ଭୁବନେଶ୍ୱର,୨୮।୯(ବ୍ୟୁରୋ): ଆପାର୍ଟମେଣ୍ଟ କିଣୁଥିବା କ୍ରେତାଙ୍କୁ ମିଳିବ ସୁରକ୍ଷା। ରାଜ୍ୟ ସରକାର ଓଡ଼ିଶା ରିୟଲ ଇଷ୍ଟେଟ (ରେଗୁଲେଶନ ଆଣ୍ଡ ଡେଭଲପ୍ମେଣ୍ଟ) ରୁଲ୍ସ-୨୦୧୭ର ସଂଶୋଧନ କରିଛନ୍ତି। ଓଡ଼ିଶା ରିୟଲ ଇଷ୍ଟେଟ(ରେଗୁଲେଶନ ଆଣ୍ଡ ଡେଭଲପ୍ମେଣ୍ଟ) ସଂଶୋଧିତ ରୁଲ୍ସ-୨୦୨୨ କାର୍ଯ୍ୟକାରୀ ହେବ। ସଂଶୋଧନ ରୁଲ୍ସ ଅନୁଯାୟୀ ନିର୍ମାତା ପ୍ରକଳ୍ପ ଶେଷ ହେବାର ଧାର୍ଯ୍ୟ ତାରିଖ ପରେ କ୍ରେତାଙ୍କଠାରୁ କୌଣସି ଅତିରିକ୍ତ ଦେୟ ନେଇପାରିବେ ନାହିଁ। ଆପାର୍ଟମେଣ୍ଟରେ ଥିବା କମନ ଏରିଆକୁ କୌଣସି କ୍ରେତା ଭାଗ କରି ନିଜ ଦଖଲରେ ରଖିପାରିବେ ନାହିଁ। ସ୍ବୀକୃତିପ୍ରାପ୍ତ କର୍ତ୍ତୃପକ୍ଷଙ୍କଠାରୁ ଆକୁପାନ୍ସି ସାର୍ଟିଫିକେଟ ପାଇବା ପରେ ପ୍ରମୋଟର ଆପାର୍ଟମେଣ୍ଟ ଆସୋସିଏଶନକୁ ଉକ୍ତ କମନ ଏରିଆ ପ୍ରଦାନ କରିବେ। ଘର କିଣିବାକୁ ପଞ୍ଜୀକରଣ କରିଥିବା ବ୍ୟକ୍ତି ନିର୍ମାଣ ସମୟରେ ପ୍ରକଳ୍ପ ପରିଦର୍ଶନ କରିପାରିବେ। ପ୍ରମୋଟରମାନେ ନିର୍ଦ୍ଧାରିତ ସମୟରେ ପ୍ରକଳ୍ପ ଶେଷ କରିବେ। ଘର ନେବା ପରେ କ୍ରେତାମାନେ କମନ ଏରିଆ ପରିଚାଳନା ଫି’ ପ୍ରମୋଟର କିମ୍ବା ଆପାର୍ଟମେଣ୍ଟ ଆସୋସିଏଶନକୁ ପ୍ରଦାନ କରିବା ନେଇ ସଂଶୋଧିତ ରୁଲ୍ସରେ ବ୍ୟବସ୍ଥା ରହିଛି। ଏହି ସଂଶୋଧିତ ରୁଲ୍ସ ଅନୁଯାୟୀ ଘର ବିକିବା ପାଇଁ ଆପାର୍ଟମେଣ୍ଟ ନିର୍ମାଣ କରୁଥିବା ପ୍ରମୋଟରମାନେ କ୍ରେତାଙ୍କ ସହ ଏଗ୍ରିମେଣ୍ଟ କରିବେ। ମଙ୍ଗଳବାର ରାଜ୍ୟ ସରକାର ରେଜିଷ୍ଟ୍ରେଶନକୁ ନେଇ ଦାଏର ହୋଇଥିବା ମାମଲାର ଶୁଣାଣି ବେଳେ ହାଇକୋର୍ଟଙ୍କୁ ଏ ବିଷୟରେ ଅବଗତ କରାଇଛନ୍ତି। ସର୍ବୋଚ୍ଚ ଅଦାଲତ ନୂତନ ନିୟମ ଅନୁସାରେ ଗ୍ରାହକଙ୍କୁ ଘର ବିକିବା ପୂର୍ବରୁ ପଞ୍ଜୀକରଣ କରିବାକୁ ଓରେରାକୁ ନିର୍ଦ୍ଦେଶ ଦେଇଛନ୍ତି। ଗତ ୬ ମାସ ଧରି ଆପାର୍ଟମେଣ୍ଟ ବିକ୍ରି ଉପରେ ଲାଗିଥିବା ରୋକ ହଟିଯାଇଛି। ଏଣିକି ଆପାର୍ଟମେଣ୍ଟ ବିକ୍ରି ନେଇ ପଞ୍ଜୀକରଣ ହୋଇପାରିବ। ଉଲ୍ଲେଖଯୋଗ୍ୟ ପଞ୍ଜୀକରଣକୁ ନେଇ ହାଇକୋର୍ଟରେ ୨୦୨୨ ମେ’ ୧୨ରେ ଏକ ମାମଲା ଦାଏର ହୋଇଥିଲା। ସେବେଠାରୁ ଆପାର୍ଟମେଣ୍ଟ ବିକ୍ରି ପାଇଁ ଏଗ୍ରିମେଣ୍ଟ ଫର୍ ସେଲ୍ ହୋଇପାରୁ ନ ଥିଲା।
ସେହିପରି ସେଲ୍ଡିଡ୍ ବା ରେକର୍ଡ ଅଫ୍ ରାଇଟସକୁ ନେଇ ମଧ୍ୟ ହାଇକୋର୍ଟରେ ମାମଲା ଚାଲିଛି। ସେଲ୍ଡିଡ୍ କିପରି ହେବ ସେ ନେଇ ଚିଠା ପ୍ରସ୍ତାବ ପ୍ରସ୍ତୁତ ହୋଇଛି। ଇନ୍ସପେକ୍ଟର ଜେନେରାଲ ଅଫ୍ ରେଜିଷ୍ଟ୍ରେଶନ(ଆଇଜିଆର୍)ଙ୍କ ସହ ଆଲୋଚନା କରାଯାଇ ଖୁବ୍ଶୀଘ୍ର ଚୂଡ଼ାନ୍ତ କରାଯିବ ବୋଲି ସରକାର କୋର୍ଟଙ୍କୁ ଅବଗତ କରାଇଛନ୍ତି। ଏଥିସହିତ ଆପାର୍ଟମେଣ୍ଟ ସଂଘ ଗଠନ ନେଇ ରାଜ୍ୟ ସରକାର ଏକ ବାଇ-ଲ ପ୍ରସ୍ତୁତ କରିଛନ୍ତି। ଏହାକୁ କାର୍ଯ୍ୟକାରୀ କରିବାକୁ ଓରେରାକୁ ଦାୟିତ୍ୱ ଦିଆଯାଇଛି। ଆପାର୍ଟମେଣ୍ଟ ମାଲିକାନା ଆଇନ ଖୁବ୍ଶୀଘ୍ର ଆସିବ। ଏ ନେଇ ଚିଠା ପ୍ରସ୍ତୁତ ହୋଇଛି। ଖୁବ୍ଶୀଘ୍ର ଏହା କାର୍ଯ୍ୟକାରୀ ହେବ ବୋଲି ସୂଚନା ଦିଆଯାଇଛି। ଆସନ୍ତା ନଭେମ୍ବର ୨୭ ତାରିଖରେ ହେବାକୁ ଥିବା ପରବର୍ତ୍ତୀ ଶୁଣାଣି ବେଳେ ରାଜ୍ୟ ସରକାର ସତ୍ୟପାଠ ଆକାରରେ ତାହା ପ୍ରଦାନ କରିବେ ବୋଲି କୋର୍ଟଙ୍କୁ ଜଣାଇଛନ୍ତି।
