ଅନୁଗୋଳ ଅଫିସ, ୭।୧୨: ଅନେକ ସମୟରେ ରୋଗୀଙ୍କ ସମ୍ପର୍କୀୟଙ୍କୁ ମାଡ଼ ମରାଯାଉଛି। ମୋବାଇଲ ଛଡ଼ାଇ ଭାଙ୍ଗି ଦିଆଯାଉଛି। ଆକ୍ରୋଶ ମନୋଭାବ ରଖି ହଇରାଣ କରାଯାଉଛି। ଦଲାଲଙ୍କ ପ୍ରବେଶ ରୋକିବା ପରିବର୍ତ୍ତେ ସେମାନଙ୍କ ସହ ସାଲିସ କରି ରୋଗୀ ଓ ସମ୍ପର୍କୀୟଙ୍କଠାରୁ ଅର୍ଥ ଠକେଇ କରାଯାଉଛି। ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟର ସୁରକ୍ଷା ଦାୟିତ୍ୱରେ ଥିବା ସୁରକ୍ଷା କର୍ମଚାରୀଙ୍କ ମଧ୍ୟରୁ କେତେଜଣଙ୍କ ବିରୋଧରେ ଏପରି ଅଭିଯୋଗ ବାରମ୍ବାର ଆସୁଛି। ଏପରି କି ସୁରକ୍ଷା କାର୍ଯ୍ୟର ଟେଣ୍ଡର ନେଇଥିବା ସଂସ୍ଥାକୁ ବଦଳାଇବାକୁ ସ୍ବର ଉଠୁଛି। ହେଲେ କାର୍ଯ୍ୟାନୁଷ୍ଠାନ ନେବା ତ ଦୂରର କଥା ବରଂ ବର୍ଷ ବର୍ଷ ଧରି ସଂସ୍ଥା ଓ ଏହାର କର୍ମଚାରୀଙ୍କୁ ସୁରକ୍ଷା ଦିଆଯାଉଛି। ମେଡିକାଲର କେତେଜଣ ଅଧିକାରୀ ନିଜ ସ୍ବାର୍ଥ ପାଇଁ ଠିକା ସଂସ୍ଥା ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ସାଧାରଣରେ ଅଭିଯୋଗ ହେଉଛି।
ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ଉପରେ ଅନୁଗୋଳ ସହ ପଡ଼ୋଶୀ ଜିଲା ଢେଙ୍କାନାଳ, ଦେବଗଡ଼, ବୌଦ୍ଧର ବହୁ ରୋଗୀ ନିର୍ଭରଶୀଳ। ହେଲେ ସେମାନଙ୍କ ମଧ୍ୟରୁ ଅନେକେ ବିଭିନ୍ନ ସମୟରେ ଏଠାରେ ଠକେଇ, ଆକ୍ରମଣ ସହ ନାନା ଅସୁବିଧାର ସମ୍ମୁଖୀନ ହୋଇଛନ୍ତି। ବିଶେଷକରି ମୁଖ୍ୟ ଚିକିତ୍ସାଳୟର କେତେଜଣ ସୁରକ୍ଷାକର୍ମୀ ଆକ୍ରୋଶମୂଳକ ମନୋଭାବ ପୋଷଣ କରୁଥିବା ଅଭିଯୋଗ ହେଉଛି। ଏ ନେଇ ବାରମ୍ବାର କର୍ତ୍ତୃପକ୍ଷଙ୍କ ନିକଟରେ ଆପତ୍ତି କରାଯାଉଥିଲେ ମଧ୍ୟ କାର୍ଯ୍ୟନୁଷ୍ଠାନ ନିଆଯାଉ ନାହିଁ। ଫଳରେ ସୁରକ୍ଷା କର୍ମୀ ଯୋଗାଉଥିବା ସଂସ୍ଥା ଓ ଏହାର କର୍ମଚାରୀମାନଙ୍କ ମନମୁଖି କାର୍ଯ୍ୟ ବଢ଼ିବାରେ ଲାଗିଥିବା ଆଲୋଚନା