ଅମରପାଲି,୧୯।୧୦(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଦୁର୍ଜନ ତୈଲା ପଞ୍ଚାୟତର ମାଳିଦାଦର ପ୍ରାଥମିକ ବିଦ୍ୟାଳୟକୁ କମ ପିଲା ଦର୍ଶାଇ ବନ୍ଦ କରି ଦିଆଯାଇଛି। ଏ ନେଇ ଗ୍ରାମର ମହିଳାମାନେ ସୁବର୍ଣ୍ଣପୁର ଜିଲାପାଳ ଡ.ନୃପରାଜ ସାହୁଙ୍କୁ ଗୁରୁବାର ଏକ ଦାବିପତ୍ର ପ୍ରଦାନ କରିଥିଲେ। ବନ୍ଦ ଥିବା ଉକ୍ତ ସ୍କୁଲକୁ ପୁନର୍ବାର ଖୋଲିବାକୁ ଦାବି କରିଥିଲେ।
ଅଭିଯୋଗ ପରେ ଜିଲାପାଳ ଏକ ଟିମ୍କୁ ନିର୍ଦ୍ଦେଶ ଦେଇ ଉକ୍ତ ଗ୍ରାମର ବନ୍ଦ ଥିବା ସ୍କୁଲ ଓ ଗ୍ରାମର ଛାତ୍ରୀଛାତ୍ରଙ୍କ ସମସ୍ୟା ଅବଗତ ନିମନ୍ତେ ପଠାଇଥିଲେ। ଶନିବାର ଏହି ଟିମ ମାଳିଦାଦରକୁ ଯାଇ ବନ୍ଦ ଥିବା ସ୍କୁଲର ସ୍ଥିତି ନିରୀକ୍ଷଣ କରିବା ସହିତ ଗ୍ରାମବାସୀଙ୍କ ସହିତ ଆଲୋଚନା କରିଥିଲେ। ତେବେ ଗ୍ରାମରେ ଏବେ ଉକ୍ତ ସ୍କୁଲରେ ପଢ଼ିବା ପାଇଁ ପ୍ରାୟ ୨୮ ଜଣ ଛାତ୍ରୀଛାତ୍ର ଥିବା ଦେଖିଥିଲେ। ସମସ୍ତ ପିଲା ଏବେ ଗ୍ରାମରୁ ଦୂରରେ ଥିବା ଦାଦରପାଲି ୟୁପି ସ୍କୁଲକୁ ବିପଦପୂର୍ଣ୍ଣ ଭାବେ ଚାଲିଚାଲି ପଢି ଯାଉଥିବା ଦେଖିବାକୁ ମିଳିଥିଲା। ଜିଲାପାଳଙ୍କ ନିର୍ଦ୍ଦେଶରେ ବୀରମହାରାଜପୁର ଗୋଷ୍ଠୀ ଶିକ୍ଷା ଅଧିକାରୀ ଗଣେଶ କିଶାନ, ଦୁର୍ଜନତୈଲା ସିଆରସିସି ଅଶୋକ ଲୁହା, ଦାଦରପାଲି ୟୁପି ସ୍କୁଲର ପ୍ରଧାନ ଶିକ୍ଷକ ଗୋପାଳ ପ୍ରଧାନ ମିଳିତ ଭାବେ ମାଳିଦାଦରକୁ ଆସି ସ୍ଥିତି ନିରୀକ୍ଷଣ କରିଛନ୍ତି।
ସୂଚନା ଅନୁସାରେ, ମାଳିଦାଦର ଗ୍ରାମରେ ପ୍ରାୟ ୫୦ରୁ ଅଧିକ ପରିବାର ରୁହନ୍ତୁ। ଗ୍ରାମରେ ପ୍ରାଥମିକ ଶିକ୍ଷା ପାଇଁ ଗତ ୨୦୦୪ ମସିହାରେ ଏକ ପ୍ରାଥମିକ ବିଦ୍ୟାଳୟ ସ୍ଥାପନ କରାଇଥିଲେ। ଏଠାରେ ପିଲାଙ୍କୁ ପଢ଼ାଇବା ପାଇଁ ଦୁଇ ଜଣ ଶିକ୍ଷକଙ୍କୁ ମଧ୍ୟ ନିଯୁକ୍ତି ଦିଆଯାଇଥିଲା। ମାତ୍ର ୨୦୨୧ରେ ଉକ୍ତ ସ୍କୁଲରେ କମ ପିଲା ଦର୍ଶାଇ ସ୍କୁଲକୁ ବନ୍ଦ କରି ଦିଆଯାଇଥିଲା।
ଏହି ସ୍କୁଲ ବନ୍ଦ ପରେ ଏଠାରେ ପଢୁଥିବା ପିଲାଙ୍କୁ ଗ୍ରାମଠାରୁ ପ୍ରାୟ ୩ କିମି ଦୂରରେ ଥିବା ଦାଦରପାଲି ସ୍କୁଲକୁ ପଢ଼ି ଯିବାପାଇଁ ନିର୍ଦ୍ଦେଶ ଦିଆଗଲା। ଫଳରେ ଛୋଟ ଛୋଟ ପିଲାମାନେ ସ୍କୁଲକୁ ଏକୁଟିଆ ଯିବାରେ ସମସ୍ୟା ହେଉଛି। ଅଧିକାଂଶ ସମୟର ପିଲାମାନେ ସ୍କୁଲକୁ ପଢିବାକୁ ଯାଇ ପାରିଲେ ନାହିଁ। ତେଣୁ ଗ୍ରାମର ମହିଳାମାନେ ପୁନର୍ବାର ଉକ୍ତ ସ୍କୁଲକୁ ଖୋଲିବାକୁ ଦାବି କରିଥିଲେ। ଏବେ ଜିଲାପାଳଙ୍କ ତତ୍ପରତା ପରେ ପୁଣିଥରେ ସ୍କୁଲ ଖୋଲିବା ନେଇ ଆଶା ସଞ୍ଚାର ହୋଇଥିବା ଗ୍ରାମବାସୀପ୍ରକାଶ କରିଛନ୍ତି।
Dharitri – Odisha’s No.1, Most Trusted Odia Daily
