ସିଡନୀ,୧୨।୧: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ବର୍ଡର-ଗାଭାସ୍କର ଟ୍ରଫିରେ ଭାରତୀୟ ଖେଳାଳି ଆହତ ହେବା ଜାରି ରହିଛିି। ଏହା ସତ୍ତ୍ୱେ ଟିମ ଇଣ୍ଡିଆ ମେଲବୋର୍ନରେ ଏକ ଐତିହାସିକ ବିଜୟ ହାସଲ କରି ସିଡନୀରେ ଡ୍ର ’କରିଥିଲା। ଭାରତ ପାଇଁ ଏକ ଖରାପ ଖବର ହେଉଛି ସିଡନୀ ଟେଷ୍ଟରେ ବ୍ୟାଟିଂ ସମୟରେ ଆହତ ହୋଇଥିବା ରବିନ୍ଦ୍ର ଜାଡେଜା ଏବଂ ହନୁମା ବିହାରୀ ବ୍ରିସବେନରେ ଖେଳାଯିବାକୁଥିବା ସିରିଜର ଶେଷ ତଥା ଅନ୍ତିମ ଟେଷ୍ଟରୁ ବାଦ ପଡିଛନ୍ତି। ଜାଡେଜାଙ୍କ ସ୍ଥାନରେ ଶାର୍ଦ୍ଦୁଳ ଠାକୁରଙ୍କୁ ଦଳରେ ସାମିଲ କରାଯାଇଛି। ଏପର୍ଯ୍ୟନ୍ତ ମହମ୍ମଦ ଶାମି, ଉମେଶ ଯାଦବ, ରବିନ୍ଦ୍ର ଜାଡେଜା ଏବଂ ହନୁମା ବିହାରୀ ଆହତ କାରଣରୁ ଟେଷ୍ଟ ସିରିଜରୁ ବାହାରିଛନ୍ତି। ଏହା ବ୍ୟତୀତ ସିଡନୀ ଟେଷ୍ଟ ପୂର୍ବରୁ କେ.ଏଲ ରାହୁଲ ଅଭ୍ୟାସ ସମୟରେ ତାଙ୍କୁ ବଲରେ ଆଘାତ ଲାଗିଥିଲା। ସିଡନୀ ଟେଷ୍ଟରେ ରିଷଭ ପନ୍ତ ଏବଂ ରବିଚନ୍ଦ୍ରନ ଅଶ୍ୱିନ ଆହତ ଏବଂ ଯନ୍ତ୍ରଣା ସତ୍ତ୍ୱେ ଖେଳିଥିଲେ। ହନୁମା ବିହାରୀଙ୍କ ବିକଳ୍ପ ଭାବରେ ରିଦ୍ଧିମାନ ସାହାଙ୍କୁ ଉଇକେଟ ରକ୍ଷକ ତଥା ରିଷଭ ପନ୍ତଙ୍କୁ ବ୍ୟାଟ୍ସମ୍ୟାନ କିମ୍ବା ମୟଙ୍କ ଅଗ୍ରୱାଲଙ୍କୁ ମଧ୍ୟ କ୍ରମରେ ସ୍ଥାନ ଦିଆଯାଇପାରିବ। ଆହତ ଜାଡେଜାଙ୍କ ସ୍ଥାନରେ ଶାର୍ଦ୍ଦୁଲ ଠାକୁରଙ୍କୁ ଦଳରେ ସାମିଲ କରାଯାଇଛି ବୋଲି ବିସିସିଆଇ ସୂଚନା ଦେଇଛି।
