ରାଇଘର,୩ା୪(ଡି.ଏନ୍.ଏ.): ନବରଙ୍ଗପୁର ଜିଲା ରାଇଘର ବ୍ଲକ ହାତୀଗାଁ ସଂରକ୍ଷିତ ଜଙ୍ଗଲରେ ରବିବାର ହେଟାବାଘ ଆକ୍ରମଣରେ ୩ ଗୁରୁତର ଏବଂ ୫ ଆହତ ହୋଇଛନ୍ତି। ତିମନପୁର ଗ୍ରାମବାସୀ ମହୁଲ ଫୁଲ ଗୋଟାଇବାକୁ ଜଙ୍ଗଲକୁ ଯାଇଥିବାବେଳେ ହେଟାବାଘ ହାବୁଡ଼ରେ ପଡ଼ିଥିଲେ। ୩ ଗୁରୁତରଙ୍କ ମଧ୍ୟରେ ରେଙ୍ଗାଭାଟି ଗାଁର ଗର୍ଭବତୀ ଶାନ୍ତି ଗଣ୍ଡ, ସିଙ୍ଗସାୟ ଗଣ୍ଡ ଏବଂ ତିମନପୁର ଗ୍ରାମର ଜଣେ ରହିଛନ୍ତି।
ସୂଚନା ଅନୁଯାୟୀ, ମହୁଲ ଫୁଲ ଗୋଟାଇବା ବେଳେ ପ୍ରଥମେ ହେଟାବାଘ ତିମନପୁର ଗ୍ରାମର ୩ ଜଣଙ୍କୁ ଆକ୍ରମଣ କରିଥିଲା। ପରେ ନିକଟସ୍ଥ ରେଙ୍ଗାଭାଟି ଗ୍ରାମର ଅନ୍ୟ ୫ ଜଣଙ୍କୁ ଆକ୍ରମଣ କରିଥିଲା। ସମସ୍ତ ଗୁରୁତର ଓ ଆହତଙ୍କୁ ରାଇଘର ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ୩ ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ନବରଙ୍ଗପୁର ଜିଲା ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି। ଚିକିତ୍ସାବେଳେ ରାଇଘର ବନ ବିଭାଗର କର୍ମଚାରୀ ଉପସ୍ଥିତଥିବା ବେଳେ ହେଟାବାଘ କେଉଁଠାରୁ ଆସିଲା ଏବଂ ଆକ୍ରମଣ ପରେ କୁଆଡ଼େ ଗଲା ତାହା ଜଣାପଡ଼ିନାହିଁ ବୋଲି ବନପାଳ ବିପିନ କୁମାର କହିଛନ୍ତି। ବିଭାଗ ପକ୍ଷରୁ ନଜର ରଖାଯାଇଥିବା ସେ କହିଛନ୍ତି।
