ନୂଆଦିଲ୍ଲୀ, ୨୪।୮ (ପି.ଟି.): ନୂତନ ଜାତୀୟ ଶିକ୍ଷାନୀତି (ଏନ୍ଇପି) କାର୍ଯ୍ୟକାରୀ କରିବା ନିମନ୍ତେ କେନ୍ଦ୍ର ଶିକ୍ଷା ମନ୍ତ୍ରଣାଳୟ ସାରା ଦେଶରୁ ସ୍କୁଲ୍ ଶିକ୍ଷକ ଓ ପ୍ରିନି୍ସପାଲମାନଙ୍କଠାରୁ ପ୍ରସ୍ତାବ ଆହ୍ବାନ କରିଛନ୍ତି। କେନ୍ଦ୍ରମନ୍ତ୍ରୀ ରମେଶ ପୋଖରିୟାଲ ନିଶଙ୍କ ରବିବାର ଏହି ସୂଚନା ଦେଇଛନ୍ତି। ଏନ୍ଇପି କାର୍ଯ୍ୟକାରିତାରେ ଶିକ୍ଷକମାନେ ମୁଖ୍ୟ ହୋଇଥିବାରୁ ସେମାନଙ୍କ ପରାମର୍ଶ ଲୋଡ଼ାଯାଇଥିବା ମନ୍ତ୍ରୀ ଟୁଇଟ୍ କରିଛନ୍ତି। ଭାରତକୁ ବିଶ୍ୱ ଜ୍ଞାନର ସୁପରପାଓ୍ବାର କରିବା ଲକ୍ଷ୍ୟରେ ୩୪ ବର୍ଷର ପୁରୁଣା ଶିକ୍ଷାନୀତି ସ୍ଥାନରେ ନୂତନ ଶିକ୍ଷାନୀତି ଆଣିବା ଲାଗି ସରକାର ନିଷ୍ପତ୍ତି ନେଇଛନ୍ତି। ଫଳରେ ସ୍କୁଲ୍ ଓ ଉଚ୍ଚତର ଶିକ୍ଷା ବ୍ୟବସ୍ଥାରେ ବଡ଼ ସଂସ୍କାର ଆଣିବା ଲକ୍ଷ୍ୟ ରଖାଯାଇଛି। ୫ମ ଶ୍ରେଣୀ ପର୍ଯ୍ୟନ୍ତ ମାତୃଭାଷା କିମ୍ବା ଆଞ୍ଚଳିକ ଭାଷାରେ ଶିକ୍ଷାଦାନ ସାଙ୍ଗକୁ ବୋର୍ଡ ପରୀକ୍ଷା ବୋଝ କମାଇବା, ମେଡିକାଲ ଓ ଆଇନ ଶିକ୍ଷା ବ୍ୟତୀତ ଅନ୍ୟ ଉଚ୍ଚତର ଶିକ୍ଷାନୁଷ୍ଠାନ ପାଇଁ ଗୋଟିଏ ନିୟାମକ, ବିଶ୍ୱବିଦ୍ୟାଳୟଗୁଡ଼ିକ ପାଇଁ ଗୋଟିଏ ପ୍ରବେଶିକା ପରୀକ୍ଷା ଆଦି ସଂସ୍କାର ନୂତନ ଶିକ୍ଷାନୀତିରେ ରହିଛି। ବର୍ତ୍ତମାନ ପ୍ରଚଳିତ ୧୦+୨ ଢାଞ୍ଚା ବଦଳରେ ୫+୩+୩+୪ ପାଠ୍ୟକ୍ରମ ଢାଞ୍ଚା କାର୍ଯ୍ୟକାରୀ ହେବ। ଶିକ୍ଷାଦାନ ପ୍ରକ୍ରିୟା କିପରି ସରଳ ହୋଇପାରିବ ତାହା ଜାଣିବା ପାଇଁ ଶିକ୍ଷକମାନଙ୍କଠାରୁ ପ୍ରସ୍ତାବ ଆହ୍ବାନ କରାଯାଇଥିବା କୁହାଯାଉଛି। ସବୁ ପ୍ରସ୍ତାବ ପହଞ୍ଚତ୍ବା ପରେ ଏନ୍ସିଇଆର୍ଟିର ବିଶେଷଜ୍ଞମାନଙ୍କର ଏକ ଟିମ୍ ଏହାକୁ ଅନୁଧ୍ୟାନ କରିବ। ଅଧିକରୁ ଅଧିକ ସ୍କୁଲ୍ର ଶିକ୍ଷକ ଯେପରି ପ୍ରସ୍ତାବ ପଠାଇବେ ସେଥିପାଇଁ ମନ୍ତ୍ରଣାଳୟର ଅନୁରୋଧକୁ ସେମାନଙ୍କ ପାଖରେ ପହଞ୍ଚାଇବା ପାଇଁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ କୁହାଯାଇଛି।
