ନୂଆଦିଲ୍ଲୀ, ୨୪।୧୨ (ପି.ଟି.)- ଇଣ୍ଡିଆନ କ୍ରିକେଟର୍ସ ଆସୋସିଏଶନ (ଆଇସିଏ)ର ପ୍ରତିନିଧିଭାବେ ଆଇପିଏଲ୍ ଗଭର୍ନିଂ କାଉନ୍ସିଲ୍କୁ ମନୋନୀତ ହୋଇଛନ୍ତି ଭାରତର ତାରକା ଓଡ଼ିଆ ସ୍ପିନର ପ୍ରଜ୍ଞାନ ଓଝା। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ବାର୍ଷିକ ସାଧାରଣ ବୈଠକ(ଏଜିଏମ୍)ର ଗୋଟିଏ ଦିନ ପୂର୍ବରୁ ପ୍ରଜ୍ଞାନଙ୍କୁ ଏହି ନୂଆ ଦାୟିତ୍ୱ ମିଳିଛି। ଗୁରୁବାର ବିସିସିଆଇର ୮୯ତମ ଏଜିଏମ୍ ଅହମ୍ମଦାବାଦରେ ଅନୁଷ୍ଠିତ ହେବ। ବିସିସିଆଇ ସମ୍ବିଧାନ ଅନୁସାରେ ଆଇସିଏ ପ୍ରତିବର୍ଷ ଜଣେ ଖେଳାଳିଙ୍କୁ ଆଇପିଏଲ୍ ଗଭର୍ନିଂ କାଉନ୍ସିଲକୁ ପଠାଇବ। ପୂର୍ବତନ ଭାରତୀୟ ଖେଳାଳି ସୁରିନ୍ଦର ଖାନ୍ନା ଏହା ପୂର୍ବରୁ ଆଇସିଏ ପକ୍ଷରୁ ପ୍ରତିନିଧିତ୍ୱ କରିଥିଲେ। ସୁରିନ୍ଦର ନିଜ ଦାୟିତ୍ୱକୁ ସୁଚାରୁରୂପେ ସମ୍ପାଦନ କରିଥିଲେ। ଆମେ ନୂଆ ବ୍ୟକ୍ତିଙ୍କୁ ସୁଯୋଗ ଦେବାକୁ ଚାହୁଁଛୁ। ତେଣୁ ଆଇସିଏ ନିର୍ଦ୍ଦେଶକମାନେ ପ୍ରଜ୍ଞାନଙ୍କୁ ମନୋନୀତ କରିଛନ୍ତି ବୋଲି ଏହାର ସଭାପତି ଅଶୋକ ମାଲହୋତ୍ରା ପ୍ରକାଶ କରିଛନ୍ତି। ବାମହାତୀ ସ୍ପିନର ପ୍ରଜ୍ଞାନ ଚଳିତବର୍ଷ ଫେବୃୟାରୀରେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଥିଲେ। ତାଙ୍କ ବ୍ୟତୀତ ବ୍ରିଜେଶ ପଟେଲ ଓ ଖୈରୁଲ ଜମଲ ମଜୁମଦାର ଆଇପିଏଲ ଗଭର୍ନିଂ କାଉନ୍ସିଲର ଅନ୍ୟତମ ସଦସ୍ୟ ଅଛନ୍ତି। ୩୪ ବର୍ଷୀୟ ପ୍ରଜ୍ଞାନ ୨୦୧୩ରେ ଶେଷଥରପାଇଁ ସଚିନ ତେନ୍ଦୁଲକରଙ୍କ ବିଦାୟ କାଳୀନ ଟେଷ୍ଟ ମ୍ୟାଚ ମୁମ୍ବାଇରେ ଖେଳିଥିଲେ। ହାଇଦ୍ରାବାଦ ପକ୍ଷରୁ ପ୍ରଥମଶ୍ରେଣୀ କ୍ରିକେଟ ଖେଳିଥିବା ଏହି ଓଡ଼ିଆ ଖେଳାଳି ୨୦୦୯ରୁ ୨୦୧୩ ମଧ୍ୟରେ ୨୪ ଟେଷ୍ଟ ଖେଳି ୧୧୩ଟି ଉଇକେଟ ନେଇଛନ୍ତି।
