ନୂଆଦିଲ୍ଲୀ,୮।୧୧ : ଜମ୍ମୁ-କଶ୍ମୀରରେ ଆତଙ୍କବାଦରେ ପୀଡିତଙ୍କ ପରିବାରଙ୍କ ସୁବିଧା ପାଇଁ ସ୍ବରାଷ୍ଟ୍ର ମନ୍ତ୍ରଣାଳୟ ଏକ ବଡ଼ ନିଷ୍ପତ୍ତି ନେଇଛନ୍ତି। ଆତଙ୍କବାଦ ଦ୍ୱାରା ପ୍ରଭାବିତ ପରିବାରର ପିଲାମାନଙ୍କୁ ସରକାରୀ କଲେଜଗୁଡ଼ିକରେ ଏମବିବିଏସ ଏବଂ ବିଡିଏସ ଭଳି ମେଡିକାଲ ପାଠ୍ୟକ୍ରମରେ ଆଡମିଶନ ପାଇଁ ସଂରକ୍ଷଣ ପ୍ରଦାନ କରାଯିବ। ଏହି ନିଷ୍ପତ୍ତି ୨୦୨୨-୨୩ ଶିକ୍ଷାବର୍ଷ ପାଇଁ ମଧ୍ୟ ପ୍ରଯୁଜ୍ୟ ହେବ। ଭବିଷ୍ୟତରେ ଏହା ଜାରି ରହିବ କି ନାହିଁ ତାହାର ନିଷ୍ପତ୍ତି ନିଆଯିବ। ସ୍ବରାଷ୍ଟ୍ର ମନ୍ତ୍ରଣାଳୟ ଦ୍ୱାରା ଜାରି ବିଜ୍ଞପ୍ତିକୁ ଉପରାଜ୍ୟପାଳ ମନୋଜ ସିହ୍ନାଙ୍କ ନେତୃତ୍ୱ ସରକାର ମଧ୍ୟ ଅନୁମୋଦନ କରିଛନ୍ତି।
ମନ୍ତ୍ରଣାଳୟ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି ଯେ ଆତଙ୍କବାଦୀ ଆକ୍ରମଣରେ ଉଭୟ ପିତାମାତାଙ୍କୁ ହରାଇଥିବା ସେହି ପିଲାମାନଙ୍କୁ ପ୍ରାଥମିକତା ଦିଆଯିବ। ଯଦି ପରିବାରର ଏକମାତ୍ର ଅନ୍ନଦାତାଙ୍କର ଆତଙ୍କବାଦୀ ଆକ୍ରମଣରେ ମୃତ୍ୟୁ ଘଟିଛି କିମ୍ବା ଅକ୍ଷମ ହୋଇଯାଇଛନ୍ତି, ତା’ହେଲେ ତାଙ୍କ ପରିବାର ସଦସ୍ୟ ମଧ୍ୟ ଏହି ସୁବିଧାପାଇବେ। ଏହି ସଂରକ୍ଷଣ ସେହି ଲୋକମାନଙ୍କ ପାଇଁ ଉପଲବ୍ଧ ହେବ ଯେଉଁମାନେ ଜମ୍ମୁ-କଶ୍ମୀରର ସ୍ଥାୟୀ ବାସିନ୍ଦା। ରାଜ୍ୟ ତଥା କେନ୍ଦ୍ର ସରକାରୀ କର୍ମଚାରୀ ଏବଂ ଅନ୍ୟ ବିଭାଗର କର୍ମଚାରୀଙ୍କ ପରିବାର ସଦସ୍ୟ ମଧ୍ୟ ଏହି ସଂରକ୍ଷଣ ସୁବିଧା ପାଇବେ।
ଏହି ସଂରକ୍ଷଣର ଲାଭ ପାଇଁ ସର୍ବନିମ୍ନ ଯୋଗ୍ୟତା ମଧ୍ୟ ସରକାର ସ୍ଥିର କରିଛନ୍ତି। ବିଜ୍ଞପ୍ତିରେ କୁହାଯାଇଛି ଯେ ପଦାର୍ଥ ବିଜ୍ଞାନ, ରସାୟନ ବିଜ୍ଞାନ, ଜୀବବିଜ୍ଞାନ କିମ୍ବା ବାୟୋଟେକ୍ନୋଲୋଜି ପରି ବିଷୟଗୁଡ଼ିକରେ ଅତି କମରେ ୫୦ ପ୍ରତିଶତ ମାର୍କ ରଖିଥିବା ବିଦ୍ୟାର୍ଥୀମାନେ ହିଁ ଏହି ସଂରକ୍ଷଣ ପାଇବେ। ଏସସି,ଏସଟି, ଓବିସିଙ୍କ ପାଇଁ ୪୦ ପ୍ରତିଶତ ମାର୍କର ସୀମା ସ୍ଥିର କରାଯାଇଛି। ଦିବ୍ୟାଙ୍ଗ ବର୍ଗଙ୍କ ପାଇଁ, ଏହା ୪୫ ପ୍ରତିଶତ ରହିଛି। ଏମବିବିଏସ ଏବଂ ବିଡିଏସ ପାଠ୍ୟକ୍ରମରେ ଆଡମିଶନ ନିଟ୍ ପରୀକ୍ଷା ଯୋଗ୍ୟତା ଆଧାରରେ ସ୍ଥିର କରାଯିବ। ମନ୍ତ୍ରଣାଳୟ କହିଛି ଯେ ଜମ୍ମୁ-କଶ୍ମୀରରେ ଆତଙ୍କବାଦୀ ପୀଡିତଙ୍କ ପାଇଁ ଏହି ସଂରକ୍ଷଣ କେବଳ କେନ୍ଦ୍ରୀୟ ପୁଲ ଅନ୍ତର୍ଗତ ଆସନ ଉପରେ ଲାଗୁ ହେବ।