ହେଉଛି। ସୁରକ୍ଷା କର୍ମଚାରୀଙ୍କ ଉପସ୍ଥିତିରେ ମେଡିକାଲ ପରିସରରୁ ଗାଡ଼ି ଚୋରି ହେଉଛି। ରୋଗୀମାନେ ବେଡ୍ରୁ ଉଠି କେଉଁଆଡ଼େ ପଳାଇ ଯାଉଛନ୍ତି। ଏପରି କି ଜଣେ ସୁରକ୍ଷା କର୍ମୀ ରୋଗୀଙ୍କୁ ଇଞ୍ଜେକଶନ ଲଗାଯାଉଥିବା ଦୃଶ୍ୟ ଅତୀତରେ ଦେଖିବାକୁ ମିଳିଛି। ସୁରକ୍ଷା ଦାୟିତ୍ୱରେ ରହିଥିବା କର୍ମଚାରୀଙ୍କ ମଧ୍ୟରୁ କେତେଜେଣ ନକଲି ସାର୍ଟିଫିକେଟ୍ ଦେଇ ତ ଆଉ କେତେଜଣ ହାତ ଗୁଞ୍ଜା ଦେଇ ଚାକିରି ପାଇଥିବା ଯୋଗ୍ୟତା ଅନୁଧ୍ୟାନ ବେଳେ ସଂସ୍ଥା ଜାଣିବାକୁ ପାଇଛି। ହେଲେ କୌଣସି କାର୍ଯ୍ୟାନୁଷ୍ଠାନ ହେଉନାହିଁ। ଗତ ରବିବାର ମେଡିକାଲରେ ବି-ସିପ୍ଟରେ ୩୦ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଇଥିଲା। କିନ୍ତୁ କିଏ ମେଳା ଦେଖିବାକୁ ତ ଆଉ କିଏ ଭୋଜି କରିବାକୁ ଯାଇଥିବାରୁ ମାତ୍ର ୧୯ ଜଣ କର୍ମଚାରୀ ଡ଼୍ୟୁଟି କରିଥିବା ଆଲୋଚନା ହେଉଛି। ମେଡିକାଲ ପରିସରରେ ଦଲାଲ୍ଙ୍କ ଠାରୁ ଆରମ୍ଭ କରି ଗାଡ଼ି ଚୋରି କରୁଥିବା ଦୁର୍ବୃତ୍ତମାନେ ସକ୍ରିୟ ରହିଥିଲେ ମଧ୍ୟ ସୁରକ୍ଷା କର୍ମୀମାନେ ସେମାନଙ୍କୁ ଧରିପାରୁ ନାହାନ୍ତି। ରାତି ହେଲେ କେତେଜଣ ସୁରକ୍ଷାକର୍ମୀ ଡ୍ୟୁଟିରେ ଥାଇ ବି ଶୋଇ ପଡ଼ୁଥିବା ଅଭିଯୋଗ ହେଉଛି। ସୁରକ୍ଷା ଦାୟିତ୍ୱ ନେଇଥିବା ସଂସ୍ଥା ଠିକ୍ ସମୟରେ ଗୃହ ବିଭାଗରେ ପ୍ରମାଣପତ୍ର ଦାଖଲ କରୁନାହିଁ। କିନ୍ତୁ ଉକ୍ତ ସଂସ୍ଥାକୁ ବାରମ୍ବାର ଟେଣ୍ଡର ଦିଆଯାଇ ଦାୟିତ୍ୱ ପ୍ରଦାନ କରାଯାଉଛି। କାହାର ସ୍ବାର୍ଥକୁ ଦୃଷ୍ଟିରେ ରଖାଯାଇ ଏଭଳି କାର୍ଯ୍ୟ କରାଯାଉଛି ତାହାକୁ ନେଇ ବୁଦ୍ଧିଜୀବୀମାନେ ପ୍ରଶ୍ନ କରିଛନ୍ତି।
ସମସ୍ତଙ୍କୁ ଅବଗତ କରାଯାଇଛି
