ନୂଆଦିଲ୍ଲୀ,୨୬।୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୩ ଦିନିଆ ଆମେରିକା ଗସ୍ତ ଶେଷ କରି ଭାରତ ଫେରିବେ। ପ୍ରଧାନମନ୍ତ୍ରୀ ସାଙ୍ଗରେ ଆମେରିକାରୁ ଭାରତକୁ ‘ସ୍ପେଶାଲ-୧୫୭’ ପ୍ରାଚୀନ କଳାକୃତି ମଧ୍ୟ ଆଣୁଛନ୍ତି। ସେଥିମଧ୍ୟରେ ୧୦ମ ଶତାବ୍ଦୀର ବାଲିଆ ପଥରରେ ନିର୍ମିତ ହୋଇଥିବା ସୁନ୍ଦର କଳାକୃତି ସହିତ ୧୨ ଶତାବ୍ଦୀର ୮.୫ ସେଣ୍ଟିମିଟର ଉଚ୍ଚ ନଟରାଜ ମୂର୍ତ୍ତି ମଧ୍ୟ ରହିଛି।
୧୯୭୬ ରୁ ୨୦୧୩ ମଧ୍ୟରେ ଭାରତ ସରକାର କେବଳ ୧୩ଟି ପ୍ରାଚୀନ କଳାକୃତି ସ୍ବଦେଶକୁ ଫେରାଇ ଆଣିଥିଲେ।
ତେବେ ପ୍ରଧାନମନ୍ତ୍ରୀ ହେବା ପରେ ମୋଦି ୨୦୧୪ଠାରୁ ଇତିମଧ୍ୟରେ ୨୦୦ରୁ ଅଧିକ ପ୍ରାଚୀନ କଳାକୃତିକୁ ଭାରତ ଫେରାଇ ଆଣିଛନ୍ତି। ୨୦୦୪ରୁ ୨୦୧୪ ମଧ୍ୟରେ କେବଳ ଗୋଟିଏ ପ୍ରାଚୀନ କଳାକୃତି ଭାରତକୁ ଫେରାଇ ଅଣାଯାଇଥିଲା।
ସମ୍ପ୍ରତି ପ୍ରଧାନମନ୍ତ୍ରୀ ଭାରତକୁ ଆଣୁଥିବା ପ୍ରାଚୀନ କଳାକୃତିମଧ୍ୟରେ ୪୫ଟି ଖ୍ରୀଷ୍ଟପୂର୍ବ ୨୦୦୦ର ରହିଛି। ସେହିପରି ଲକ୍ଷ୍ମୀନାରାୟଣ, ବୁଦ୍ଧ, ବିଷ୍ଣୁ, ଶିବପାର୍ବତୀ, ୨୪ ଜୈନ ତୀର୍ଥଙ୍କର ମୂର୍ତ୍ତି ମଧ୍ୟ ପ୍ରଧାନମନ୍ତ୍ରୀ ଭାରତ ଫେରାଇ ଆଣୁଥିବା କଳାକୃତି ମଧ୍ୟରେ ରହିଛି।
