାନ କରାଯିବ। ଯେପର୍ଯ୍ୟନ୍ତ ଉଠା ଦୋକାନୀଙ୍କ ସମସ୍ୟା ସମାଧାନ ନ ହୋଇଛି ସେପର୍ଯ୍ୟନ୍ତ କୌଣସି ଦୋକାନକୁ ଉଠାଯିବ ନାହିଁ ବୋଲି ଜିଲାପାଳ କହିବା ପରେ ଧାରଣା ପ୍ରତ୍ୟାହୃତ ହୋଇଥିଲା। ଏହି ସମୟରେ ଅଭିନନ୍ଦନ ପଣ୍ଡା, ଭାନୁ ପ୍ରତାପ ସିଂ ମାଝି, ରାମଚନ୍ଦ୍ର ରଥ, ରାମବିଲାଶ ଗୁପ୍ତା, ବାଲେଶ୍ୱର ସାହୁ, ଦିନନାଥ ସତନାମୀ, ଗୋବିନ୍ଦ ସାହୁ ଉପସ୍ଥିତ ଥିଲେ ା
