ରାଉରକେଲା ଅଫିସ,୧୮।୨: ରାଉରକେଲା ସହରର ୬୦ରୁ ଊର୍ଦ୍ଧ୍ୱ ବସ୍ତିରେ ପାନୀୟଜଳ ସମସ୍ୟା ଉକତ୍ଟ ହୋଇଛି। ଫଳରେ ବସ୍ତିବାସିନ୍ଦା ପାନୀୟଜଳ ସମସ୍ୟା ଯୋଗୁ ଉବୁଟୁବୁ ହେଉଛନ୍ତି। ଅନେକ ବସ୍ତିରେ ପାନୀୟଜଳ ଯୋଗାଣ ନିମନ୍ତେ ପାଇପ୍ ବିଛା କାର୍ଯ୍ୟ ସରି ସାରିଥିଲେ ହେଁ ପାଇପ୍ଗୁଡିକ ମୁଖ୍ୟ ଜଳସ୍ରୋତରେ ସଂଯୋଗ ହୋଇନି। ରଘୁନାଥପାଲି ନିର୍ବାଚନ ମଣ୍ଡଳୀର ବସ୍ତିବାସିନ୍ଦା ପ୍ରାୟ ନଳକୂପ ଉପରେ ଭରସା କରି ପାନୀୟଜଳ ଆବଶ୍ୟକତା ପୂରଣ କରୁଛନ୍ତି। ଆସନ୍ନ ପ୍ରାୟ ଗ୍ରୀଷ୍ମଋତୁରେ ଜଳଉତ୍ସ ହ୍ରାସ ପାଇବ ଓ ଜଳହ୍ରାସ ଯୋଗୁ ବସ୍ତିର ନଳକୂପମାନ ମଧ୍ୟ ଅଚଳ ହୋଇଯିବା ଆଶଙ୍କା ରହିଛି। ତେଣୁ ଜିଲା କଂଗ୍ରେସ ଦଳ ରାଉରକେଲାର ପିଏଚ୍ଡି ବିଭାଗ ଓ ଔଟକୋ ବିଭାଗର ବିରୋଧରେ ଗୁରୁବାର ସ୍ବର ଉତ୍ତୋଳନ କରିଛନ୍ତି। ବସ୍ତିବାସିନ୍ଦାଙ୍କ ପାନୀୟଜଳ ସମସ୍ୟାର ସମାଧାନ ଗ୍ରୀଷ୍ମଋତୁ ପୂର୍ବରୁ କରା ନ ଗଲେ ପିଏଚ୍ଡି ଓ ଔଟକୋ ବିଭାଗ କାର୍ଯ୍ୟାଳୟକୁ ଘେରାଉ କରାଯିବ ବୋଲି ପୂର୍ବତନ ରଘୁନାଥପାଲିର କଂଗ୍ରେସ ବିଧାୟକ ପ୍ରାର୍ଥି ପ୍ରଶାନ୍ତ ସେଠୀ ଗଣମାଧ୍ୟମ ପ୍ରତିନିଧିଙ୍କୁ ସୂଚନା ଦେଇଛନ୍ତି। ଉଭୟ ବିଭାଗ ଯଦି ୧୫ ଦିନ ମଧ୍ୟରେ ବସ୍ତି ଅଞ୍ଚଳମାନଙ୍କରେ ଜଳଯୋଗାଣ ବ୍ୟବସ୍ଥାକୁ ସୁବ୍ୟବସ୍ଥିତ ନ କରନ୍ତି, ଆଗାମୀ ସମୟରେ ରାଉରକେଲାରେ କଂଗ୍ରେସ ଆନ୍ଦୋଳନ କରିବା ସୁନିଶ୍ଚିତ ବୋଲି ଜିଲା କଂଗ୍ରେସ ଦଳର ସଭାପତି ଦେବବ୍ରତ ବିହାରୀ, ଉପସଭାପତି ଉମେଶ ଶରଣ, ପିସିସି ସଦସ୍ୟ ପ୍ରଭାତୀ ମିଶ୍ର, ଉପସଭାପତି ସନ୍ତୋଷ ବିଶ୍ୱାଳ, ସାଧାରଣ ସମ୍ପାଦକ ସରୋଜ ଲେଙ୍କା,ପିସିସି ସଦସ୍ୟ ପ୍ରଭାତୀ ମିଶ୍ର, ପିସିସି ସଦସ୍ୟ ଲତା ନାୟକ ଓ ରାଜ୍ୟ ସମ୍ପାଦକ ବିଶ୍ୱରଞ୍ଜନ ରାଉତ ପ୍ରମୁଖ ଉଭୟ ବିଭାଗକୁ ଚେତାବନୀ ଦେଇଛନ୍ତି।
