ସୋନପୁର,୧୩ା୮(ମୃତ୍ୟୁଞ୍ଜୟ ଶତପଥୀ)ସୁବର୍ଣ୍ଣପୁର ଜିଲା ସୋନପୁର ବ୍ଲକ ଖଇରଟିକ୍ରା ଗାଁର ଚାଷୀ ସୁରେଶ କୁମାର ମିଶ୍ରଙ୍କୁ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ନିମନ୍ତ୍ରଣ ଆସିଛି। ନୂଆଦିଲ୍ଲୀର କର୍ତ୍ତବ୍ୟପଥରେ ଅନୁଷ୍ଠିତ ହେବାକୁ ଥିବା ୭୭ତମ ସ୍ବାଧୀନତା ଦିବସ ଉତ୍ସବରେ ସେ ଯୋଗଦେବେ। ଏ ନେଇ ମିଶ୍ର ଶନିବାର ନୂଆଦିଲ୍ଲୀ ଅଭିମୁଖେ ଟ୍ରେନ୍ ଯୋଗେ ଯାତ୍ରା କରିଛନ୍ତି। ଏଭଳି ଖବର ମିଳିବା ପରେ ଜିଲାରେ ଖୁସିର ଲହରି ଖେଳିଯାଇଛି।
ଜଣେ ସଫଳ ଜୈବିକ ଚାଷୀ ଭାବେ ସୁରେଶ ସୁବର୍ଣ୍ଣପୁର ଜିଲାରେ ବେଶ୍ ପରିଚିତ। ଦୀର୍ଘ ୭ ବର୍ଷ ଧରି ସେ ନିଜର ୬ ଏକର ପରିମିତ ଚାଷଜମିରେ ଜୈବିକ ପ୍ରଣାଳୀରେ ସମନ୍ବିତ ଚାଷ କରିଆସୁଛନ୍ତି। ନିଜ ଫସଲରେ ଜୀବାମୃତ ସହିତ ବୁନ୍ଦା ଜଳସେଚନର ବ୍ୟବସ୍ଥା କରି ସେ ପୋଟଳ, ବାଇଗଣ, ମକା ଓ ବନ୍ଧାକୋବି ଆଦି ଉତ୍ପାଦନ କରୁଛନ୍ତି। ଉଭୟ ଖରିଫ ଓ ରବି ଋତୁରେ ବିନା କୀଟନାଶକ, ରାସାୟନିକ ସାରରେ ଧାନ ଓ ପନିପରିବା ଚାଷ କରୁଛନ୍ତି। ଏଥିରେ ସେ ନିଜକୁ ଆତ୍ମନିର୍ଭରଶୀଳ ମଧ୍ୟ କରିପାରିଛନ୍ତି। ୨୦୨୧ ମସିହାରେ ନାବାର୍ଡ ଦ୍ୱାରା ସୁନ୍ଦରଗଡ଼ର ସେବକ ସ୍ବେଚ୍ଛାସେବୀ ଅନୁଷ୍ଠାନ ପ୍ରୋତ୍ସାହନରେ କ୍ଷେତ୍ରପାଳ କୃଷକ ଉତ୍ପାଦକ କମ୍ପାନୀ ଗଠନ କରିଛନ୍ତି। ଏହି କମ୍ପାନୀକୁ କେନ୍ଦ୍ର ସରକାର ସହଯୋଗ କରୁଛନ୍ତି। କମ୍ପାନୀ ତଥା କୃଷକ ଉତ୍ପାଦକ ସଂଘରେ ଆଖପାଖ ଗ୍ରାମର ୫୦୦ରୁ ଊର୍ଦ୍ଧ୍ୱ ଚାଷୀ ସଭ୍ୟ ଅଛନ୍ତି। ମିଶ୍ର ଏହାର ପରିଚାଳନା ନିର୍ଦ୍ଦେଶକ ଅଛନ୍ତି। ନିଜ କ୍ଷେତରୁ ଉତ୍ପାଦିତ ଫସଲ ଓ ଅନ୍ୟ ଚାଷୀଙ୍କ ଉତ୍ପାଦିତ ଫସଲକୁ କ୍ଷେତ୍ରପାଳ କୃଷକ ଉତ୍ପାଦକ ସଂଘ ମାଧ୍ୟମରେ ବିକ୍ରୟ କରୁଛନ୍ତି। ଜୈବିକ ଚାଷ ଦ୍ୱାରା ଉତ୍ପାଦିତ ଚାଉଳ ଓ ମୁଗକୁ ସଂଘ ମାଧ୍ୟମରେ ମାର୍କେଟିଂ କରିଥାନ୍ତି। ସେହିପରି ଅନ୍ୟ ଚାଷୀଙ୍କୁ ବିଭିନ୍ନ ପ୍ରକାର ମଞ୍ଜି, କୀଟନାଶକ ଓ ସାର ସୁଲଭ ମୂଲ୍ୟରେ ପ୍ରଦାନ ସହିତ ଜୈବିକ ପ୍ରଣାଳୀରେ ଚାଷ ପାଇଁ ପ୍ରଶିକ୍ଷଣ ଦେଉଛନ୍ତି। ତାଙ୍କର ଏହି ଜୈବିକ ଚାଷ ଅଞ୍ଚଳର ଅନ୍ୟମାନଙ୍କୁ ପ୍ରେରଣା ଦେଉଛି। ଚଳିତବର୍ଷ ନୂଆଦିଲ୍ଲୀଠାରେ ଆୟୋଜିତ ହେବାକୁ ଥିବା ସ୍ବାଧୀନତା ଦିବସ ଉତ୍ସବରେ ଅଂଶଗ୍ରହଣ ଲାଗି ସୁରେଶଙ୍କୁ ନିମନ୍ତ୍ରଣ ମିଳିଛି। ଜଣେ ସଫଳ ଚାଷୀ ଭାବେ କେନ୍ଦ୍ର ସରକାରଙ୍କ ସ୍ବୀକୃତି ଓ ନିମନ୍ତ୍ରଣ ଏକ ଗର୍ବ ଓ ଗୌରବର କଥା ବୋଲି କହିଛନ୍ତି ସୁରେଶ। ଏଥିପାଇଁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ନାବାର୍ଡକୁ କୃତଜ୍ଞତା ଜଣାଇଛନ୍ତି।
