ଦୁବାଇ, ୬।୧୦: ଆଘାତଜନିତ ସମସ୍ୟା ଲାଗି ସନ୍ରାଇଜର୍ସ ହାଇଦ୍ରାବାଦ୍ ଦଳର ଅଭିଜ୍ଞ ଦ୍ରୁତ ବୋଲର ଭୁବନେଶ୍ୱର କୁମାର ଚଳିତ ଆଇପିଏଲ୍ରୁ ବାହାର ହୋଇଯାଇଛନ୍ତି। ତାଙ୍କ ସ୍ଥାନରେ ଆନ୍ଧ୍ର ପ୍ରଦେଶର ବାମହାତୀ ଦ୍ରୁତ ବୋଲର ପୃଥ୍ବୀରାଜ ୟାରାଙ୍କୁ ହାଇଦ୍ରାବାଦ୍ ଦଳରେ ସାମିଲ କରାଯାଇଛି। ୨୨ ବର୍ଷୀୟ ୟାରା ଆନ୍ଧ୍ର ପ୍ରଦେଶ ପାଇଁ ୧୧ ପ୍ରଥମ ଶ୍ରେଣୀ, ୯ଟି ଲିଷ୍ଟ-ଏ ଏବଂ ୩ ଟି୨୦ ମ୍ୟାଚ୍ ଖେଳିଛନ୍ତି। ସେହିଭଳି ଉଲ୍ଲେଖନୀୟ କଥା ହେଉଛି ୟାରା ଗତବର୍ଷ କୋଲକାତା ନାଇଟ୍ ରାଇଡର୍ସ ପକ୍ଷରୁ ହାଇଦ୍ରାବାଦ୍ ବିପକ୍ଷରେ ଖେଳି ଆଇପିଏଲ୍ ପଦାର୍ପଣ କରିଥିଲେ। କିନ୍ତୁ ଚଳିତ ବର୍ଷ ଖେଳାଳି ନିଲାମୀ ପୂର୍ବରୁ କୋଲକାତା ତାଙ୍କୁ ଦଳରୁ ରିଲିଜ୍ କରିଦେଇଥିଲା।
ଚେନ୍ନାଇ ସୁପର୍କିଙ୍ଗ୍ସ ବିପକ୍ଷ ମ୍ୟାଚ୍ ଅବସରରେ ଭୁବନେଶ୍ୱରଙ୍କ ମାଂସପେଶୀଜନିତ ସମସ୍ୟା ଦେଖା ଦେଇଥିଲା। ଏହି କାରଣରୁ ସେ ୧୯ତମ ଓଭରର ପ୍ରଥମ ବଲ୍ ପକାଇ ପରେ ପଡ଼ିଆ ଛାଡ଼ି ଚାଲିଯାଇଥିଲେ। ଆଇପିଏଲ୍ର ଚଳିତ ସିଜନରେ କୁମାର ହାଇଦ୍ରାବାଦ୍ ପାଇଁ ୪ ମ୍ୟାଚ୍ ଖେଳି ୬.୯୮ ଇକୋନୋମିରେ ୩ଟି ଉଇକେଟ୍ ନେଇଥିଲେ।
