ଭୁବନେଶ୍ୱର,୨୦।୧୦(ବ୍ୟୁରୋ): ଓଟିଭି ବିରୋଧରେ ସ୍ବାଧିକାର ଭଙ୍ଗ ନୋଟିସ ଆଣିବାକୁ କେନ୍ଦୁଝର ଏମ୍ପି ଚନ୍ଦ୍ରାଣୀ ମୁର୍ମୁ ସୋମବାର ଲୋକ ସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି ଅନୁରୋଧ କରିଛନ୍ତି।
ସେ ଜଣାଇଛନ୍ତି ଯେ, ମୋତେ ବଦନାମ କରିବା ଏବଂ ମାନସିକ ସ୍ତରରେ ଯନ୍ତ୍ରଣା ଦେବା ପାଇଁ ଓଟିଭି ରିପୋର୍ଟର ଏବଂ ଅନ୍ୟମାନେ ଫେକ୍ ଆପତ୍ତିଜନକ ଭିଡିଓକୁ ଭାଇରାଲ କରିଥିଲେ। ଏହି ଘଟଣା ପରେ ପୋଲିସ ଓଟିଭିର କନିଷ୍ଠ ରିପୋର୍ଟର ଏବଂ ଅନ୍ୟମାନଙ୍କୁ ଗରିଫ କରିଥିଲା। ୨୦୨୦ ଅକ୍ଟୋବର ୧୫ରେ ଯେତେବେଳେ ପୋଲିସ ଅପରାଧର ସୂତ୍ରଧର ରିପୋର୍ଟର ରମେଶ ରଥଙ୍କୁ ଜେରା କରିଥିଲା ଓଟିଭି ସତ୍ୟକୁ ଲୁଚାଇବାକୁ ଉଦ୍ୟମ କରିଥିଲା।
୨୦୨୦ ଅକ୍ଟୋବର ୧୫ ତାରିଖ ପରଠାରୁ ଓଟିଭି ବିଭିନ୍ନ ଅସତ୍ୟ ଓ ଫେକ୍ ନ୍ୟୁଜ କାର୍ଯ୍ୟକ୍ରମ କରିଚାଲିଛି। ରମେଶଙ୍କୁ ଜେରା କରିବା ପରେ ଓଡ଼ିଶା ମୁଖ୍ୟମନ୍ତ୍ରୀଙ୍କ ନାମରେ ମଧ୍ୟ ମନଗଢ଼ା ଖବର ପ୍ରକାଶ କରିଚାଲିଛି। ଏହି ଖବର ମିଥ୍ୟା ଓ ମନଗଢ଼ା, ଯାହାକି ଅତ୍ୟନ୍ତ ଦୁର୍ଭାଗ୍ୟପୂର୍ଣ୍ଣ ଓ ଦୁଃଖଦାୟକ। ରିପୋର୍ଟରଙ୍କ ଦ୍ୱାରା କରାଯାଇଥିବା ଅପରାଧକୁ ଘୋଡ଼ାଇବା ଲାଗି ଏଭଳି ଉଦ୍ୟମ କରାଯାଉଛି। ଲୋକ ସଭାର ସଦସ୍ୟ ଭାବେ ଏହା ମୋର ସ୍ବାଧିକାରକୁ କ୍ଷୁଣ୍ଣ କରିଛି। ମନ୍ଦ ଉଦ୍ଦେଶ୍ୟ ରଖି ତଦନ୍ତକୁ ବାଟବଣା କରିବାକୁ ଓଟିଭି ଦ୍ୱାରା ମିଥ୍ୟା ପ୍ରଚାର କରାଯାଉଛି। ନ୍ୟାୟ ଦେବାକୁ ମୁର୍ମୁ ବାଚସ୍ପତିଙ୍କୁ ଅନୁରୋଧ କରିଛନ୍ତି। ଜନସାଧାରଣଙ୍କୁ ବିଭ୍ରାନ୍ତ କରିବାକୁ ଉଦ୍ୟମ କରୁଥିବା ଓଟିଭି ଓ ଏହାର ପ୍ରାୟୋଜକଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ପତ୍ରରେ ଉଲ୍ଲେଖ କରିଛନ୍ତି। ସମସ୍ତ ବିଷୟକୁ ବିଚାରକୁ ନେଇ ଓଟିଭି ବିରୋଧରେ ଯଥାଶୀଘ୍ର ସ୍ବାଧିକାର ଭଙ୍ଗ ନୋଟିସ ଆଣିବାକୁ ମୁର୍ମୁ ବାଚସ୍ପତିଙ୍କୁ ଅନୁରୋଧ କରିଛନ୍ତି।
