ଭୁବନେଶ୍ୱର,୧୯।୧୦(ବ୍ୟୁରୋ): କରୋନା ମହାମାରୀ ଲୋକଙ୍କ ରୋଜଗାର ଛଡ଼ାଇ ନେଇଥିବାବେଳେ ରାଜ୍ୟରେ ଆଳୁ, ପିଆଜ ଓ ପନିପରିବା ଦର ବୋଝ ଉପରେ ନଳିତାବିଡ଼ା ହୋଇଛି। ଗତ ଦୁଇମାସ ହେଲା ଆଳୁ ଓ ପିଆଜ ଦର ଲଗାତାର ବଢିଛାଲିଛି। ଏବେ ଆଳୁ କିଲୋ ୩୫ରୁ ୪୦ଟଙ୍କା ଥିବାବେଳେ ପିଆଜ କିଲୋ ୬୦ଟଙ୍କାରେ ବିକ୍ରି ହେଉଛି। ଉତ୍ପାଦନ କମ୍ ଏବଂ ଆବଶ୍ୟକ ପରିମାଣର ବାହାର ରାଜ୍ୟରୁ ଆମଦାନୀ ହୋଇପାରୁ ନ ଥିବାରୁ ଏଭଳି ବୃଦ୍ଧି ଘଟିଛି। ଆସନ୍ତା ଡିସେମ୍ବର ପୂର୍ବରୁ ଏହି ଦର କମି ନ ପାରେ ବୋଲି କୁହାଯାଉଛି। ଡିସେମ୍ବରରେ ରବି ଚାଷ ଅମଳ ହେବାପରେ ଯାଇ ଆଳୁ, ପିଆଜ ଦରରେ ହ୍ରାସ ଘଟିବ ବୋଲି ଆଶା କରାଯାଉଛି।
ଆଳୁ ଓ ପିଆଜ ଉତ୍ପାଦନରେ ଓଡ଼ିଶା ଏକ ନିଅଣ୍ଟିଆ ରାଜ୍ୟ । ତେଣୁ ଆଳୁ ପାଇଁ ପଶ୍ଚିମବଙ୍ଗ ଏବଂ ପିଆଜ ଲାଗି ମହାରାଷ୍ଟ୍ର, କର୍ନାଟକ ଓ ଆନ୍ଧ୍ରପ୍ରଦେଶ ଉପରେ ନିର୍ଭର କରିଥାଏ। ସେଥିପାଇଁ ଯୋଗାଣ ପେଣ୍ଠରେ ଆଳୁ ଓ ପିଆଜର ହ୍ରାସ ଓ ବୃଦ୍ଧିର ପ୍ରଭାବ ସିଧାସଳଖ ଘରୋଇ ବଜାରରେ ଅନୁଭୂତ ହେଉଛି। ଚଳିତବର୍ଷ ପଶ୍ଚିମବଙ୍ଗରେ ଗତବର୍ଷ ଅପେକ୍ଷା ୧୦% କମ୍ ଆଳୁ ଉତ୍ପାଦନ ହୋଇଛି। ପଶ୍ଚିମବଙ୍ଗରେ ଆଳୁ ଆବଶ୍ୟକତା ବାର୍ଷିକ ୬୦ଲକ୍ଷ ଥିବାବେଳେ ଚଳିତବର୍ଷ ୯୦ରୁ ୯୫ ଲକ୍ଷ ଟନ୍ ଆଳୁ ଉତ୍ପାଦନ ହୋଇଛି। ତେଣୁ ସେଠାରୁ ରପ୍ତାନି ହେଉଥିବା ଆଳୁର ପରିମାଣ ଅପେକ୍ଷାକୃତ କମ୍ ରହିଛି। ବିଶେଷକରି ଅଧିକାଂଶ ଆଳୁ ଏଥର ବିହାର ଏବଂ ଆସାମର ବନ୍ୟା ପ୍ଳାବିତ ଅଞ୍ଚଳକୁ ପଠାଯାଉଛି। ଫଳରେ ଯୋଗାଣ ପେଣ୍ଠରେ ଆଳୁର ମୂଲ୍ୟବୃଦ୍ଧି ଘଟିଛି। ଏହାର ସିଧାସଳଖ ପ୍ରଭାବ ଓଡ଼ିଶା ବଜାର ଉପରେ ପଡ଼ିବା ସହ ଆଳୁର ମୂଲ୍ୟବୃଦ୍ଧି ଘଟୁଛି। ସେହିଭଳି ଆନ୍ଧ୍ରପ୍ରଦେଶ ଓ କର୍ନାଟକରେ ପାଣିପାଗ ଅନିୟମିତତା ଏବଂ ପ୍ରବଳ ବର୍ଷା ଯୋଗୁ ଅଗଷ୍ଟ ମାସରେ ଉତ୍ପାଦିତ ହେବାକୁ ଥିବା ପ୍ରଥମ ଖରିଫ୍ ପିଆଜ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ଫଳରେ ମହାରାଷ୍ଟ୍ରରୁ ଆମଦାନୀ ହେଉଥିବା ପିଆଜର ଚାହିଦା ବୃଦ୍ଧି ହେବାରୁ ଯୋଗାଣ ପେଣ୍ଠରେ ଏହାର ମୂଲ୍ୟ ବୃଦ୍ଧି ଘଟିଛି।
