ଯୌତୁକ ନିଆଁରେ ଜଳିଗଲେ ପ୍ରିୟା
7:03 amJuly 17, 2020July 17, 2020 / 21

ବଅଁରପାଳ, ୧୭।୭(ଡି.ଏନ.ଏ)
ଯୌତୁକ ଲୋଭ ପୁଣି ନେଇଛି ଜୀବନ। ମାତ୍ର ଦେଢ଼ବର୍ଷର ଜଣେ ନବବଧୂଙ୍କୁ ଶାଶୁଘର ଲୋକେ କିରୋସିନ ଢାଳି ପୋଡ଼ି ଦେଇଥିବା ଅଭିଯୋଗ ହୋଇଛି। ଅନୁଗୋଳ ଜିଲା ବଅଁରପାଳ ବ୍ଲକ ଗଡସନ୍ତ୍ରୀ ଗ୍ରାମରେ ଘଟିଥିବା ଏହି ଘଟଣା ଚର୍ଚ୍ଚାର ବିଷୟ ହୋଇଥିବା ବେଳେ ଥାନାରେ ଏତଲା ପରେ ପୋଲିସ ନଂ. ୧୯୧/୨୦ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
ପୋଲିସ ସୂଚନା ମୁତାବକ, ଢେଙ୍କାନାଳ ଜିଲା ହିନ୍ଦୋଳ ବ୍ଲକ ଦୁଦୁରକୋଟ ଗ୍ରାମର ଦାମୋଦର ଭଞ୍ଜଙ୍କ ଝିଅ ପ୍ରିୟା ଗଡ଼ନାୟକ ୨୦୧୯ ଫେବୃୟାରୀ ୨୦ରେ ଗଡ଼ସନ୍ତ୍ରୀ ଗ୍ରାମର ଆଶୁତୋଷ ଗଡ଼ନାୟକଙ୍କୁ ବିବାହ କରିଥିଲେ। ହେଲେ କିଛି ଦିନ ପରେ ତାଙ୍କ ଉପରେ ନିର୍ଯାତନା ଆରମ୍ଭ ହୋଇଯାଇଥିଲା। ସ୍ବାମୀ ଆଶୁତୋଷଙ୍କ ସମେତ ଶାଶୁ ପ୍ରେମଲତା ଓ ନଣନ୍ଦ ସିନାରାଣୀ ସାମଲ ଅଧିକ ଯୌତୁକ ଦାବିରେ ନିର୍ଯାତନା ସହ ହତ୍ୟା ଧମକ ଦେଉଥିଲେ। ଗତ ୧୫ ତାରିଖରେ ସେମାନେ ପ୍ରିୟାଙ୍କ ଉପରେ କିରୋସିନି ପକାଇ ନିଆଁ ଲଗାଇ ଦେଇଥିବା ତାଙ୍କ ବାପା ଦାମୋଦର ଭଞ୍ଜ ଅଭିଯୋଗରେ ଦର୍ଶାଇଛନ୍ତି। ଗୁରୁତର ପ୍ରିୟାଙ୍କୁ ଅନୁଗୋଳ ଡାକ୍ତରଖାନା ନିଆଯାଇଥିଲେ ହେଁ ସେଠାରେ ମୃତ୍ୟୁ ଘଟିଥିଲା। ଅଭିଯୋଗ ପରେ ଥାନା ଅଧିକାରୀ ସୁନୀଲ କର, ତଦନ୍ତ କରିବା ସହ ସ୍ବାମୀ ଆଶୁତୋଷଙ୍କୁ ଅଟକ ରଖିଛନ୍ତି। ଅଧିକ ତଦନ୍ତ ପରେ ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି ଥାନା ଅଧିକାରୀ କହିଛନ୍ତି। ଅପରପକ୍ଷରେ ପ୍ରିୟାଙ୍କ ଶାଶୁଘର ଲୋକେ ପୋଡ଼ି ମାରିଦେବା ଅଭିଯୋଗକୁ ଖଣ୍ଡନ କରିଛନ୍ତି। ପାରିବାରିକ କହଳ ଯୋଗୁ ପ୍ରିୟା ଆତ୍ମହତ୍ୟା କରିଥିବା ସେମାନେ ସଫେଇ ଦେଇଛନ୍ତି।