ବରଗଡ଼ ଅଫିସ୍,୨୭।୯: ବରଗଡ଼ ଜିଲାରେ ପ୍ରଧାନମନ୍ତ୍ରୀ ଫସଲବୀମା ଯୋଜନା ବାଟବଣା ହୋଇଛି। ବୀମା ବିଭ୍ରାଟ ଯୋଗୁ ଦିନକୁ ଦିନ ଅସନ୍ତୋଷ ବଢ଼ିବାରେ ଲାଗିଛି। ଜିଲାର ଅନେକ ଯୋଗ୍ୟ ଚାଷୀ ବୀମା କ୍ଷତିପୂରଣ ପାଇବାରୁ ବଞ୍ଚିତ ଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ନେଇ ସୋମବାର ଜିଲାର ଘୁମୁନିପାଲି, ବିରିପାଲି, ବଡ଼ ବାଉସେନ ଆଦି ଗ୍ରାମର କ୍ଷତିଗ୍ରସ୍ତ ଚାଷୀ ଜିଲାପାଳ ଏବଂ ଜିଲା ମୁଖ୍ୟ କୃଷି ଅଧିକାରୀଙ୍କୁ ଫେରାଦ ହୋଇଥିଲେ। ଜିଲାପାଳ ମୋନିଷା ବାନାର୍ଜୀ ଏବଂ ଜିଲା ମୁଖ୍ୟ କୃଷି ଅଧିକାରୀ ସନ୍ତୋଷ କୁମାର ମହାରଣାଙ୍କୁ ସ୍ମାରକପତ୍ର ପ୍ରଦାନ ସହିତ ବୀମା କ୍ଷତିପୂରଣ ସହାୟତା ପ୍ରଦାନ ଦିଗରେ ବିହିତ ପଦକ୍ଷେପ ନେବାକୁ ସେମାନେ ନିବେଦନ କରିଛନ୍ତି ।
୨୦୨୧ ମସିହାରେ ସ୍ବଳ୍ପ ବୃଷ୍ଟିପାତ ଯୋଗୁ ଜିଲାରେ ଖରିଫ ଫସଲ ଉଜୁଡ଼ି ଯାଇଥିଲା। ଚାଷକାର୍ଯ୍ୟ ପୂର୍ବରୁ ବୀମା ପ୍ରିମିୟମ ରାଶି ଭରିଥିଲେ ସୁଦ୍ଧା ଫସଲକ୍ଷତି ପରେ ଅନେକ କ୍ଷତିଗ୍ରସ୍ତ ଚାଷୀଙ୍କୁ ବୀମା କ୍ଷତିପୂରଣରୁ ବାଦ୍ ଦିଆଯାଇଥିବା ଅଭିଯୋଗ ହୋଇଛି। ଅନ୍ୟପକ୍ଷେ କେତେକ ଲୋକେ ବୀମା ଆଶାରେ ଜମି ଜାଲିଆତି କରିଥିବା ଯୋଗୁ ପ୍ରକୃତ ଚାଷୀ ବୀମା ସହାୟତାରୁ ବଞ୍ଚିତ ହୋଇଥିବା ଅଭିଯୋଗ ହୋଇଛି। ବିରିପାଲି ଗ୍ରାମର ଚାଷୀ ଗୋବିନ୍ଦ ଅଦାବର କହିଛନ୍ତି, ସେ ୯ ଏକର ଚାଷ କରିଥିଲେ ଏବଂ ସବୁ ଫସଲ ଉଜୁଡ଼ି ଯାଇଥିଲା। ତେବେ ତାଙ୍କ ପୁଅ ଋକ୍ମଣଙ୍କ ନାମରେ ରହିଥିବା ୨ଏକର ୭ଡିସିମିଲ ଜମିର ବୀମା କ୍ଷତିପୂରଣ ସେ ପାଇଛନ୍ତି। ମାତ୍ର ବାକି ୭ଏକର ଜମିରେ ଅନ୍ୟ କେହି ବୀମା ପ୍ରିମିୟମ ଭରି ଦେଇଥିବା ଯୋଗୁ ସେ ବୀମା କ୍ଷତିପୂରଣ ସହାୟତାରୁ ବଞ୍ଚିତ ରହିଥିବା କହିଛନ୍ତି।
ବଡ଼ ବାଉଁସେନ ଗ୍ରାମର ଚାଷୀମାନେ ମଧ୍ୟ ଅନୁରୂପ ଅଭିଯୋଗ କରିଛନ୍ତି। ଫସଲକ୍ଷତି ଅନୁପାତରେ ବୀମା କ୍ଷତିପୂରଣ ସହାୟତା ମିଳି ନଥିବା କ୍ଷତିଗ୍ରସ୍ତ ଚାଷୀମାନେ କହିଛନ୍ତି। ଏପରିକି ଏହି ବୀମା ସହାୟତା ପ୍ରଦାନରେ ଜାଲିଆତି ହୋଇଥିବା ମଧ୍ୟ ସେମାନେ ଅଭିଯୋଗ କରିଛନ୍ତି। ସେମାନଙ୍କ ଅଧିକ ଫସଲକ୍ଷତି ହୋଇଥିବାବେଳେ କମ୍ ବୀମା କ୍ଷତିପୂରଣ ମିଳିଛି। ଅନ୍ୟପକ୍ଷେ ସେମାନଙ୍କ ପ୍ରାପ୍ୟ ବୀମା କ୍ଷତିପୂରଣ ସହାୟତାକୁ କାଟି ଅନ୍ୟ ଲୋକେ ଉଠାଇଥିବା ଭଳି ଗୁରୁତର ଅଭିଯୋଗ କରିଛନ୍ତି। ଏଥିରେ ବିଭାଗୀୟ କର୍ମଚାରୀଙ୍କ ଭୂମିକାକୁ ସନ୍ଦେହ କରି ଏହାର ବିଧିବଦ୍ଧ ତଦନ୍ତ କରିବାକୁ କ୍ଷତିଗ୍ରସ୍ତ ଚାଷୀମାନେ ଜିଲାପାଳଙ୍କଠାରେ ଦାବି କରିଛନ୍ତି ।