ସୁରକ୍ଷାକର୍ମୀମାନେ ବିଭିନ୍ନ ସମୟରେ କାର୍ଯ୍ୟରେ ଖିଲାଫ କରୁଛନ୍ତି। ଏ ନେଇ ଠିକା ସଂସ୍ଥାକୁ ଅବଗତ କରାଯାଇଛି। ଏପରି କି ତାଙ୍କୁ ପରଫରମାନ୍ସ ସାର୍ଟିଫିକେଟ୍ ମଧ୍ୟ ମଗାଯାଇଛି। କାର୍ଯ୍ୟ ଠିକ୍ କରିବାକୁ ଚେତାବନୀ ଦିଆଯାଇଛି। ହେଲେ ସ୍ଥିତିରେ ସୁଧାର ଆସୁନାହିଁ। ଆଗାମୀ ଦିନରେ କାର୍ଯ୍ୟ ଠିକ୍ ଭାବେ ପରିଚାଳନା ନ ହେଲେ ପୁନଃ ଟେଣ୍ଡର ଯୋଜନା କରାଯିବ।
– ମାନସ ରଞ୍ଜନ ବିଶ୍ୱାଳ, ଏଡିଏମ୍ଓ (ମେଡିକାଲ)
ସୁରକ୍ଷା ବ୍ୟବସ୍ଥା ଭୁଶୁଡ଼ି ପଡ଼ିଛି
ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ସୁରକ୍ଷା ବ୍ୟବସ୍ଥା ଭୁଶୁଡ଼ି ପଡ଼ିଛି। ମେଡିକାଲରୁ ସାମଗ୍ରୀ ଚୋରି ଘଟଣା ବଢ଼ିଚାଲିଛି। ଅନେକ ସମୟରେ ରୋଗୀ ଓ ସମ୍ପର୍କୀୟଙ୍କୁ ଦୁର୍ବ୍ୟବହାର ସହ ମାଡ଼ ମରାଯାଉଛି। ଏ ନେଇ ଅଭିଯୋଗ ସତ୍ତ୍ୱେ କାର୍ଯ୍ୟାନୁଷ୍ଠାନ ଶୂନ।
– କିଶୋର କୁମାର ସାହୁ, ଅନୁଗୋଳ
ଚିତ୍ର ନିରାଶାଜନକ
ଜିଲାର ମୁଖ୍ୟ ଚିକିତ୍ସାଳୟ ହୋଇଥିବାରୁ ଏଠାରେ ସବୁକିଛି ଠିକ୍ଠାକ୍ ରହିବା କଥା। କିନ୍ତୁ ଏଠାକାର ସୁରକ୍ଷା ବ୍ୟବସ୍ଥା ନିଶ୍ଚିତ ନିରାଶାଜନକ। ବେଡ୍ରୁ ଉଠି ରୋଗୀ କେଉଁଆଡ଼େ ପଳାଉଥିବା ବେଳେ ସୁରକ୍ଷାକର୍ମୀ ଜାଣିପାରୁ ନାହାନ୍ତି। ଚୋରି ବଢ଼ୁଥିବା ବେଳେ ପାର୍କିଂ ବ୍ୟବସ୍ଥା ଠିକ୍ ଭାବେ କରାଯାଉନାହିଁ। – ବିଶ୍ୱରଞ୍ଜନ ପଟ୍ଟନାୟକ, ଅନୁଗୋଳ
ତାଲିମ ଅଭାବ ରହିଛି
ସରକାରୀ ସ୍ବାସ୍ଥ୍ୟକେନ୍ଦ୍ରରେ ରୋଗୀଙ୍କୁ ଯେପରି ଉତ୍ତମ ସେବା ମିଳିବ ତାହା ଉପରେ ସରକାର ଗୁରୁତ୍ୱ ଦେଉଛନ୍ତି। ହେଲେ ଅନୁଗୋଳ ମେଡିକାଲରେ ରୋଗୀମାନେ ବିଭିନ୍ନ ସମୟରେ ଶୋଷଣ ଓ ରୋଷର ଶିକାର ହେଉଛନ୍ତି। କେତେଜଣ ସୁରକ୍ଷାକର୍ମୀ ଉତ୍ତମ ବ୍ୟବହାର ପ୍ରଦର୍ଶନ କରୁନାହାନ୍ତି। ଉପଯୁକ୍ତ ତାଲିମର ଅଭାବ ଓ ଦୁର୍ବଳ ମାନସିକତା ପାଇଁ ଏପରି ଅବ୍ୟବସ୍ଥା ଦେଖିବାକୁ ମିଳୁଛି।
– କଲ୍ୟାଣ କିଶୋର ମହାନ୍ତି, ପୂର୍ବତନ ସଦସ୍ୟ, ରୋଗୀ କଲ୍ୟାଣ ସମିତି
