ନୂଆଦିଲ୍ଲୀ, ୮।୨: ପାର୍ଲାମେଣ୍ଟର ସେଣ୍ଟ୍ରାଲ ହଲ୍ରେ ଜାନୁୟାରୀ ୩୧ରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ସହ ବଜେଟ ଅଧିବେଶନ ଆରମ୍ଭ ହୋଇଥିଲା। ରାଷ୍ଟ୍ରପତି ଲୋକ ସଭା ଓ ରାଜ୍ୟ ସଭା ସଦସ୍ୟମାନଙ୍କୁ ସମ୍ବୋଧିତ କରି କେନ୍ଦ୍ର ସରକାରଙ୍କ ଅନେକ ସଫଳତାର ଗୁଣଗାନ କରିଥିଲେ। କିନ୍ତୁ ବିଜୁ ଜନତା ଦଳ ପକ୍ଷରୁ ବାରମ୍ବାର ଦାବି ହୋଇ ଆସୁଥିବା ମହିଳା ସଂରକ୍ଷଣ ବିଲ୍ ସମ୍ପର୍କରେ ପଦୁଟିଏ ମଧ୍ୟ କହିନାହାନ୍ତି। ଏହାକୁ ନେଇ ଓଡ଼ିଶାର ଶାସକ ଦଳ ଅସନ୍ତୋଷ ବ୍ୟକ୍ତ କରିଛି। ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ବେଳେ ବିଜେଡି ଏମ୍ପି ପିନାକୀ ମିଶ୍ର ଓ ସସ୍ମିତ ପାତ୍ର ମଙ୍ଗଳବାର ଏହି ପ୍ରସଙ୍ଗ ଉଠାଇଛନ୍ତି। ଉଭୟେ କହିଛନ୍ତି, ମହିଳା ରିଜର୍ଭେଶନ୍ ବିଲ୍ ଆଗତ ପାଇଁ ଓଡ଼ିଶା ଦୀର୍ଘଦିନ ଧରି ଦାବି କରିଆସୁଅଛି। ଏହି ବିଲ୍ ଏକଦଶନ୍ଧିରୁ ଊର୍ଦ୍ଧ୍ୱ ସମୟ ହେଲା ଶୀତଳ ଭଣ୍ଡାରରେ ପଡ଼ିରହିଛି। ରାଷ୍ଟ୍ରପତି ମୁର୍ମୁ ମହିଳା ସଶକ୍ତୀକରଣ ଉପରେ ଲମ୍ବା ଚଉଡ଼ା ଭାଷଣ ଦେଲେ। ହେଲେ ମହିଳା ସଂରକ୍ଷଣ ବିଲ୍ ତାଙ୍କ ଭାଷଣରେ ସ୍ଥାନିତ ହୋଇ ନ ଥିଲା। ଏହି ବିଲ୍କୁ ଏଯାଏ କାହିଁକି ପାର୍ଲାମେଣ୍ଟରେ ଗୃହୀତ କରାଯାଇ ନାହିଁ ବୋଲି ସସ୍ମିତ ପ୍ରଶ୍ନ କରିଛନ୍ତି। ପୁରୀ ଏମ୍ପି ପିନାକୀ ମିଶ୍ର ରାଷ୍ଟ୍ରପତିଙ୍କ ଅଭିଭାଷଣକୁ ଭରସାଅଯୋଗ୍ୟ ଦସ୍ତାବିଜ ଭାବେ ଅବିହିତ କରି ତହିଁରେ ମିଛ ଭରି ରହିଥିବା କହିଛନ୍ତି। ପ୍ରକାଶ ଯେ, ମହିଳା ସଂରକ୍ଷଣ ବିଲ୍ ୨୦୧୦ରେ ରାଜ୍ୟ ସଭାରେ ଗୃହିତ ହୋଇଥିଲା। କିନ୍ତୁ ପଞ୍ଚଦଶ ଲୋକ ସଭାରେ ଏହା ପାରିତ ନ ହୋଇ ରହିଯାଇଥିଲା। ଏହି ସମ୍ବିଧାନ ସଂସୋଧନ ବିଲ୍ ପଞ୍ଚଦଶ ଲୋକ ସଭା ଅବଧି ଶେଷ ହେବା ପରେ ସ୍ବତଃ ଅକାମୀ ହୋଇଯାଇଥିଲା।
