ବରଗଡ଼,୫।୯(ପ୍ରେମାନନ୍ଦ ଖମାରୀ): ଚାଷଜମିକୁ କେନାଲ ପାଣି ମାଡ଼ୁନି। ଆଶାନୁରୂପ ବୃଷ୍ଟିପାତ ମଧ୍ୟ ହେଉନାହିଁ। ଏଭଳି ସ୍ଥିତିରେ ଉଠାଜଳସେଚନ ପ୍ରକଳ୍ପକୁ ବିଦ୍ୟୁତ୍ ସଂଯୋଗ ମଧ୍ୟ ବିଚ୍ଛିନ୍ନ କରି ଦିଆଯାଇଛି। ଫଳରେ ବରଗଡ଼ ଜିଲା ଭେଡ଼େନ ବ୍ଲକ ଅନ୍ତର୍ଗତ ରୁଷୁଡ଼ା, ମହୁଲପାଲି, ମାନପୁର, ଦେଶଭଟଲି ଆଦି ପଞ୍ଚାୟତ ଅଧୀନ ଗ୍ରାମଗୁଡ଼ିକର ଧାନ ଫସଲ ପାଣି ଅଭାବରୁ ନଷ୍ଟ ହେବାରେ ଲାଗିଛି। ଏଭଳି ଅଭିଯୋଗ ନେଇ ଉକ୍ତ ପଞ୍ଚାୟତର ଶତାଧିକ ଚାଷୀ ସୋମବାର ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ଜିଲାପାଳ ମୋନିଷା ବାନାର୍ଜୀଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋଙ୍କୁ ସେମାନେ ଏକ ସ୍ମାରକପତ୍ର ପ୍ରଦାନ କରି ଉଠାଜଳସେଚନ ପ୍ରକଳ୍ପକୁ ତୁରନ୍ତ ବିଦ୍ୟୁତ ସଂଯୋଗ କରିବା ପାଇଁ ନିବେଦନ କରିଥିଲେ। ଏହି ସମୟରେ ଅରକ୍ଷିତ ବନଛୁର, ସୁରେନ୍ଦ୍ର ଭୁଏ, ସାଗର ଦେହେରୀ, ଗୋବିନ୍ଦ ଭୁଏଙ୍କ ସମେତ ଶତାଧିକ ଚାଷୀ ଉପସ୍ଥିତ ଥିଲେ।
ପ୍ରକାଶ ଯେ, ଉକ୍ତ ପଞ୍ଚାୟତର ବହୁ ଗ୍ରାମରେ ଥିବା ଚାଷଜମିକୁ କେନାଲ ପାଣି ମାଡ଼ି ନ ଥାଏ। ଫଳରେ ସମ୍ପୃକ୍ତ ଅଞ୍ଚଳର ଚାଷ ବର୍ଷା ଏବଂ ଉଠାଜଳସେଚନ ପ୍ରକଳ୍ପ ପାଣି ଉପରେ ନିର୍ଭର କରିଥାଏ। ଆରମ୍ଭରୁ ଭଲବର୍ଷା ହୋଇଥିଲେ ସୁଦ୍ଧା ଗତ ୩ ମାସ ହେଲା ସ୍ବଳ୍ପ ବୃଷ୍ଟିପାତ ହୋଇଛି। ଏଭଳିସ୍ଥଳେ ଉଠାଜଳସେଚନ ପ୍ରକଳ୍ପରୁ ଜମିରେ ପାଣି ମଡ଼ାଇ ଚାଷୀମାନେ ଫସଲକୁ ବଞ୍ଚାଇ ରଖିଥିଲେ। କିନ୍ତୁ ଦୀର୍ଘଦିନ ହେଲା ସମ୍ପୃକ୍ତ ଅଞ୍ଚଳର ଉଠାଜଳସେଚନ ପ୍ରକଳ୍ପଗୁଡ଼ିକୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରିଦିଆଯାଇଛି। ଫଳରେ ପାଣି ଅଭାବରୁ ଧାନ ଫସଲ ନଷ୍ଟ ହେବାରେ ଲାଗିଛି