ବୁଦାପେଷ୍ଟ,୨୫।୬: ୟୁରୋକପ୍ ଫୁଟ୍ବଲ ଟୁର୍ନାମେଣ୍ଟରେ ରାଉଣ୍ଡ ଅଫ୍ ୧୬ କାର୍ଯ୍ୟସୂଚୀ ସ୍ପଷ୍ଟ ହୋଇଛି। ଶନିବାରଠାରୁ ନକ୍ଆଉଟ ପର୍ଯ୍ୟାୟ ଆରମ୍ଭ ହେବ। ଗ୍ରୁପ୍ ଏଫ୍’ରେ ପର୍ତ୍ତୁଗାଲ ଓ ଫ୍ରାନ୍ସ ମଧ୍ୟରେ ବୁଧବାର ଖେଳାଯାଇଥିବା ମ୍ୟାଚ୍ ୨-୨ ଗୋଲରେ ଅମୀମାଂସିତ ରହିଛି। ଡିଫେଣ୍ଡିଂ ଚାମ୍ପିୟନ ପର୍ତ୍ତୁଗାଲ ତରଫରୁ ଅଧିନାୟକ କ୍ରିଷ୍ଟିଆନୋ ରୋନାଲ୍ଡୋ ପେନାଲ୍ଟି ଜରିଆରେ ଦୁଇଟି ଗୋଲ ସ୍କୋର କରିଥିଲେ। ଏଥିସହ ରୋନାଲ୍ଡୋ ନିଜ ଦେଶ ପାଇଁ ୧୦୯ଟି ଗୋଲ ସ୍କୋର କରି ରେକର୍ଡ ନିକଟତର ହୋଇଛନ୍ତି। ପୂର୍ବତନ ଇରାନ ଷ୍ଟ୍ରାଇକର ଅଲି ଡାଏଇଙ୍କ ରେକର୍ଡର ସମକକ୍ଷ ହୋଇଛନ୍ତି ରୋନାଲ୍ଡୋ। ଏଥିସହ ପର୍ତ୍ତୁଗାଲ ଗ୍ରୁପ୍ ଏଫ୍ରେ ୩ଟି ମ୍ୟାଚ୍ ଖେଳି ଗୋଟିଏ ଲେଖାଏ ବିଜୟ, ଡ୍ର ଓ ପରାଜୟ ସହ ୪ ପଏଣ୍ଟ ହାସଲ କରି ତୃତୀୟ ସ୍ଥାନରେ ରହିବା ସହ ରାଉଣ୍ଡ ଅଫ୍ ୧୬ରେ ପ୍ରବେଶ କରିଛି। ଅନ୍ୟପଟେ ବିଶ୍ୱ ଚାମ୍ପିୟନ ଫ୍ରାନ୍ସ ୩ଟି ମ୍ୟାଚ୍ ଖେଳି ଗୋଟିଏ ବିଜୟ ଓ ୨ଟି ଡ୍ର ସହ ୫ ପଏଣ୍ଟ ହାସଲ କରି ଗ୍ରୁପ୍ ଏଫ୍ର ଶୀର୍ଷରେ ରହି ନକ୍ଆଉଟକୁ ଉଠିଛି। ରାଉଣ୍ଡ ଅଫ୍ ୧୬ରେ ପର୍ତ୍ତୁଗାଲ ସୋମବାର ୨୮ ତାରିଖରେ ବେଲ୍ଜିୟମକୁ ଭେଟିବ। ସେହିପରି ଫ୍ରାନ୍ସ ମଙ୍ଗଳବାର ୨୯ ତାରିଖରେ ପ୍ରି- କ୍ୱାର୍ଟରରେ ସୁଇଜରଲାଣ୍ଡକୁ ଭେଟିବ।
ସ୍ଥାନୀୟ ଫେରେଙ୍କ ପୁକାସ ଷ୍ଟାଡିୟମରେ ଖେଳାଯାଇଥିବା ଏହି ମ୍ୟାଚ୍ରେ ଫ୍ରାନ୍ସ ତରଫରୁ କରିମ ବେଞ୍ଜେମା ମଧ୍ୟ ରୋନାଲ୍ଡୋଙ୍କ ଭଳି ଦୁଇଟି ଗୋଲ ଦେଇଥିଲେ। ସେ ପ୍ରଥମାର୍ଦ୍ଧ ଇଞ୍ଜୁରି ଟାଇମର ଦ୍ୱିତୀୟ ମିନିଟ୍ରେ ପେନାଲ୍ଟି ଜରିଆରେ ଦଳ ତରଫରୁ ପ୍ରଥମ ଗୋଲ ଦେଇଥିଲେ। ସେହିପରି ୪୭ତମ ମିନିଟ୍ରେ ସେ ଆଉ ଏକ ଗୋଲ ଦେଇଥିଲେ। ଏହି ମ୍ୟାଚ୍ରେ ରୋନାଲ୍ଡୋଙ୍କ ପ୍ରଦର୍ଶନ ଐତିହାସିକ ଥିଲା ଓ ତାଙ୍କ ପ୍ରଦର୍ଶନ ବଳରେ ପର୍ତ୍ତୁଗାଲ ନକ୍ଆଉଟ ପର୍ଯ୍ୟାୟକୁ ଉନ୍ନୀତ ହୋଇଛି। ଫ୍ରାନ୍ସ କିନ୍ତୁ ସବୁ ଦୃଷ୍ଟିକୋଣରୁ ଉନ୍ନତ ପ୍ରଦର୍ଶନ କରିଥିଲା।