ଅନ୍ୟପକ୍ଷରେ ରାଜ୍ୟ ସରକାରଙ୍କ ପ୍ରାଥମିକ ଆକଳନ ଅନୁଯାୟୀ ଚଳିତବର୍ଷ ଅଗଷ୍ଟ ମାସରେ ଅତ୍ୟଧିକ ବର୍ଷା ଓ ବନ୍ୟା ଯୋଗୁ ରାଜ୍ୟରେ ୧୬ଟି ଜିଲାରେ ଖରିଫ୍ ଚାଷ ପ୍ରବାଭିତ ହୋଇଛି। ୨,୨୮,୯୬୧ ହେକ୍ଟର ଚାଷଜମିର ୩୩% ରୁ ଅଧିକ ଫସଲ ନଷ୍ଟ ହୋଇଥିବା ଜଣାପଡ଼ିଛି। ଏଥିରେ ଉଭୟ ଧାନ ଓ ପନିପରିବା ଏବଂ ଅନ୍ୟାନ୍ୟ ଫସଲ ରହିଥିଲା। ଘରୋଇ ବଜାରରେ ପନିପରିବା ଦରବୃଦ୍ଧିର ଏହା ପ୍ରମୁଖ କାରଣ ବୋଲି କୁହାଯାଉଛି। ତେବେ କରୋନା ମହାମାରୀ ଏବଂ ବନ୍ୟା କ୍ଷତିଗ୍ରସ୍ତ ଚାଷୀମାନଙ୍କ ସହାୟତା ନିମନ୍ତେ ମୁଖ୍ୟମନ୍ତ୍ରୀ ସ୍ବତନ୍ତ୍ର ପ୍ୟାକେଜ୍ ଘୋଷଣା କରିଥିବା କୃଷି ମନ୍ତ୍ରୀ ଅରୁଣ କୁମାର ସାହୁ କହିଛନ୍ତି। ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ଆଳୁ, ପିଆଜ ଦରବୃଦ୍ଧି ସମ୍ପର୍କରେ କହିଛନ୍ତି, କେବଳ ଓଡ଼ିଶା ନୁହେଁ, ବର୍ତ୍ତମାନ ଆଳୁ ଓ ପିଆଜର ଦରବୃଦ୍ଧି ସମଗ୍ର ଦେଶରେ ପରିଲକ୍ଷିତ ହେଉଛି। ରାଜ୍ୟ ସରକାର ଦର ନିୟନ୍ତ୍ରଣ ପାଇଁ ପଦକ୍ଷେପ ନେଉଛନ୍ତି। ଫିଲ୍ଡ କର୍ମଚାରୀଙ୍କ ଦ୍ୱାରା ଆଳୁ, ପିଆଜର ଆମଦାନୀ, ବିକ୍ରୟ ମୂଲ୍ୟ ଏବଂ ଉପଲବ୍ଧତା ଆଦି ପ୍ରତ୍ୟେକ ଦିନ ଅନୁଧ୍ୟାନ କରାଯାଉଛି। ଏହାସହ ବଜାର ଉପରେ ମଧ୍ୟ ତୀକ୍ଷ୍ଣ ନଜର ରଖାଯାଇଛି। ଆବଶ୍ୟକ ପଡ଼ିଲେ ବ୍ୟବସାୟୀମାନଙ୍କ ବୈଠକ ଡକାଇ ଏହାର ମୂଲ୍ୟବୃଦ୍ଧି ନିୟନ୍ତ୍ରଣ କରିବାକୁ ଚେଷ୍ଟା କରାଯିବ ବୋଲି ସେ କହିଛନ୍ତି। ଏନେଇ କୁବେରପୁରୀ ବ୍ୟବସାୟୀ ସଂଘର ସମ୍ପାଦକ ଶକ୍ତି ଶଙ୍କର ମିଶ୍ର କହିଛନ୍ତି, ଓଡ଼ିଶାକୁ ଆଳୁ ଯେତିକି ଆସିବା କଥା ଏବେ ଆସୁଛି। ପଶ୍ଚିମବଙ୍ଗରେ ଷ୍ଟୋରେଜ୍ ପ୍ରାଇସ୍ ଅଧିକ ଥିବାରୁ ଏଥର ଆଳୁ ଦର ବଢିଥିବା ସେ କହିଛନ୍ତି। ବ୍ୟବସାୟୀ ସଂଘ ସଦସ୍ୟ ମନୋଜ କୁମାର ଜେନା କହିଛନ୍ତି, ଓଡ଼ିଶାକୁ ଏବେ ପଶ୍ଚିମବଙ୍ଗରୁ ଦୈନିକ ୪୦୦ରୁ ୪୫୦ ଟ୍ରକ୍ ଆଳୁ ଆସୁଛି। ସେଠାରୁ କୁଇଣ୍ଟାଲକୁ ୨୬୦୦ରୁ ୨୬୫୦ ଟଙ୍କାରେ କିଣା ହେଉଥିବା ବେଳେ ଏଠାରେ ୨୭୫୦ରୁ ୨୮୦୦ଟଙ୍କା ମଧ୍ୟରେ ବିକ୍ରି ହେଉଛି। ଡିସେମ୍ବର, ଜାନୁୟାରୀ ପୂର୍ବରୁ ଆଳୁ ଦାମ୍ କମିବାର ସମ୍ଭାବନା ନ ଥିବା ସେ କହିଛନ୍ତି।