ବୋଲି ଚାଷୀମାନେ ଅଭିଯୋଗ କରିଛନ୍ତି। ଭେଡ଼େନ ବ୍ଲକର ଗଣ୍ଡତୁରୁମରୁ ଖୁଣ୍ଟୁଲିପାଲି ପର୍ଯ୍ୟନ୍ତ ୧୧୧ଟି ଉଠାଜଳସେଚନ ପ୍ରକଳ୍ପ ରହିଛି। ସମ୍ପୃକ୍ତ ଅଞ୍ଚଳରେ ଚାଷୀମାନେ ସେହି ଉଠାଜଳସେଚନ ପ୍ରକଳ୍ପରୁ ପାଣି ଉଠାଇ ଜମିରେ ମଡ଼ାଇଥାନ୍ତି। କିନ୍ତୁ ଉକ୍ତ ପ୍ରକଳ୍ପକୁ ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଥିବାରୁ ଦୀର୍ଘଦିନ ହେଲା ଚାଷୀମାନେ ଫସଲରେ ପାଣି ମଡ଼ାଇ ପାରୁନାହାନ୍ତି। ବିଦ୍ୟୁତ୍ ସଂଯୋଗ ପାଇଁ ନିବେଦନ କଲେ ବିଭାଗୀୟ କର୍ମଚାରୀ ବକେୟା ଦେୟ ପ୍ରଦାନ କଲେ ବିଦ୍ୟୁତ୍ ସଂଯୋଗ କରିବାକୁ କହୁଥିବା ଚାଷୀମାନେ ଅଭିଯୋଗ କରିଛନ୍ତି। ସେହିପରି ବିଦ୍ୟୁତ୍ ସଂଯୋଗ ବିଚ୍ଛିନ୍ନ କରାଯାଇଥିଲେ ସୁଦ୍ଧା ସେମାନଙ୍କ ପାଖକୁ ମାତ୍ରାଧିକ ପରିମାଣର ବିଲ୍ ଆସୁଥିବା ଅଭିଯୋଗ ହୋଇଛି। ଫଳରେ ଅଞ୍ଚଳର ହଜାର ହଜାର ହେକ୍ଟର ଚାଷଜମି ନଷ୍ଟ ହେବାରେ ଲାଗିଛି ବୋଲି ଚାଷୀମାନେ କହିଛନ୍ତି।
ଚାଷୀ ଗରୁଡ଼ଧ୍ୱଜ ଭୋସାଗର କହିଛନ୍ତି, ଉଠାଜଳସେଚନ ପ୍ରକଳ୍ପରେ ଆମେ ଚାଷ କରିଥାଉ। କିନ୍ତୁ ବକେୟା ବିଦ୍ୟୁତ୍ ଦେୟ ଦାବିକରି ଉଠାଜଳସେଚନ ପ୍ରକଳ୍ପକୁ ବିଦ୍ୟୁତ ସଂଯୋଗ କାଟି ଦିଆଯାଇଛି। ଫଳରେ ଫସଲ ନଷ୍ଟ ହେଉଛି। ଆମ କଥା କେହି ଶୁଣୁ ନାହାନ୍ତି। ସେଥିପାଇଁ ଜିଲାପାଳଙ୍କୁ ଗୁହାରୀ କରିବାକୁ ଆସିଛୁ ବୋଲି ସେ କହିଥିଲେ। ଲିମଛୋଡ଼ ଗ୍ରାମର ଅରୁଣ ପୋଢ଼ କହିଥିଲେ, ଆମେ ଯେତେ ବିଦ୍ୟୁତ୍ ବ୍ୟବହାର କରୁନାହୁଁ, ତାହାଠାରୁ ବହୁ ଅଧିକ ବିଲ୍ ଆସୁଛି। ଅଭିଯୋଗ କଲେ ମଧ୍ୟ ବିଭାଗୀୟ କର୍ମଚାରୀ ଶୁଣୁ ନାହାନ୍ତି ଏବଂ ବକେୟା ଦେୟ ପ୍ରଦାନ ନ କଲେ ବିଦ୍ୟୁତ ସଂଯୋଗ କରିବେ ନାହିଁ ବୋଲି କହୁଛନ୍ତି। ଏଭଳି ହେଲେ ସବୁ ଫସଲ ଉଜୁଡ଼ିଯିବ ବୋଲି ସେ କହିଛନ୍ତି।
