ଭୁବନେଶ୍ୱର,୧୫।୭ (ବ୍ୟୁରୋ): ଘରୋଇ ସ୍କୁଲଗୁଡିକର ଆର୍ଥିକ କାରବାରରେ ସ୍ବଚ୍ଛତା ପାଇଁ ସରକାର ପ୍ରତି ବର୍ଷ ଅଡିଟ କରିବାକୁ ଦାବି କରିଛି ଓଡିଶା ଅଭିଭାବକ ମହାସଂଘ। ଏନେଇ ମହାସଂଘ ଅଧ୍ୟକ୍ଷ ବାସୁଦେବ ଭଟ୍ଟ ଚିଠି ମାଧ୍ୟମରେ ମୁଖ୍ୟ ଶାସନ ସଚିବ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବଙ୍କ ପାଖରେ ଏହି ଦାବି ରଖିଛନ୍ତି।
ରାଜ୍ୟରେ ସ୍ବୀକୃତିପ୍ରାପ୍ତ ୪୨୬୪ ଓ ବେଆଇନ ଭାବେ ପ୍ରାୟ ୮୫୦୦ ଘରୋଇ ସ୍କୁଲ ଚାଲୁଛି। ଅଧିକାଂଶ ଘରୋଇ ସ୍କୁଲ ଅଭିଭାବକଙ୍କଠାରୁ ଢେର ଅଧିକ ଫି’ ଆଦାୟ କରୁଛନ୍ତି। ଓଡ଼ିଶାରେ କୌଣସି ସ୍ପଷ୍ଟ ଫି’ ନିୟାମକ ଆକ୍ଟ ନ ଥିବାରୁ ଏପରି ହେଉଛି। ଘରୋଇ ସ୍କୁଲଗୁଡିକ ନିଜର ବିଳାସବ୍ୟସନ ଚଳଣି, ସ୍କୁଲ ଭିତ୍ତିଭୂମି ବଢାଇବା ସହ ସ୍କୁଲ ଫି’ ନେଇ ଅନ୍ୟତ୍ର ବିନିଯୋଗ କରୁଛନ୍ତି। ସରକାରଙ୍କ ୨୦୧୩ ଗେଜେଟରେ ସବୁ ପ୍ରାଇଭେଟ୍ ସ୍କୁଲକୁ ଅଡିଟ କରିବାର ଆଇନ ରହିଛି। ଆଦାୟ ହେଉଥିବା ଫି’କୁ ଠିକ୍ ବାଟରେ ଖର୍ଚ୍ଚ କରାଯାଉଛି କି ନାହିଁ, ଶିକ୍ଷକ ଓ କର୍ମଚାରୀ ଠିକ୍ ଭାବେ ଦରମା ପାଉଛନ୍ତି କି ନାହିଁ, ଆଦାୟ ଅର୍ଥ ଅନ୍ୟତ୍ର ବିନିଯୋଗ ହେଉଛି କି ଏହି ସବୁର ତଦାରଖ ପାଇଁ ଉକ୍ତ ନିୟମ ରହିଛି। ରାଜ୍ୟରେ ଡିଏଭି ସ୍କୁଲ ସମୂହ, ଓଡିଏମ୍, ମଦର, ବିଜେଇଏମ୍, ଲୋୟଲା, ସେଣ୍ଟ ଯୋଶେଫ ଭଳି ବହୁ ବଡ଼ ବଡ଼ ସ୍କୁଲରେ ହଜାର ହଜାର ପିଲା ପାଠ ପଢୁଛନ୍ତି। ସେମାନଙ୍କଠାରୁ ଆଡ଼ମିଶନ, ରି-ଆଡ଼ମିଶନ, ୟୁନିଫର୍ମ, ବହି, ସ୍ମାର୍ଟ କ୍ଲାସ ଆଦି ଅନେକ ବାବଦକୁ ଲକ୍ଷ ଲକ୍ଷ ଟଙ୍କା ଆଦାୟ କରାଯାଉଛି। କିଛି ସ୍କୁଲ ନିଜର ଆତ୍ମୀୟ ସ୍ବଜନଙ୍କୁ କର୍ମଚାରୀ ବୋଲି ଦର୍ଶାଇ ସେମାନଙ୍କ ଆକାଉଣ୍ଟକୁ ଲକ୍ଷ ଲକ୍ଷ ଟଙ୍କା ଟ୍ରାନ୍ସଫର କରୁଛନ୍ତି। ବିଶେଷକରି ଭୁବନେଶ୍ୱରରେ ଥିବା ବଡ଼ବଡ଼ ସ୍କୁଲ କୋଟି କୋଟି ଟଙ୍କା ହଡପ କରିବାର ଉଦାହରଣ ରହିଛି। ସେପଟେ କିଛି ସ୍କୁଲ ବେଆଇନ ପ୍ରାଇଭେଟ ପବ୍ଲିକେଶନ ବହି ବିକ୍ରି କରି ମୁଦ୍ରିତ ଦାମ୍ର ୫୦% ପର୍ଯ୍ୟନ୍ତ ମୁନାଫା କରିଥିବା ଲକ୍ଷ ଲକ୍ଷ ଟଙ୍କାକୁ ଅନ୍ୟ ଆକାଉଣ୍ଟକୁ ଟ୍ରାନ୍ସଫର କରୁଛନ୍ତି। ଅଡିଟ ହେଲେ ସବୁ ସତ ପଦାକୁ ଆସିପାରିବ ଓ ସବୁ ବ୍ୟବସ୍ଥା ଠିକ ଚାଲିବ। ତେଣୁ ଅଡିଟ୍ କରିବା ପାଇଁ ଓଡିଶା ଅଭିଭାବକ ମହାସଂଘର ମୁଖପାତ୍ର ଓ ସହ ଅଧ୍ୟକ୍ଷ ପ୍ରସନ୍ନ ବିଶୋଇ ସରକାରଙ୍କ ନିକଟରେ ଦୃଢ଼ ଦାବି କରିଛନ୍ତି।
